Asing muse do tantangan na diadopi si Nicolas dohot si Céline. Dipangido kantor cabang Prancis do nasida asa pinda sian huria na sebelumna tu sada huria na baru. Didok nasida, “Mulana semangat do hami, alai dukkon i gabe masihol ma hami tu akka dongannami. Dang akrab dope hami tu akka dongan di hurianami na baru.” a Godang do ra tantangan na ikkon diadopi hamu dung pinda tu huria na baru. Alai, songon dia do carana asa boi hamu toktong marlas ni roha jala semangat? Songon dia do akka dongan di huria na baru i boi mangurupi? Jala songon dia do carana asa boi hamu masipatoguan di huria na baru?

OPAT PRINSIP NI BIBEL NA BOI MANGURUPI HAMU

1. Andalhon ma Jahowa. (Ps. 37:5) Si Kazumi na tinggal di Jepang, pinda sian huriana ala pinda karejo suamina. Hape nungnga 20 taon ibana bergabung di huria na sebelumna. ‘Dipasahat ibana do ngoluna tu Jahowa.’ Songon dia carana? Didok ibana, “Hupaboa do tu Jahowa na merasa kesepian au, holsoan, jala marsak. Tikki martangiang au, sai dipatogu Jahowa do rohakku.”

Songon dia do caramuna asa lam mangandalhon Jahowa? Songon suan-suanan na porlu disiram jala dilehon pupuk, songon i ma tong haporseaotta. Si Nicolas na dipaboa nakkin, dirimangi ibana do sitiruon sian si Abraham, Jesus, dohot si Paulus, na mangalehon godang pengorbanan lao mangulahon lomo ni roha ni Debata. Jala sitiruon i mambahen lam pos rohana, pasti diurupi Jahowa do ibana. Molo taratur hita belajar pribadi, on dang holan mangurupi hita mangadopi perubahan di ngolutta. Alai boi do dapotta  arta na arga na boi tapakke lao patoguhon halak na asing.

2. Unang ma banding-bandingkon huriamuna na sebelumna tu huriamuna na baru. (Pjm. 7:10) Beda hian do budaya na diida si Jules dung pinda sian Benin tu Amerika Serikat. Didok ibana, “Ikkon hupaboa do sude taringot dirikku tu akka halak na baru hutanda.” Ala dang songon i budaya di Benin, gabe mandao ma ibana sian akka dongan di huria na baru. Alai dung lam ditanda ibana akka dongan di huria na baru i, gabe muba ma penilaianna tu nasida. Didok ibana, “Saonari husadari ma, manang didia pe hita tinggal, sarupa do sude halak. Holan cara ni nasida paboahon dirina do na berbeda.” Jadi unang ma tabanding-bandingkon huriatta na sebelumna tu huria na baru. Songon i ma na diulahon sahalak donganta perintis, i ma si Anne-Lise. Didok ibana, “Pinda pe au dang na lao mambanding-bandingkon inganakku na baru tu na sebelumna. Alai lao marsiajar hal na baru do au.”

Akka sintua, unang ma hamu mambanding-bandingkon huria na baru tu huria na sebelumna. Nang pe dang sarupa cara na dipakke akka dongan di huria na baru, dang berarti sala na diulahon nasida. Dumenggan do jolo diboto hamu taringot situasi di daerah na baru sebelum dilehon hamu saran. (Pjm. 3:​1, 7b) Jala dumenggan do dibahen hamu sitiruon tu akka dongan disi sian apala dipaksahon hamu pandapotmuna tu nasida.—2 Kor. 1:24.

3. Aktif ma hamu di huria na baru. (Plp. 1:27) Tikki baru pinda hamu, godang do habis tikki dohot gogomuna. Alai denggan do molo pittor ro hamu marpungu secara fisik. Massai penting do on. Alana molo dang hea diida akka dongan na disi hamu, boha ma cara ni nasida mangurupi hamu? Si Lucinda, na pinda tu kota na balga di Afrika Selatan dohot dua boruna mandok, “Dijujui akka dongan do asa aktif au di huria na baru, rap marbarita dohot nasida, jala mangalehon komentar. Ditawarhon hami do muse jabunami gabe inganan parpunguan lao marbarita.”

Molo “masiurupan” hamu dohot akka dongan di huria na baru, boi do i patoguhon hamu dohot nasida. Si Anne-Lise na dipaboa nakkin, dijujui akka sintua do ibana asa rap marbarita dohot sude dongan di huria na baru. Didok ibana, “Pittor huattusi ma, on do cara na dumenggan asa boi tahilala na gabe bagian sian huria i hita.” Asing ni i, molo dohot hita paiasson dohot padenggatton Bale Harajaon, on patuduhon tu akka dongan na disi, na dianggap hamu do dirimuna gabe bagian sian huria i. Molo aktif hamu, gabe nyaman ma akka dongan na disi. Jala boi ma dihilala hamu naung gabe bagian sian nasida do hamu.

4. Berupaya ma mardongan dohot halak na baru ditanda. (2 Kor. 6:​11-13) Molo diboto halak na parduli do hamu tu nasida, gabe mura ma nasida marale-ale dohot hamu. Jadi, bahen ma tikkimuna lao makkata-hatai dohot akka dongan sebelum jala dung sae parpunguan. Berupaya ma  mangingot goar ni nasida. Molo diingot hamu goar ni nasida, ramah hamu, jala mura hamu diajak makkata-hatai, gabe lomo ma roha ni nasida naeng mananda hamu jala marale-ale dohot hamu.

Unang pola holsoan hamu mamikkiri, dijalo akka dongan na disi do hamu manang na daong. Gariada patudu ma tu nasida halak na songon dia do hamu sasittongna. Tiru ma si Lucinda. Didok ibana, “Saonari, nga adong be ale-alenami ala berinisiatif do hami mangundang akka dongan tu jabunami.”

“IKKON BURJU DO HAMU MANJALO DONGANMUNA NA ASING”

Olo do mabiar akka halak na baru pinda tu Bale Harajaon. Alana dang ditanda nasida dope akka dongan disi. Molo adong na pinda tu huriamuna, songon dia ma hamu boi mangurupi nasida? Didok Apostel Paulus do, “Songon Kristus na burju manjalo hamu, ikkon burju do hamu manjalo donganmuna na asing.” (Rom 15:7) Akka sintua boi do maniru Kristus lao mangurupi akka na baru ro asa merasa disambut. (Ida ma kotak “ Asa Lancar Perpindahanmuna”.) Alai sasittongna sude na di huria, termasuk dakdanak, boi do mangurupi akka na baru pinda asa merasa nyaman.

Menyambut akka dongan na baru pinda, termasuk do mangundang nasida tu jabutta jala mangalehon bantuan. Contohna, dilehon sahalak donganta borua do tikkina lao mangurupi sahalak dongan na baru pinda, jala patorakkon taringot akka transportasi di daerah ni nasida. Terkesan do donganta na baru pinda i, jala gabe nyaman ma ibana di huria na baru.

KESEMPATAN LAO MAMBAHEN KEMAJUAN

Piga-piga hali do belalang ganti kulit andorang so habang. Dos songon i ma tikki pinda hita tu huria na baru. Ikkon tabolokkon do sude holso ni roha na mangabbati hita mangalehon na terbaik tu Jahowa. Si Nicolas dohot si Céline mandok, “Tikki pinda hami tu huria na baru, disi ma hami dilatik. Ikkon menyesuaihon diri do hami tu akka  halak na baru ditanda dohot tu inganan na baru. Hasilna gabe boi ma dipatudu hami akka sifat na baru.” Si Jean-Charles, na dipaboa di awal nakkin, paboahon manfaat na dapot ni ibana ala mangulahon i. Didok ibana, “Di hurianami na baru, gabe lam semangat ma akka gellengnami jala lam jonok tu Jahowa. Dung piga-piga bulan, dapot ni borunami ma bagian di parpunguan parsitongaan ni minggu. Molo anaknami, nga gabe penyiar na so tardidi be ibana.”

Alai boha ma molo alani situasi, gabe dang boi hamu pinda tu inganan na makkaporluhon parbarita? Nang pe nga leleng hamu di sada huria, alai boi do tong diulahon hamu akka saran di artikel on. Andalhon ma Jahowa jala aktif ma di huriamuna. Songon dia carana? Bahen ma rencana lao marbarita dohot akka dongan. Berupaya ma mardongan dohot akka na baru ditanda hamu, jala patogu ma parale-aleonmuna dohot akka dongan naung ditanda hamu. Berinisiatif ma hamu mangurupi akka na baru pinda tu huriamuna manang tu akka na makkaporluhon bantuan. Holong do tanda ni halak Kristen na sittong. Molo dipatudu hamu holong jala diurupi hamu akka dongan, lam jonok ma hamu tu Jahowa. (Joh. 13:35) Pos ma rohamuna “lomo do roha ni Debata tu akka pelean sisongon i”.—Heb. 13:16.

Godang do tantangan naung diadopi akka donganta na pinda tu huria na baru. Alai, boi do nasida marhasil jala toktong marlas ni roha. Hamu pe boi do songon i. Si Anne-Lise mandok, “Dung pinda tu huria na baru, gabe marsiajar do au asa mambukka rohakku tu akka dongan na asing.” Tikki pinda si Kazumi, dihilala ibana do bantuan ni Jahowa marhite cara na so hea dope dibayakkon ibana. Molo si Jules mandok, “Ala saonari nga adong be ale-alekku di huria na baru, gabe nyaman ma huhilala. Saonari nga kompak be au dohot akka dongan di huriakkon. Pasti borat do huhilala maninggalhon nasida.”