SALELENG martaon-taon, piga-piga peneliti mandok molo si Beltsasar na dipaboa di bukku Daniel i dang hea adong. (Dan. 5:1) Didok nasida pe songon i, ala dang adong bukti arkeologi na patuduhon molo ibana hea mangolu. Alai muba do pandapot i taon 1854. Boasa?

Di taon i, sahalak pakar sian Inggris na margoar si J. G. Taylor mambahen penelitian tu puing-puing di kota Ur najolo, na saonari adong di Irak bagian selatan. Disi, adong menara na balga, jala dapotna ma piga-piga tabung na sian tano liat. Ganjang ni ganup tabung i 10 cm, jala adong surat na diukir mamakke pakku. Sada sian surat na di tabung i, paboahon taringot manangiakkon asa ganjang umur ni Raja Babilon i ma si Nabonidus dohot anakna siakkangan i ma, si Beltsasar. Penemuan on patuduhon, na hea do adong si Beltsasar.

Alai di Bibel, dipaboa do molo si Beltsasar i sahalak raja. Nang pe songon i, adong dope na so setuju tusi. Umpamana, hira-hira taon 1875, sahalak peneliti sian Inggris i ma si William Talbot mandok, “Bel-sar-ussur [si Beltsasar] mamaretta di tikki na sarupa dohot bapakna si Nabonidus. Alai dang boi dope takkas dihaporseai bukti i.”

Sae ma persoalan i tikki dipaboa muse di tabung tano liat i molo bapak ni si Beltsasar, i ma Raja Nabonidus na lao sian Babilon saleleng martaon-taon. Aha ma na masa dung lao ibana? Encyclopaedia Britannica mandok, “Tikki lao si Nabonidus tu pembuangan, dilehon do tahta harajaonna dohot tentara na godang tu si Beltsasar.” Jadi boi ma didok, si Beltsasar ma na marhuaso di Babilon tikki i. Sahalak arkeolog dohot ahli bahasa na margoar si Alan Millard paboahon, pas do na didok “bukku Daniel molo si Beltsasar i sahalak ‘raja’”.

Di naposo ni Debata, boi do dihaporseai bukti na adong di bukku Daniel. On patuduhon, Bibel i disurat marhite panogu-noguon ni tondi parbadia ni Debata.​—2 Tim. 3:16.