1, 2. (a) Aha do didok halak na ro i tu si Maria? (b) Boasa ingkon pilliton ni si Maria na dumenggan di ngoluna?

TINGKI ro sasahalak na so tinandana mandapothon si Maria, tarsonggot ma ibana. Ndang ditanda si Maria ise na ro i, alai ibana do dilului, ndang natuatuana! Diboto si Maria do ndang pangisi ni Nasaret na ro i. Gelleng do huta Nasaret, tarboto do ise halak na baru ro tu huta i. Sungkunsungkun do roha ni si Maria mambege hata ni halak na ro i. Didok tu ibana, ”Tabi di ho, na niasian! Didongani Tuhan i ma ho!”​—Jaha Lukas 1:26-28.

² Songon i ma Bibel mangalehon hatorangan taringot tu si Maria, anak ni si Eli, halak Nasaret na sian Galilea. Tingki i, ingkon tontuhonon ni si Maria do aha sipillitonna di ngoluna. Nunga martunangan si Maria tu si Josep, sahalak tukang hau. Nang pe ndang sahalak na mora si Josep, alai togu do ibana di partondion. Nunga ditontuhon si Maria asa marhamulian tu si Josep. Alai di na so pamotoanna, dipillit Debata ma ibana laho manjalo ulaon na sumurung, na mambahen muba ngoluna.

3, 4. Aha do na ringkot taboto asa boi tatanda si Maria?

³ Ra sungkunsungkun do rohanta, boasa ndang godang dipaboa hatorangan taringot tu si Maria di Bibel. Umpamana, otik do na dipaboa taringot tu hasomalan dohot parangena. Dung i, ndang adong dipaboa tu hita songon dia rupa ni si Maria. Holan na ringkot taparsiajari sian ibana do na dipaboa tu hita.

⁴ Asa boi taboto ise sasintongna si Maria, unang ma taihuthon angka pandapot ni agama taringot tu ibana. Unang ma tapingkirhon si Maria songon na adong di angka lukisan, manang songon na niajarhon ni gareja, na manggombarhon ibana ”Ina ni Debata” manang ”Ratu na sian Surgo”. Alai, taihuthon ma hatorangan ni Bibel taringot tu si Maria. Marhite i, boi ma tatanda si Maria laos maniru haporseaonna.

5. (a) Aha do na taparsiajari sian alus ni si Maria tu si Gabriel? (b) Aha do na ringkot tatiru sian si Maria?

⁵ Surusuruan do na ro mandapothon si Maria, goarna si Gabriel. Tingki didok surusuruan i, ”na niasian” si Maria, songgot do rohana mambege i, jala sungkunsungkun rohana aha do lapatan ni i. (Luk. 1:29) Ise do halak na mamillit ahu gabe na niasianna? ninna roha ni si Maria. Ndang hirim roha ni si Maria mandapot sangap sian jolma. Alai, na nidok ni surusuruan i, si Maria na niasian ni Debata. Ndang gabe ginjang roha ni si Maria, nang pe diboto na dijangkon Debata ibana. Songon i ma nang hita, marsitutu ma asa dihalomohon Debata jala unang ma ginjang rohanta, nang pe taboto dihalomohon Debata ulaonta. Molo taulahon i, tadapot ma parsiajaran sian na nidok ni si Maria, dipatutoru Debata do siginjang roha alai dipatimbo do halak na serep marroha.​—Jak. 4:6.

6. Aha do hak na sumurung na laho sijaloon ni si Maria?

⁶ Ingkon serep do roha ni si Maria, tarlumobi alani hak na sumurung na laho sijaloonna. Tubuhonon ni si Maria ma sada posoposo na gabe halak na sumangap sian saluhut halak. Didok surusuruan i, ”Lehonon ni Tuhan Debata do tu Ibana habangsa ni si Daud, amana i. Rajaanna do pomparan ni si Jakkob salelenglelengna, jala ndang marhaujungan harajaonna i.” (Luk. 1:32, 33) Tontu, diboto si Maria do janji ni Debata taringot tu pinompar ni si Daud, na laho mamarenta salelengna. (2 Sam. 7:12, 13) Alani i, anakna i ma na gabe Messias na pinaimaima ni halak Israel!

7. (a) Aha do na taboto sian sungkunsungkun ni si Maria? (b) Aha do na boi diparsiajari angka na poso sian si Maria?

⁷ Dipaboa surusuruan i muse, ”Goaron do Ibana Anak ni Natumimbul i.” Songon dia do jolma na mardosa boi manubuhon Anak ni Debata? Songon dia do si Maria boi marianakhon? Tutu, nunga martunangan ibana tu si Josep, alai ndang sohot dope nasida. Disungkun si Maria do, ”Boha ma pambahen ni i, ai so marhamulian dope ahu.” (Luk. 1:34, Bibel siganup ari) Ndang maila si Maria mandok na so marhamulian dope ibana, on patuduhon diargai ibana do habajuonna (keperawananna). Saonari, godang do namarbaju mambahen na so tama tu habajuonna, jala dielaela do na asing na tongtong  mampartahanhon habajuonna. (Mal. 3:6) Alai, diargai Jahowa do halak na mangihuthon patikNa taringot tu moral, songon si Maria.​—Jaha Heber 13:4.

8. Songon dia do si Maria boi manubuhon anak na so mardosa?

⁸ Nang pe si Maria sahalak naposo ni Debata, alai jolma na mardosa do ibana. Antong, songon dia do ibana boi manubuhon anak na so mardosa? Ninna si Gabriel i ma patorangkon, ”Songgopan ni Tondi Parbadia ma ho jala linggoman ni hagogoon ni Natumimbul i do ho; ala ni i na badia do dohonon na tubu i, Anak ni Debata.” (Luk. 1:35) Badia lapatanna, ”ias” manang ”ndang mardosa”. Sude do jolma mardosa ala manean dosa sian natuatuana. Alai, dipapinda Jahowa do anakNa i tu bortian ni si Maria marhite tanda halongangan, jala marhite tondi parbadia ’linggomanNa’ do anakNa i sian dosa. Porsea do si Maria tu hata ni surusuruan i? Dung i, songon dia do pangkilalaanna?

9. (a) Boasa ndang sintong pandapot ni halak, na so porsea namarbaju boi tubuan anak? (b) Songon dia do si Gabriel paposhon roha ni si Maria?

⁹ Godang do na so porsea molo namarbaju boi tubuan anak, deba sian nasida, i ma angka teolog. Nang pe singkola teolog nasida, ndang tarjalo rohanasida hasintongan na mura antusan on. Didok si Gabriel do, ”Ndang adong na so tarpatupa Debata.” (Luk. 1:37) Pos do roha ni si Maria tu hata ni si Gabriel, ala togu do haporseaonna. Alai, ndang holan porsea sambing. Alani i, dipangido ibana do tanda na paposhon rohana. Dipaboa si Gabriel ma na masa tu si Elisabet, sisolhot ni si Maria naung leleng ndang marianakhon. Alai, nunga gabegabean ibana marhite tanda halongangan sian Debata!

10. Boasa ndang mura ulahonon ni si Maria hak na sumurung na jinalona sian Debata?

¹⁰ Saonari, songon dia do bahenon ni si Maria? Nunga dilehon tu ibana hak na sumurung jala nunga dipatuduhon tanda tu ibana laho paposhon rohana. Alai, ndang mura mangulahon i. Umpamana, nunga martunangan hian si Maria dohot si Josep, alai olion ni si Josep dope si Maria molo diboto naung gabegabean ibana? Asing ni i, ingkon manat do si Maria manjaga posoposo na di bortianna, ala sumangap do ibana sian sude na tinompa ni Debata. Ingkon pagodanggodangon ni si Maria ma anakna i, jala ondinganna sian portibi na ni rajaan ni Sibolis. Tontu, tanggung jawab na borat do on!

11, 12. (a) Songon dia do pangkilalaan ni deba sian angka baoa na marhaporseaon tu ulaon na nilehon ni Debata tu nasida? (b) Aha do tarida sian alus ni si Maria?

 ¹¹ Adong do disurat di Bibel angka baoa na marhaporseaon na togu, alai mabiar manjalo ulaon na borat sian Debata. Didok si Musa do na so malo ibana mangkatai. (2 Mus. 4:10) Si Jeremia mandok, ”na bajar dope” ibana. (Jer. 1:6) Martabuni do si Jona sian adopan ni Debata! (Jona 1:3) Alai, songon dia do si Maria?

¹² Alus ni si Maria tu surusuruan i patuduhon serep ni roha dohot pangoloionna. Ninna ibana do, ”Naposo ni Tuhan i do ahu. Sai saut ma tu ahu songon na nidokmi!” (Luk. 1:38) Dipatudos si Maria do ibana songon sahalak naposo boruboru. Naposo borua manang hatoban borua do na umlea sian sude hatoban, jala saguru di tuanna do hangoluanna. Songon i ma pangkilalaan ni si Maria tu Jahowa. Pos do roha ni si Maria, ondingan ni Jahowa ibana. Lehonon ni Jahowa do pasupasu jala urupanNa do ibana mangulahon na pinangidoNa.​—Ps. 18:26.

13. Songon dia do hita maniru si Maria tingki maol tahilala mangulahon lomo ni roha ni Debata?

¹³ Olo do ra maol tahilala mangulahon na pinangido ni Debata. Alai si Maria, pos do rohana tu Jahowa. Saonari, marhite Bibel diurupi Debata do hita asa marhaporseaon tu Ibana. (Poda 3:5, 6) Pos do rohanta tu Jahowa? Molo songon i, pasupasuon ni Jahowa ma hita, jala on mangurupi hita lam marhaporseaon.

14, 15. (a) Songon dia do Jahowa paposhon roha ni si Maria tingki laho ibana mandapothon si Elisabet? (b) Aha do na boi taboto taringot tu si Maria sian Lukas 1:46-55?

¹⁴ Lam togu ma roha ni si Maria mambege barita ni si Elisabet. Hatop ma si Maria borhat tu Judea, kota pardolokdolohan. Ala diboto ibana, si Elisabet ma na mangantusi pangkilalaanna. Ra, ingkon tolu manang opat ari ma ibana mardalan asa sahat. Dipatuduhon Jahowa do muse tanda laho paposhon roha ni si Maria, dung sahat ibana di jabu ni si Elisabet, tungganeboru ni si Sakarias malim i. Dung dibege si Elisabet tabe ni si Maria, manggunjal ma posoposo di bortianna. Digohi tondi parbadia ma si Elisabet jala didok ma si Maria ’ina ni Tuanki’.  Dipapatar Debata do marhite si Elisabet molo anak ni si Maria, i ma Messias na gabe Tuanna! Dung i, dipuji ma pangoloion ni si Maria ala marhaporseaon ibana. Didok ma, ”Martua ma ho, ala dihaporseai ho, . . . na tinonahon ni Tuhan i tu ho!” (Luk. 1:39-45) Pasauton ni Jahowa do sude janjiNa tu si Maria!

¹⁵ Dung i mangkatai ma si Maria, jala disurat do hatana on di Bibel. (Jaha Lukas 1:46-55.) On ma hata ni si Maria na gumodang dipaboa di Bibel, jala boi ma tatanda ibana sian i. Dipuji ibana do Jahowa alani hak na sumurung na jinalona, gabe ina ni Messias. Togu ni haporseaonna tu Jahowa tarida do tingki didok, na dipatutoru Jahowa do siginjang roha, alai diurupi  do halak na pogos na serep marroha. Tarida ma muse na bagas pangantusion ni si Maria. Adong hirahira 20 hali dienet ibana ayat sian Padan na Robi! *

16, 17. (a) Aha do parange ni si Maria na ringkot tatiru? (b) Aha do na niajarhon ni paralealeon ni si Maria tu si Elisabet?

¹⁶ Nang pe diboto si Maria jala diantusi ibana godang Hata ni Debata, alai dipatuduhon do serep ni roha. Tingki mangalehon hatorangan, ndang diihuthon ibana pangantusionna sandiri, alai dienet ibana do angka ayat ni Bibel. Songon si Maria, Jesus pe serep do rohana. Didok ibana, ”Anggo podangku, ndada sian Ahu sandiri, sian na marsuru Ahu do.” (Joh. 7:16) Alani i, tasungkun ma dirinta, ’Hupatudu do pangargaion tu Bibel? Manang, huihuthon do pangantusionku sandiri tingki patorangkon isi ni Bibel?’

¹⁷ Tading ma si Maria di jabu ni si Elisabet hirahira tolu bulan. On ma tingki na denggan di nasida boi masipatogutoguan. (Luk. 1:56) Na binahen ni si Maria dohot si Elisabet mangajarhon tu hita ringkot ni paralealeon. Molo marsaor hita dohot dongan na mangkaholongi Jahowa, on boi mangurupi hita lam togu di partondion. (Poda 13:20) Ujungna, mulak ma si Maria tu hutana. Alai, songon dia do pangkilalaan ni si Josep molo diboto naung gabegabean si Maria?

18. Aha do na pinaboa ni si Maria tu si Josep, jala songon dia do pangkilalaan ni si Josep?

¹⁸ Ingkon hatop do paboaon ni si Maria tu si Josep naung gabegabean ibana andorang so diboto halak. Olo do ra, sai dipingkiri si Maria pangkilalaan ni si Josep dung diboto naung gabegabean ibana. Alai, dipaboa si Maria do tu si Josep na masa tu ibana. Songon naung tapingkirhon, marsak do si Josep. Nang pe pos roha ni si Josep tu si Maria, alai sian pamingkirion ni jolma, ndang hot si Maria tu si Josep. Ndang dipaboa di Bibel aha na adong di roha ni si Josep. Alai dipaboa tu hita, naeng sirangkononna ma si Maria. Di tingki i, dos do uhum tu na martunangan dohot tu naung marhasohotan. Alai, ndang olo si Josep pailahon si Maria di jolo ni uhum, manang di jolo ni na torop. Alani i, disangkap rohana do laho manirangkon si Maria, ndang pola diboto halak. (Mat. 1:18, 19) Tontu, ndang lomo  roha ni si Maria mangida si Josep marsak. Jala ndang disalahon si Maria si Josep ala so dihaporseai hatana.

19. Songon dia do Jahowa mangurupi si Josep mangulahon na sintong?

¹⁹ Diurupi Jahowa do si Josep mangulahon na sintong. Marhite nipi, dipaboa surusuruan ni Jahowa ma tu si Josep, molo si Maria gabegabean alani tondi parbadia. Hasintongan on paposhon roha ni si Josep! Alani i, dihaporseai ibana ma hata ni si Maria, jala diihuthon ma tudutudu ni Jahowa. Dibuat ma si Maria gabe tungganeboruna, jala rade pagodanggodangkon Anak ni Jahowa.​—Mat. 1:20-24.

20, 21. Aha do sitiruon sian si Maria dohot si Josep tu naung marhasohotan dohot na marsangkap laho marhasohotan?

²⁰ Denggan ma molo halak naung marhasohotan manang na marsangkap laho marhasohotan, maniru si Maria dohot si Josep. Tontu las do roha ni si Josep mangida si Maria na ringgas mulaulaon, jala dohononna do mauliate, ala nunga dipapos surusuruan ni Jahowa rohana laho marhasohotan tu si Maria. Dihilala si Josep do ringkot ni mangasahon Jahowa tingki mamillit na dumenggan di parngoluonna. (Ps. 37:5; Poda 18:13) Pos do rohanta, na tongtong manat jala patuduhon holong si Josep tingki manontuhon na dumenggan tu keluargana.

²¹ Asing ni i, aha dope na boi taparsiajari sian haradeon ni si Maria marhasohotan tu si Josep? Nang pe ndang pintor diparhatutu si Josep hata ni si Maria, alai sabar do si Maria paimahon si Josep manontuhon sipillitonna, ala ibana do na laho ulu di rumatangga. On ma sitiruon sian si Maria na ringkot diihuthon angka borua. Na masa tu si Josep dohot tu si Maria, mangajari nasida asa unang manabunihon aha na masa di parsaripeon.​—Jaha Poda 15:22.

22. Aha do ojahan na mambahen togu parsaripeon ni si Josep dohot si Maria, jala aha do hak na sumurung na dijalo nasida?

²² Boi ma tadok, denggan do ojahan ni parrumatanggaon ni si Maria dohot si Josep sian mulana. Dihaholongi nasida do Jahowa, jala ringkot do di nasida gabe natuatua na dihalomohon Debata. Tutu, godang do pasupasu na laho sijaloonnasida, alai godang do muse paraloan na ro tu nasida. Dilehon do hak na sumurung tu nasida pagodanggodangkon Jesus, na gabe sahalak na tarbarita di tano on.