1, 2. Aha do pinajongjong ni si Noak dohot keluargana, jala aha do na diadopi nasida?

SO MA si Noak sian karejona ala nunga loja dihilala. Tapingkirhon ma hundul ibana di sada balok, huhut diida parau na tinungkanganna i. Uap ni ter na mohop jala soara ni tokkok na masialusan tarbege di humaliangna. Diida si Noak ma angka ianakhonna na marsitutu pajongjongkon jala mamasang boroti ni parau i. Nunga marpulu taon si Noak, anakkonna, parumaenna, dohot tungganeboruna pajongjongkon parau i. Alai, godang dope na ingkon siulahonon ni nasida!

² Didok halak do si Noak na loakon. Diparengkeli do ibana alani parau i dohot alani aek na sumar na pinaboana. Ndang adong na manangihon si Noak, ndang tutu i masa didok rohanasida! Longang do roha ni halak di tingki i mangida si Noak dohot keluargana. Didok do nasida pahabishon tingki dohot gogonasida tu ulaon na so marlapatan. Alai, ndang songon halak di tingki i, las do roha ni Jahowa mangida si Noak.

3. Boasa didok si Noak sai marparange mardonganhon Debata?

³ Dipaboa di Bibel, ”Sai marparange mardonganhon Debata do si Noak i.” (Jaha 1 Musa 6:9.) Na rap do si Noak dohot Debata di surgo manang di tano on? Ndang songon i. Dioloi jala dihaholongi si Noak do Debata, i do umbahen didok si Noak mardonganhon Debata, manang songon na maraleale. Marribu taon dungkon i, didok Bibel do muse taringot tu si Noak, ”Marhitehite [haporseaonna] diuhumi ibana portibi on.” (Heb. 11:7) Aha do lapatanna? Jala aha do na taparsiajari sian haporseaonna?

4, 5. Songon dia do hajahaton lam gok di tingki ni si Noak?

⁴ Diida si Noak do songon dia hajahaton lam gok di portibi on, nunga masa on sian tingki ni si Henok, ompung ni bapakna. Si Henok ma sahalak partigor na mardonganhon Debata di tingki i. Dibaritahon ibana do tu jolma taringot panguhuman na  laho masa tu halak na jahat. Jala di adopan ni Debata, nunga marjea portibi on alani hajahaton. (1 Mus. 5:22; 6:11; Jud. 14, 15) Aha do na mambahen gok hajahaton di portibi on?

⁵ Adong parsoalan na balga na masa di tongatonga ni angka surusuruan di surgo. Sada sian surusuruan i mangalo tu Jahowa, didok ma na so tutu taringot tu Jahowa, jala dielaela do si Adam dohot si Hawa mangulahon dosa. Di tingki ni si Noak, godang do surusuruan na mangalo tu Debata dohot pamarentaonNa. Ditadingkon nasida ma surgo jala ro tu tano on laho mardongansaripe dohot angka borua na uli. Angka surusuruan na mangkaringkothon dirina sandiri on, parohon gok hajahaton tu jolma.​—1 Mus. 6:1, 2; Jud. 6, 7.

6. Aha do pangkorhon ni angka Nepilim tu parange ni jolma, jala aha do ditontuhon Jahowa tu nasida?

⁶ Parsaripeon na so patut on, manubuhon angka baoa na garang jala gogo. Di Bibel, digoari do nasida Nepilim, lapatanna ”Pangarumpak”, na mambahen susa na asing. Gabe lam jahat ma halak di humaliangna ala mangadopi angka Nepilim. Alani i ma didok Debata, ”Lam deak hajahaton ni jolma di tano on, jala sai na jat na ma sude tubutubu dohot pingkiran ni rohanasida gonop ari.” Ditontuhon Jahowa ma uhum laho ripashononNa nasida 120 taon nai.​—Jaha 1 Musa 6:3-5.

7. Aha do hasusaan na diadopi si Noak dohot tungganeboruna laho mangondingi anakkonna sian pangkorhon ni parange na so denggan?

⁷ Pingkirhon ma, songon dia susa ni pagodanggodangkon ianakhon di tingki sisongon i. Alai, songon i ma dihilala si Noak.  Dung marumur 500 taon, tubu ma tolu anak ni si Noak, i ma si Sem, si Ham dohot si Japet. * Ingkon marsitutu do si Noak dohot tungganeboruna mangondingi ianakhonna sian pangkorhon ni parange na so denggan di tingki i. Jotjot do lomo roha ni dakdanak baoa mangida ”angka na [gogo]” dohot ”baoa na tarbarita”. Songon i ma Nepilim, gogo jala tarbarita do nasida. Ndang tarpasiding ni si Noak sian anakna barita ni angka Nepilim dohot na niulahon ni nasida. Alai, diurupi ibana do anakkonna mangantusi na dihasogohon Jahowa do hajahaton na masa tingki i, jala hansit do rohaNa mangida i.​—1 Mus. 6:6.

8. Songon dia do natuatua boi maniru si Noak dohot tungganeboruna?

⁸ Hita mangolu di portibi na gok kekerasan dohot hajahaton. Alani i, boi do dihilala natuatua saonari pangkilalaan ni si Noak. Saonari, godang do na poso mangihuthon geng, punguan ni na poso na so boi diatur. Godang do sitontonon ni dakdanak na pataridahon kekerasan. Ingkon marsitutu do natuatua mangurupi ianakhonna, laho mangantusi molo satongkin nai ripashonon ni Debata do na mangulahon hajahaton. (Ps. 11:5; 37:10, 11) Boi do hita marhasil mangulahon on, songon si Noak dohot tungganeboruna. Angka baoa na burju do ianakhon ni si Noak, jala dioli nasida do tungganeboru na patujolohon lomo ni roha ni Jahowa.

9, 10. (a) Aha do parenta ni Jahowa na mambahen muba ngolu ni si Noak? (b) Boasa disuru Jahowa si Noak pajongjongkon parau?

⁹ Sada tingki muba ma parngoluon ni si Noak. Dipaboa Jahowa ma sangkapNa tu ibana laho mangaripashon hajahaton sian tano on. Diparentahon Debata ma tu si Noak, ”Bahen ma di ho sada parau sian hau goper (marantibane).”​—1 Mus. 6:14.

¹⁰ Parau i, ndang songon parau na somal taida, ndang adong haluan (jolona) dohot buritanna (pudina) jala ndang adong sirip kemudina. Songon poti na balga do parau i. Ditontuhon Jahowa do ukuran dohot bentuk ni parau i. Disuru do muse asa didompol parau i dohot ter. Dipaboa Jahowa do tu si Noak na laho masa, ”Paroonku ma tu tano on aek na sumar . . . asa tos hosa ni saluhut na di tano on.” Jala didok Jahowa ma tu si Noak, ”Bongotanmu ma parau i, ho dohot angka anakmu dohot jolmam dohot jolma ni angka anakmi rap dohot ho.” Ingkon papunguon ni si Noak do muse sada jantan dohot sada boruboru  sian ganup ragam ni binatang. Holan na masuk tu parau i do na malua sian aek na sumar!​—1 Mus. 6:17-20.

11, 12. Ulaon aha do na dilehon tu si Noak, jala songon dia do ibana mangulahon i?

¹¹ Balga do ukuran ni parau sipajongjongon ni si Noak. Ganjangna, hirahira 133 meter, bidangna 22 meter, jala timbona 13 meter. On ma parau sian hau na umbalga na hea dibahen. Alani i, ndang mura pajongjongkon parau i. Dijua si Noak do ulaon i ala maol mangulahon, manang dipauba do ukuranna asa mura ulahononna? Bibel mandok, ”Dibahen si Noak ma sude, songon na tinonahon ni Debata tu ibana, songon i dibahen.”​—1 Mus. 6:22.

¹² Marpulu taon ma lelengna si Noak pajongjongkon parau i. Olo do ra 40 sahat tu 50 taon. Andorang so dipajongjong parau i, pillitonna do parjolo hau na laho ditaba, dung i dibola, diboan, jala dipadomu. Tolu tingkat parau i bahenonna, marbilut, jala marpintu. Ra, marjandela do angka bilut na di ginjang i dibahen, jala bahenonna do miring tarup ni parau i asa boi tiris aek molo ro udan.​—1 Mus. 6:14-16.

13. Aha dope ulaon ni si Noak na rumingkot sian pajongjongkon parau, jala songon dia do pangkilalaan ni halak di tingki i?

¹³ Dung martaontaon, tontu las do roha ni si Noak ala diurupi keluargana do ibana pajongjong parau i! Alai, adong dope na ringkot ulahonon ni si Noak. Didok do si Noak ”parjamita hatigoran”. (Jaha 2 Petrus 2:5.) Alani i, ingkon barani do ibana paboahon barita panguhuman na laho masa. Ditangihon do barita na pinaboa ni si Noak i? Alusna boi taboto sian hata ni Jesus. Didok ibana, ”Laos so mamoto nasida.” Dipaboa Jesus do molo jolma di tingki i lalap di angka ulaonna be, mangan minum do nasida, mangoli dohot pangolihonsa, jala ndang diparateatehon barita ni si Noak. (Mat. 24:37-39) Tontu, godang do na mangarehei manang na mambahen kekerasan tu si Noak dohot tu keluargana. Olo do ra, digugai nasida ulaon ni si Noak pajongjongkon parau i.

14. Aha do na boi taparsiajari sian si Noak dohot keluargana?

¹⁴ Adong do parsiajaran na ringkot tu halak Kristen saonari sian si Noak dohot keluargana. Tarlumobi, ala hita mangolu ”di angka tingki parpudi”. (2 Tim. 3:1) Jesus mandok, dos do na masa di tingki ni si Noak dohot na masa saonari. Direhei do si Noak dohot keluargana ala pajongjongkon parau i, alai ndang maila manang mabiar nasida. Saonari pe, molo ndang dijangkon ulaonta marbarita na uli, manang gabe parohon hasusaan tu  hita, taingot ma na masa tu si Noak. Dung i, taingot ma muse ndang hita na parjolo mangkilala hasusaan sisongon on.

15. Aha do na masa tu si Noak tingki marumur hirahira 600 taon ibana?

¹⁵ Dung marpulu taon, sae ma dipajongjong parau i. Alai, dung marumur hirahira 600 taon si Noak, mate ma bapakna, si Lamek. * Lima taon dungkon i, mate ma muse ompungna, si Metusalah na marumur 969 taon. Ibana ma jolma na umleleng mangolu di tano on. (1 Mus. 5:27) Sanga dope si Metusalah dohot si Lamek rap mangolu dohot si Adam.

16, 17. (a) Aha do didok Debata tu si Noak dung marumur 600 taon ibana? (b) Paboa ma songon dia angka binatang i boi masuk tu parau i.

¹⁶ Dung marumur 600 taon, didok Jahowa ma tu si Noak, ’Bongoti ma parau i, ho dohot sude isi ni bagasmu.’ Laos disuru Jahowa do si Noak pamasukkon sude ragam ni binatang tu parau i, i ma pitu ekor binatang na ias, na boi dipelehon, jala sapasang be sian binatang na asing.​—1 Mus. 7:1-3.

¹⁷ Tontu, longang do roha mangida marribu binatang ro sian sude luat tu parau i. Sian sude ragam ni binatang i, adong na manginsir, na habang, na lambat dohot na hatop pardalanna,  na balga dohot na gelleng. Ndang maol si Noak pamasukkon angka binatang i, ndang pola iringonna manang leleonna asa masuk tu parau i. Dipaboa tu hita, angka binatang i ”ro be . . . mandapothon si Noak, tu bagasan parau i”.​—1 Mus. 7:9.

18, 19. (a) Songon dia do bahenonta mangalusi sungkunsungkun ni halak taringot tu na masa di ngolu ni si Noak? (b) Songon dia do bisuk ni Jahowa tarida sian cara na binahenNa paluahon angka binatang?

¹⁸ Olo do ra halak na so porsea tu Bibel mandok, ’Songon dia ma boi masa i? Jala songon dia do angka binatang boi rap mian di sada bilut?’ Pingkirhon ma on: Tung so boi ma Debata Sitompa saluhut mambahen binatang i asa jinak? Taingot ma, Debata do na manompa angka binatang i. Dung i, di pudian ni ari dipahiang Ibana do Laut Rara, jala dipaso mata ni ari. Alani i, ndang longang rohanta molo Debata boi mangulahon sude na dipatorang di parngoluon ni si Noak.

¹⁹ Boi do bahenon ni Debata cara na asing paluahon angka binatang i sian aek na sumar. Alai, si Noak do disuru Ibana paluahon angka binatang i. On patuduhon bisuk ni Jahowa, ala nunga dilehon hian hak tu jolma laho mangaradoti angka binatang. (1 Mus. 1:28) Alani i, marhite na masa di tingki ni si Noak, boi ma dipatudu natuatua tu ianakhonna molo Jahowa mangargai sude na tinompaNa, dohot ma i angka binatang.

20. Boasa godang ulaon ni si Noak dohot keluargana tingki laho ro aek na sumar i?

²⁰ Dipaboa Jahowa do tu si Noak, na laho paroonNa aek na  sumar pitu ari nai. Tontu, godang do na ingkon ulahonon ni si Noak dohot keluargana. Ingkon papunguon ni nasida do angka na ringkot di nasida, dohot sipanganon tu angka binatang. Godang do siparadeon ni tungganeboru ni si Noak dohot angka parumaenna asa boi nasida denggan tading di parau i.

21, 22. (a) Boasa ndang pola longang rohanta mangida pangarehei di tingki ni si Noak? (b) Andigan do hohom angka pangarehei i?

²¹ Songon dia do na masa tu halak na asing di tingki i? Tongtong dope ”laos so mamoto” nasida, hape nunga diida songon dia Jahowa mamasumasu ulaon ni si Noak. Nang pe diida nasida marroan angka binatang laho masuk tu parau i, alai direhei do si Noak dohot keluargana. Ndang pola longang rohanta mangida i. Saonari pe, godang do halak na so porsea, nang pe naung diida nasida godang tanda na patuduhon molo hita mangolu di tingki parpudi. Jala, songon na disurirangkon ni apostel Petrus, ro ma angka pangarehei di ari parpudi, jala ndang diparrohahon nasida sipasingot ni Debata.​—Jaha 2 Petrus 3:3-6.

²² Andigan do hohom pangarehei i? Dung masuk si Noak, keluargana, dohot angka binatang tu parau i, ”dihinsu Jahowa ma sian pudina” pintu ni parau i. Molo adong pangarehei na mangida i, ra pintor hohom ma nasida, manang pintor hohom do ra nasida dung dibege marsasak soara ni udan! Lam leleng, lam doras do udan i, gabe dihungkupi aek ma sude tano on songon naung nidok ni Jahowa.​—1 Mus. 7:16-21.

23. (a) Sian dia do taboto ndang lomo roha ni Jahowa mangida halak parjahat diripashon? (b) Boasa ringkot tatiru haporseaon ni si Noak saonari?

²³ Lomo do roha ni Jahowa mangida halak parjahat i diripashon? Ndang lomo rohaNa! (Hes. 33:11) Dilehon Jahowa do godang tingki asa muba nasida. Boi do marhamubaon nasida? Hangoluan ni si Noak boi mangalusi sungkunsungkun i. Diihuthon ibana do Jahowa jala dioloi sude parentaNa. Alani i do ibana boi malua. Marhite haporseaon, diuhum si Noak do portibi on jala marhite haporseaonna dipatuduhon ibana do hajahaton ni jolma di tingki i. Haporseaon ni si Noak do na paluahon ibana dohot keluargana. Molo tatiru haporseaon ni si Noak, boi ma hita dohot na tahaholongi mandapot haluaon. Songon si Noak, boi do hita marparange mardonganhon Debata, jala maraleale tu Ibana salelenglelengna!