PARSIAJARAN 33
ENDE 130 Rade Manalpuhon Hasalaan
Tiru ma Cara Pandang ni Jahowa tu Halak na Mangulahon Dosa na Balga
“Molo adong na mardosa, adong do na mangurupi hita.”—1 JOH. 2:1.
NA LAO DIBAHAS
Parsiajaran na rikkot na boi tadapot sian cara ni Jahowa pasaehon masalah di huria Korint.
1. Keputusan na songon dia do na mambahen las roha ni Jahowa? Jala boasa songon i?
TIKKI ditoppa Jahowa jolma, dilehon Ibana do tu hita kebebasan lao mamillit manang mambahen keputusan sandiri. Ganup ari do hita mambahen keputusan. Alai keputusan na paling penting, i ma mangalehon ngolutta tu Jahowa jala manomba Ibana rap dohot akka donganta di liat portibi on. Lomo do roha ni Jahowa asa sude jolma mangulahon i. Boasa? Alana massai holong do rohana tu akka jolma, jala lomo do rohana asa marlas ni roha nasida di ngoluna. Asing ni i, lomo do roha ni Jahowa asa boi jonok hubungatta tu Ibana jala boi mangolu salelengna.—5 Mus. 30:19, 20; Gal. 6:7, 8.
2. Aha do na diharappon Jahowa sian halak naung dipakaluar sian huria? (1 Johannes 2:1)
2 Alai dang dipaksa Jahowa manang ise pe manomba Ibana. Dipaloas do ganup halak mamutusson aha na lao ulahononna. (1 Kor. 5:13) Molo adong sasahalak na tardidi mangulahon dosa na balga, aha do na ikkon diulahon akka sintua? Molo dang bertobat halak na marsala i, ikkon dipakaluar do ibana sian huria. a Alai nang pe songon i, lomo do roha ni Jahowa asa bertobat ibana jala jonok muse hubunganna tu Jahowa. Alana i do dilehon Jahowa tobusan, asa boi Ibana mengampuni halak na bertobat. (Jaha 1 Johannes 2:1.) Jadi sian on taboto ma, Debata parholong do Jahowa. Dijujui Ibana do akka halak na hea mangulahon dosa na balga asa bertobat.—Sak. 1:3; Rom 2:4; Jak. 4:8.
3. Aha do na lao tabahas di artikel on?
3 Lomo do roha ni Jahowa asa tatiru cara pandangna tu halak na mangulahon dosa na balga. Di artikel on lao tabahas ma, (1) aha do na didok si Paulus tu huria Korint tikki adong na mangulahon dosa na balga, (2) aha do na dipaboa si Paulus tu huria i tikki bertobat halak na marsala i, jala (3) songon dia do perasaan ni Jahowa tu halak na mangulahon dosa na balga.
TIKKI ADONG HALAK DI HURIA NA MANGULAHON DOSA NA BALGA
4. Aha do na masa di huria Korint? (1 Korint 5:1, 2)
4 Jaha 1 Korint 5:1, 2. Di pardalanan utusan injil ni si Paulus na patoluhon, dibege si Paulus ma barita na so denggan na masa di huria Korint. Adong sahalak bawa di huria i na mangulahon seks dohot omak tirina. “Haru di tonga-tonga ni akka bangso”, dang hea masa sisongon i. Jadi pasti tarsonggot do akka halak mambege i. Alai akka dongan di huria marpikkir dang pola masalah molo toktong bawa i di huria. Olo do piga-piga sian nasida marpikkir molo dibahen nasida songon i, na maniru asi ni roha ni Jahowa do nasida disi. Alai dang lomo roha ni Jahowa molo adong sahalak pardosa di tonga-tonga ni naposona. Alana, boi do gabe tartuktuk akka na so sisomba Jahowa mangida pangalaho ni bawa i. Jala molo toktong ibana di huria, olo do gabe terpengaruh akka dongan na asing jala maniru pangalahona. Attong, aha do na didok si Paulus tu akka dongan di huria i?
5. Aha do na didok si Paulus tu huria Korint? Jala aha do maksudna? (1 Korint 5:13) (Ida gambar.)
5 Jaha 1 Korint 5:13. Disuru Jahowa do si Paulus mambahen surat tu huria i lao paboahon na ikkon dipakaluar do bawa i sian huria. Didok si Paulus, “Unang mardongan be hamu tu ibana.” Jala didok ibana do muse, “Gari mangan pe, dang boi hamu rap dohot halak sisongon i.” (1 Kor. 5:11) Aha do maksudna? Molo rap mangan hita dohot sasahalak, pasti makkata-hatai do hita dohot ibana. Jadi takkas do dipaboa si Paulus, dang boi be akka dongan di huria i mardongan dohot bawa i. Molo dibahen nasida songon i, boi do i melindungi huria sian pengaruh ni bawa i. (1 Kor. 5:5-7) Jala olo do ra gabe disadari bawa i, nungnga haccit roha ni Jahowa dibahen ibana. Olo do gabe disolsoli ibana kesalahanna jala bertekad lao bertobat.
Ditogu-togu Jahowa do si Paulus asa mambahen surat tu huria Korint lao paboahon ikkon dipakaluar do bawa na so bertobat sian huria i (Ida paragraf 5)
6. Aha do na diulahon akka dongan di huria Korint dung manjalo surat ni si Paulus? Jala aha do na diulahon bawa i?
6 Dung dikirim si Paulus suratna tu huria na di Korint, sukkun-sukkun do roha ni si Paulus, songon dia do tanggapan ni akka dongan di huria i. Ujungna dipaboa si Titus ma tu ibana barita na denggan. (2 Kor. 7:6, 7) Olo do huria i menerappon petunjuk na dilehon si Paulus, jala dipakaluar nasida do bawa i sian huria. Jala dang leleng dung dikirim si Paulus suratna i, nungnga bertobat be bawa i. Olo do ibana manguba pangalahona, jala diihutton ibana do muse paretta ni Jahowa. (2 Kor. 7:8-11) Attong, aha do muse na dipaboa si Paulus tu huria i?
AHA DO NA DIULAHON HURIA I TU HALAK NA BERTOBAT?
7. Aha do na diulahon bawa i dung dipakaluar ibana sian huria? (2 Korint 2:5-8)
7 Jaha 2 Korint 2:5-8. Didok si Paulus, “Nungnga godang sian hamu na pasingotton halak na mardosa i. Alani i, nungnga sae be i.” Aha do maksudna? Artina, dung dipakaluar bawa i sian huria, disadari ibana ma na porlu do ibana bertobat. Jadi ala nungnga bertobat ibana, dang porlu be huria i torus “pasingotton” manang mamissang ibana.—Heb. 12:11.
8. Aha do muse na didok si Paulus tu huria Korint?
8 Didok si Paulus ma tu huria i, “Salpuhon hamu ma dosana i, jala patogu hamu ma rohana.” Dung i, didok si Paulus do muse, “Papos hamu ma rohana na holong do rohamuna tu ibana.” Ala nungnga bertobat bawa i, didok si Paulus do tu akka sintua asa dijalo muse bawa i di huria, disalpuhon dosana, jala dipatogu rohana. Lomo do roha ni si Paulus asa dipatudu akka sintua marhite hata dohot tindakan ni nasida, naung diampuni nasida do bawa i, jala na holong do roha ni nasida tu bawa i. Hasilna gabe pos ma roha ni bawa na bertobat i, na las do roha ni akka dongan di huria manjalo ibana muse.
9. Boasa maol di piga-piga halak memaappon halak na bertobat?
9 Alai adong do piga-piga halak na gabe jut rohana dung mambege na dijalo muse bawa i di huria. Boasa boi tadok songon i? Adong do ra na muruk ala bawa i do na mambahen masalah di huria. Adong do ra muse na haccit rohana manang maila alani tindakan ni bawa i. Asing ni i, adong do na merasa nungnga marsitutu nasida saleleng on mangihutton paretta ni Debata. Jadi, dang adil dihilala nasida molo dijalo muse halak naung mangulahon dosa na balga. (Bandingkon tu Lukas 15:28-30.) Alai boasa ikkon dipatudu nasida holong tu halak na bertobat i?
10-11. Aha ma akibatna molo dang olo akka sintua memaappon halak na bertobat i?
10 Bayakkon ma aha na terjadi molo dang diloas akka sintua halak na bertobat i mulak tu huria, manang songon dia perasaanna molo dang dijalo akka dongan ibana. Bibel mandok, boi do gabe “mandele” ibana alani lungun ni rohana. Boi do ibana merasa dang layak be ibana manomba Jahowa jala dang adong lapatanna ibana bertobat.
11 Aha do muse akibatna molo dang olo akka dongan manjalo bawa i? Gabe sega ma hubungan ni nasida tu Jahowa. Alana tindakan ni nasida i patuduhon na so ditiru nasida Jahowa, Debata na rade mengampuni halak na bertobat. Sasittongna, na maniru Sibolis do nasida. Alana, kejam do Sibolis jala dang patuduhon asi ni roha. Jadi molo sai songon i sikap ni nasida, hira na dipakke Sibolis do nasida lao mangabbati akka halak asa boi manomba Jahowa.—2 Kor. 2:10, 11; Eps. 4:27.
12. Aha do na ikkon diulahon akka dongan na di Korint asa boi nasida maniru Jahowa?
12 Jadi aha do na ikkon diulahon akka dongan na di Korint asa boi nasida maniru Jahowa, dang maniru Sibolis? Ikkon olo do nasida memaappon halak na bertobat i, songon na diulahon Jahowa. Parrohahon ma na didok Bibel taringot asi ni roha ni Jahowa. Si Daud mandok, “Ale Jahowa, na burju do Ho jala rade manalpuhon hasalaan.” (Ps. 86:5) Disurat si Mika do, ‘Dang adong Debata na songon Ho, ai disalpuhon Ho do hasalaan jala disesa Ho do dosa ni nasida.’ (Mik. 7:18) Jala didok si Jesaya, “Lok ma ditadikkon parjahat akka dalanna na jahat. Jala unang be dipikkirhon halak na jahat akka ulaonna na jahat. Lok ma mulak ibana tu Jahowa, na marasi ni roha tu ibana. Mulak ma ibana tu Debatanta, ai rade do Ibana manesa sude dosana.”—Jes. 55:7.
13. Boasa dang porlu dipaleleng-leleng akka sintua bawa i asa mulak tu huria? (Ida kotak “ Andigan do Bawa na di Korint i Dijalo Muse di Huria?”)
13 Asa boi maniru Jahowa, ikkon dijalo akka dongan na di Korint i do halak na bertobat. Jala ikkon dipatudu nasida do, na holong do roha ni nasida tu ibana. Didok si Paulus, molo diampuni nasida halak na bertobat i, berarti na ‘dioloi nasida do sude hata’ ni si Paulus i. (2 Kor. 2:9) Memang, sanga do dipakaluar halak na so bertobat i sian huria Korint. Alai dung piga-piga bulan, bertobat do bawa i. Jadi sebenarna dang porlu dipaleleng-leleng akka sintua ibana asa mulak tu huria.
MANIRU JAHOWA NA ADIL JALA PARASI ROHA
14-15. Aha ma na boi taparsiajari sian na masa di huria Korint? (2 Petrus 3:9) (Ida gambar.)
14 Adong do tujuanna boasa akka na masa di huria Korint i disurat di Bibel. Disurat do i lao “mangajari” hita. (Rom 15:4) Sian on gabe taboto ma dang diloas Jahowa akka halak na mangulahon dosa na balga jala na so olo bertobat toktong di huria. Adong do piga-piga halak na marpikkir ala Debata parasi roha do Jahowa i, pasti diloas Ibana do akka halak na so bertobat toktong di huria. Alai sasittongna dang songon i cara ni Jahowa patuduhon asi ni roha. Nang pe parasi roha Jahowa, dang gabe setuju Ibana molo taulahon na sala. Alana dang muba standar ni Jahowa taringot na sittong dohot na sala. (Jud. 4) Molo diloas Jahowa halak na so bertobat toktong di huria, justru patuduhon na so marasi ni roha do Ibana. Alana boi do halak na so bertobat i mangalehon pengaruh na so denggan tu huria.—Poda 13:20; 1 Kor. 15:33.
15 Alai sian on pe marsiajar do hita, dang lomo roha ni Jahowa diripasson manang ise pe. Lomo do roha ni Jahowa sude ma nian jolma malua. Dipatudu Ibana do asi ni rohana tu akka halak na olo muba jala na rade lao manomba Ibana muse. (Hes. 33:11; jaha 2 Petrus 3:9.) Jadi tikki bertobat bawa na di Korint i, disuru Jahowa do asa olo akka dongan di huria memaappon jala manjalo ibana.
Molo tapatudu holong dohot haburjuon tu halak na dijalo muse tu huria, na maniru holong dohot asi ni roha ni Jahowa do hita disi (Ida paragraf 14-15)
16. Boha do perasaanmuna dung mamboto cara ni Jahowa pasaehon masalah di huria Korint?
16 Sian na masa di huria Korint, boi ma taboto Debata parholong do Jahowa i, na sittong, jala na adil. (Ps. 33:5) Alani i, pasti gabe lam taronjar ma rohatta lao mamuji Jahowa. Taingot ma, sude do hita mardosa jala porlu diampuni Jahowa. Jadi pasti mandok mauliate do hita ala dipatudu Ibana asi ni rohana na massai balga. Asing ni i, mandok mauliate do hita ala diparade Ibana tobusan asa gabe dalan lao manesa dosatta. Pasti tarapul do rohatta jala dipatogu ala mamboto na massai holong do roha ni Jahowa tu akka naposona, jala lomo do rohana asa marlas ni roha hita.
17. Aha do na lao tabahas di artikel na mangihut?
17 Molo adong halak na mangulahon dosa na balga, songon dia ma cara ni akka sintua maniru holong ni Jahowa jala mangurupi ibana asa bertobat? Ikkon songon dia do tanggapanta molo dibahen akka sintua keputusan lao pakaluarhon sasahalak sian huria, manang manjalo ibana muse tu huria? Lao tabahas ma sukkun-sukkun i di artikel na mangihut.
ENDE 109 Patudu ma Holong sian Ias ni Roha
a Didok si Paulus do di 1 Korint 5:13, ikkon dipakaluar do halak na so bertobat sian huria. Jadi mulai saonari, dang tapakke be istilah halak na dipecat. Alai tapakke ma istilah halak na dipakaluar sian huria.
