Injil Lukas paboahon tu hita taringot Jesus na mambungka gulungan ni buku Jesaya jala dijaha sian i, dung i digulung ma muse. Di panutup ni Injil na sinurat ni si Johannes, disurat ibana ndang boi sude disurat angka na masa na niulahon ni Jesus.​—Lukas 4:16-20; Johannes 20:30; 21:25.

Sian dia do gulungan ni buku on dibahen? Dibahen sian kulit, perkamen manang sian papirus na dipadomudomu dung i digulung. Adong do muse na digulung tu hau na songon tungkot jala suratna ndang tarida ala digulung tu bagasan. Suratna dibahen gabe pigapiga bagian na disurat sian ginjang tu toru di bagasan sada gulungan. Molo ganjang do gulungan i, ingkon adong ma dua hau di ganup ujungna. Alani i, boi ma tangan siamun mambungka jala tangan hambirang manutup sahat tu na dapot ayat na diluluanna.

Anchor Bible Dictionary mandok, ”Adong do deba gulungan na ganjangna hirahira 10 meter, jala boi siat sada buku di bagasan. Alai, gabe gelleng dung digulung. Umpamana Injil Lukas, ganjangna hirahira 9,5 meter. Jotjot do ditiptip bagian parginjang dohot partoru, dung i dipalemes mamangke batu apung jala diwarnai.

Sian mulai adong angka malim di Israel, holan sada do na dipillit gabe sintua ni malim. Jala saleleng ngoluna ma ibana mangulahon i. (4 Musa 35:25) Si Aron ma sintua ni malim na parjolo. Dungkon mate ibana, anak siangkanganna ma manggantihon ibana. (2 Musa 29:9) Godang do pinompar ni si Aron gabe malim, alai ndang sude na gabe sintua ni malim.

Tingki halak Israel diparhatoban bangso na asing, lomo ni bangso na mamparhatoban i ma mamillit ise na gabe sintua ni malim. Somalna, halak na dipillit gabe sintua ni malim ingkon sian keluarga na sangap, jala gumodang sian pinompar ni si Aron. Alani i, hata ”sintua ni malim” patuduhon halak na dipasangap di hamalimon, olo do ra nasida halak na manguluhon 24 punguan ni malim; dohot ma i sintua ni malim na dipaso songon si Hannas.​—1 Kronika 24:1-19; Mateus 2:4; Markus 8:31; Ulaon ni Apostel 4:6.