Adong ma halak Israel na margoar si Elkana. Goar ni istrina si Hanna dohot si Pininna. Umholong do rohana tu si Hanna. Godang do anak ni si Pininna, alai ndang adong anak ni si Hanna. Alani i, sai didok si Pininna do hata na mambahen hansit roha ni si Hanna. Sai laho do si Elkana dohot keluargana ganup taon tu tabernakel di Silo. Di sada tingki, diida si Elkana ma si Hanna tangis. Didok ibana ma, ‘Unang ma tangis ho Hanna. Holong do rohangku tu ho.’

Laho ma si Hanna martangiang sahalakna. Sai tangis do ibana mangido asa diurupi Jahowa. Didok ibana do, ‘Molo dilehon Ho di ahu sada anak ale Jahowa, lehononku ma ibana marhobas tu Ho saleleng ni ngoluna.’

Diida Sintua ni Malim Eli ma ibana sai tangis. Gabe dirimpu ma naung mabuk si Hanna. Alai didok si Hanna ma, ‘Ndang na mabuk ahu Amang. Na marsak do ahu. I do na hutangiangkon tu Jahowa.’ Gabe didok si Eli ma, ‘Anggiat ma dilehon Debata pangidoanmi.’ Ndang marsak be si Hanna. Di bagasan sataon, tubu ma anakna jala dibahen ma goarna si Samuel. Pasti las hian do roha ni si Hanna kan?

Diulahon si Hanna do janjina tu Jahowa. Dung ndang manusu be  si Samuel, diboan si Hanna ma ibana tu tabernakel. Didok si Hanna ma tu si Eli, ‘On ma anakku na hupangido i. Marhobas tu Jahowa ma ibana saleleng ngoluna.’ Ganup taon sai ro do si Elkana dohot si Hanna mangida si Samuel. Diboan do baju rompi na ganjang tu ibana. Dilehon Jahowa do muse tolu anak dohot dua boru nai tu si Hanna.