1. Boha do dibayakkon hamu Jahowa i?

 HEA DO dibayakkon hamu songon dia Jahowa i? Molo martangiang hamu tu Ibana, boha do dibayakkon hamu Jahowa i? Memang dang boi taida Jahowa. Alai dipaboa Bibel do gombaran taringot Jahowa. Didok do Jahowa i dos “songon mataniari dohot perisai”, jala “songon api na pasudahon”. (Ps. 84:11; Heb. 12:29) Di parnidaan ni si Hesekiel, dipatudos do ibana songon batu safir, songon mas na marcampur perak na marhillong, jala songon pelangi. (Hes. 1:​26-28) Ala songon i digombarhon Jahowa, olo do gabe longang rohatta manang gabe dang tama tahilala maradoppon Ibana.

2. Aha do na olo mambahen maol hita jonok tu Jahowa?

² Ala dang boi taida Jahowa manang ala godang hian sitaononta, olo do gabe maol hita porsea na dihaholongi Jahowa hita. Adong muse sian hita na so hea dihaholongi bapakna. Alani i gabe maol ma pos roha ni nasida na dihaholongi Bapak Jahowa do nasida. Alai diattusi Jahowa do boasa songon i perasaanta. Jala diboto Jahowa do ala songon i perasaanta, gabe maol ma hita jonok tu Ibana. Alani i marhite Bibel dipaboa Ibana do Debata na songon dia Ibana sasittongna.

3. Boasa ikkon takkas taparsiajari taringot holong ni Jahowa?

³ Didok di Bibel, “Holong do Jahowa.” (1 Joh. 4:8) Lapatanna, holong do na mangonjar roha ni Jahowa lao mangulahon manang aha pe. Burju do Jahowa. Dipatudu Ibana do tong holong ni rohana i tu halak na so manomba Ibana. (Mat. 5:​44, 45) Di artikel on, lam takkas ma taparsiajari taringot Jahowa dohot holongna. Lam tatanda Jahowa, gabe lam holong ma rohatta tu Ibana.

 HOLONG HIAN DO JAHOWA TU HAMU

4. Boha do perasaanmuna ala mamboto na holong do roha ni Jahowa tu hamu? (Ida gambar.)

⁴ Bibel mandok, “Parholong do Jahowa.” (Jak. 5:11) Di Bibel dipatudos Jahowa do dirina songon sahalak ina na parholong. (Jes. 66:​12, 13) Bayakkon ma sahalak ina na mangurus gellengna. Dioppa ibana do gellengna, diabing-abing, jala lambok ibana makkatai tu gellengna i. Tikki tangis gellengna manang haccitan, berupaya do ibana mambahen las roha ni gellengna i. Dos songon i ma Jahowa tu hita. Tikki marsak hita, pos ma rohatta tu holong ni Jahowa. Panurat psalmen mandok, “Tikki marsak situtu rohakku, diapuli Ho do au. Jala dibahen Ho do las rohakku.”—Ps. 94:19.

5. Aha do buktina na setia do Jahowa? Jala dung mamboto on, aha do pengaruhna tu hamu?

⁵ Setia do Jahowa. (Ps. 103:8) Sai holong do rohana tu hita nang pe hea taulahon na sala. Contohna songon halak Israel najolo. Sai jotjot do dibahen nasida haccit roha ni Jahowa. Alai dung disolsoli nasida hasalaanna i, dipapos Jahowa do roha ni nasida na holong dope rohana tu nasida. Didok Ibana do, “Arga do ho di Au, sangap do ho, jala holong do rohakku tu ho.” (Jes. 43:​4, 5) Sahat tu saonari, dang muba holong ni Jahowa. Pos ma rohatta, nang pe hea taulahon dosa na balga, dang tinggalhonon ni Jahowa hita. Molo olo hita bertobat jala mulak tu Ibana, boi do tahilala na holong dope rohana tu hita. Marjanji do Jahowa, ‘Rade do Au manesa sude dosamuna.’ (Jes. 55:7) Ala olo Jahowa manesa dosatta, gabe “margogo” ma muse hita.—Ul. 3:19.

6. Aha do na boi taparsiajari taringot Jahowa sian Sakaria 2:8?

⁶ Jaha Sakaria 2:8. Dipatudos Jahowa do hita songon anak ni matana. Bagian na sensitif jala na massai penting do mata. Molo lungun rohatta, Jahowa pe lungun do rohana. Hira na didok Jahowa ma songon on, ‘Manang ise na mambahen na jahat tu hamu naposokku, hira na mambahen na jahat do tong i tu Au!’ Ala massai holong roha ni Jahowa tu hita, diattusi Ibana do songon dia perasaanta. Jala lomo do rohana manjaga hita. Ala taboto songon i balga ni holong ni Jahowa tu hita, gabe pos ma rohatta mandok di tangiangta, “Jaga ma au songon na manjaga anak ni matamu.”—Ps. 17:8.

7. Boasa ikkon tapapos rohatta na holong roha ni Jahowa tu hita?

 ⁷ Lomo do roha ni Jahowa asa porsea hita na holong do rohana tu hita. Alai diboto Ibana do aha na mambahen hita ragu tu holongna i. Olo do ra alani sitaononta na hea taadopi, manang alani sitaononta saonari. Alani i aha do na boi mangurupi hita asa porsea na holong do roha ni Jahowa tu hita? Saonari tabahas ma songon dia Jahowa patuduhon holongna tu Jesus, tu akka halak na miniahan, dohot tu hita sude.

SONGON DIA JAHOWA PATUDUHON HOLONGNA

8. Boasa pos roha ni Jesus na holong roha ni Bapakna tu ibana?

⁸ Nungnga marmiliar taon Jesus rap dohot Bapakna di surgo. Alani i hubungan ni nasida ma na ulleleng jala ussolhot sian hubungan ni manang ise pe. Molo tajaha Mateus 17:​5, takkas do dipaboa Jahowa sadia balga holong ni rohana tu Jesus. Sasittongna boi hian do holan didok Jahowa, ‘Las situtu do rohakku mangida Jesus.’ Alai lomo do roha ni Jahowa asa taboto na massai holong do rohana tu Jesus. Jadi didok Ibana do, “On do Anakku, haholongakki.” Bangga hian do Jahowa tu Jesus, tarlumobi ala rade Jesus mangalehon ngoluna gabe tobusan. (Eps. 1:7) Jala Jesus sandiri pe, pos situtu do rohana na massai holong do Bapakna tu ibana. Buktina mulak-ulak do didokkon Jesus na massai holong do Bapakna tu ibana.—Joh. 3:35; 10:17; 17:24.

9. Songon dia do Rom 5:5 manggombarhon holong ni Debata tu akka halak na miniahan?

⁹ Dipaboa Debata do tong na holong rohana tu akka halak na miniahan. (Jaha Rom 5:​5, surat na di toru) Didok di ayat i, “Nungnga diusehon Debata holong ni rohana i tu hita.” Di sada kamus ni Bibel, hata “diusehon” dipatudos do i songon “aek na doras”. Jadi massai balga do holong ni roha ni Debata tu akka halak na miniahan. Diboto akka halak na miniahan do tong, na holong roha ni Jahowa tu nasida. (Jud. 1) Misalna, dipaboa Apostel Johannes do di suratna, “Ida hamu ma balga ni holong ni Ama i tu hita, digoari do hita anak ni Debata!” (1 Joh. 3:1) Alai holan tu akka halak na miniahan do holong roha ni Debata? Daong. Holong do tong roha ni Jahowa tu hita sude.

10. Aha do buktina na massai balga holong ni Jahowa tu hamu?

¹⁰ Aha do buktina na massai balga holong ni Jahowa tu hita? Tobusan. Marhite tobusan, dipatudu Jahowa do na massai holong rohana tu hita sian manang ise pe! (Joh. 3:16; Rom 5:8) Rela do Jahowa mangalehon Anakna mate lao manobus dosatta, asa boi hita gabe ale-alena. (1 Joh. 4:10) Molo jotjot tarimangi balga ni pengorbanan na dibahen Jahowa dohot Jesus tu hita, gabe taattusi ma na massai balga do holong ni nasida tu hita ganup marsada-sada. (Gal. 2:20) Tobusan i dang holan patuduhon Debata na adil do Jahowa. Alai memang ala na holong do rohana tu hita. Rela do Jahowa mangida Anak hasianna gabe susa jala mate lao humokkop hita.

11. Aha do na boi taparsiajari sian Jeremia 31:3?

¹¹ Songon naung tabahas nakkin, dipaboa Jahowa do na massai holong rohana tu hita. (Jaha Jeremia 31:3.) Ala holong rohana tu hita, dipillit Ibana do hita asa gabe naposona. (Bandingkon tu 5 Musa 7:​7, 8.) Jadi dang adong na boi manirang hita sian holong ni Debata. (Rom 8:​38, 39) Boha do perasaanmuna dung mamboto on? Jaha ma Psalmen 23. Ida ma songon dia perasaan ni si Daud ala mamboto na holong do roha ni Jahowa tu ibana. Jala rimangi ma aha do pengaruh ni hata ni si Daud i tu hamu.

 SONGON DIA PERASAANMUNA ALA MAMBOTO HOLONG NI JAHOWA

12. Aha do na boi taboto sian Psalmen 23?

¹² Jaha Psalmen 23:​1-6. Di Psalmen 23, dipaboa si Daud do na pos rohana dihaholongi Jahowa do ibana. Dipaboa si Daud do sadia jonok hubunganna dohot Jahowa. Didok si Daud do Jahowa i Parmahanna. Ala ditogu-togu Jahowa si Daud, gabe aman ma dihilala ibana. Jala pos situtu do rohana tu Jahowa. Pos do roha ni si Daud, sai dihaholongi Jahowa do ibana saleleng ni ngoluna. Boasa boi didok si Daud songon i?

13. Boasa pos roha ni si Daud na parduli do Jahowa tu ibana?

¹³ “Dang hurangan manang aha au.” Dihilala si Daud do na parduli Jahowa tu ibana. Alana sai dilehon Jahowa do sude na dihaporluhon ibana. Las do rohana marale-ale tu Jahowa. Alani i ma pos do rohana manang aha pe na lao masa tu ibana, pasti dilehon Jahowa do sude na dihaporluhon ibana. Ala porsea si Daud na dihaholongi jala dijaga Jahowa do ibana, gabe dang holsoan be ibana jala toktong marlas ni roha.—Ps. 16:11.

14. Aha do buktina na parduli Jahowa tu hita?

¹⁴ Sai parduli do Jahowa tu hita, tarlumobi tikki marsitaonon hita. On ma na dihilala donganta si Klara. a Nungnga 20 taon lobi ibana karejo di Betel. Godang do masalah di keluargana. Marsahit stroke do bapakna, dipecat do adekna sian huria, susa do keluargana di parhepengon, jala disita bank do jabu ni nasida. Marsak do si Klara ala dang boi ibana mangurupi keluargana. Alai songon dia do Jahowa patuduhon holongna tu nasida? Didok si Klara ma, “Diparrohahon Jahowa do keluargakku.  Sai dilehon Jahowa do akka na porlu di nasida ganup ari. Gariada jotjot do dilehon Ibana lobi sian na dihaporluhon hami. Sai hurimangi do songon dia Jahowa mangurupi hami. Jala dang boi tarhalupahon au holong ni rohana i. On mangurupi au asa toktong marlas ni roha manomba Jahowa tikki ro muse masalah na asing di ngolukku.”

15. Boasa gabe dipatogu muse si Daud? (Ida gambar.)

¹⁵ “Dipatogu Ibana do au muse.” Sipata marsak do si Daud alani godang ni sitaononna. (Ps. 18:​4-6) Alai alani holong ni Jahowa, gabe dipatogu do muse ibana. Diboan Jahowa do ibana tu “inganan parmahanan na lomak”, jala ditogu-togu do ibana maradi tu “inganan na godang aekna”. Gabe margogo ma muse si Daud jala toktong marlas ni roha manomba Jahowa.—Ps. 18:​28-32.

16. Songon dia do holong ni Jahowa patoguhon hamu?

¹⁶ Dos songon si Daud ma hita saonari. Alani holong ni Jahowa, gabe boi ma martahan hita mangadopi sitaononta. (And. 3:22; Kol. 1:11) Taida ma pengalaman ni donganta si Rahel. Hancur hian do perasaanna, alana tikki masa pandemi COVID-19, ditinggalhon suamina do ibana. Jala dang Saksi Jahowa be suamina. Songon dia do Jahowa mangurupi si Rahel? Didok ibana, “Sai dipatudu Jahowa do holongna tu au, jala boi do huhilala holongna i. Dilehon Ibana do akka dongan na burju. Rade do nasida mangalehon tikkina rap dohot au, diboan nasida do sipanganon, jala dikirim nasida do pesan dohot ayat na patoguhon. Tikki pajuppang hami, tersenyum do nasida tu au. Jala dipaingot nasida do au, na holong do roha ni Jahowa tu au. Sai mandok mauliate do au tu Jahowa, ala dilehon Ibana akka dongan na songon keluarga, na makkaholongi au.”

17. Boasa didok si Daud dang mabiar ibana?

¹⁷ “Dang mabiar au, ai didongani Ho do au.” Jotjot do terancam ngolu ni si Daud, jala gogo do akka musuna. Alai alani holong ni Jahowa tu ibana, gabe aman ma dihilala si Daud. Boi do dihilala si Daud na sai dijaga Jahowa do ibana manang songon dia pe situasina. Gabe dipapos ma muse rohana. Alani i, didok si Daud ma di endena, “Dipalua [Jahowa] do au sian sude na mambahen au mabiar.” (Ps. 34:4) Memang, hea do si Daud mabiar situtu. Alai ala diboto ibana na dihaholongi jala sai didongani Jahowa ibana, gabe dang mabiar be ibana.

18. Tikki borat sitaononmuna, aha do manfaatna molo diingot hamu na holong roha ni Jahowa tu hamu?

¹⁸ Molo taingot na holong do roha ni Jahowa tu hita, gabe margogo ma hita mangadopi sitaononta na massai borat. Taida ma pengalaman ni piga-piga donganta. Contohna donganta  perintis na margoar si Susi. Dipaboa ibana do songon dia perasaanna dohot suamina tikki bunuh diri anak ni nasida. Didok ibana, “Tikki masa sitaonon na massai borat, olo do gabe mandele hita. On ma na dihilala hami. Alai gabe tenang ma perasaannami, ala diboto hami na holong do roha ni Jahowa tu hami.” Contoh na asing, i ma si Rahel na dipaboa nakkin. Didok ibana, “Hea ma tikki borngin lungun hian rohakku. Khawatir do au jala mabiar. Sappe tangis ma au martangiang tu Jahowa. Alai dung sae martangiang au, boi ma huhilala dibahen Jahowa tenang perasaanku, dos songon sahalak ina na mangabing gellengna. Gabe tarpodom ma au. Dang boi tarhalupahon au na masa i.” Contoh na asing muse, i ma sahalak sintua na margoar si Tomas. Dipenjara do ibana saleleng opat taon ala dang olo dohot tu dinas militer. Songon dia do Jahowa patuduhon holongna tu ibana? Didok si Tomas, “Sai dilehon Jahowa do akka na huhaporluhon, lobi sian na hubayakkon. Gabe pos ma rohakku, na boi do Ibana huandalhon. Asing ni i, alani tondi parbadia ni Jahowa, boi do au toktong marlas ni roha tikki di penjara. Hape sasittongna ngeri do na dipenjara on. Sian on marsiajar do au, lam jonok hita tu Jahowa, lam boi ma tahilala holongna tu hita. Alani i, mulai ma au merintis biasa tikki di penjara.”

PAJONOK MA DIRIMUNA TU DEBATA

19. (a) Ala taboto na holong do roha ni Debata tu hita, gabe songon dia ma isi ni tangiangta? (b)  Ayat ni Bibel na dia do taringot holong ni Jahowa na hona tu rohamuna? (Ida kotak “ Akka Ayat na Paposson Rohatta tu Holong ni Jahowa.”)

¹⁹ Sian akka pengalaman nakkin, taboto ma sai didongani Jahowa ‘Debata parholong’ i do hita! (2 Kor. 13:11) Holong do rohana tu hita ganup marsada-sada. Pos ma rohatta ‘dipatudu Ibana do holong ni rohana lao manjaga hita’. (Ps. 32:10) Molo jotjot tarimangi on sude, gabe boi ma tahilala holong ni Jahowa jala lam jonok ma hita tu Ibana. Martangiang ma hita manang sadihari pe, jala tapaboa ma na massai arga do holong ni rohana i tu hita. Tapaboa ma sude holso ni rohatta tu Jahowa. Pos ma rohatta diattusi Jahowa do situasitta, jala lomo do rohana mangurupi hita.—Ps. 145:​18, 19.

20. Boasa holong ni Jahowa mambahen hita lam jonok tu Ibana?

²⁰ Songon api unggun na mambahen las dagingta tikki ngali ari, songon i ma holong ni Jahowa tu hita. Boi do i mangapuli rohatta tikki borat sitaononta. Gabe lam jonok ma hita tu Ibana. Alani i, las ma rohamuna ala dihaholongi Jahowa hamu. Jala songon panurat Psalmen dok ma, “Holong do rohakku tu Jahowa”!—Ps. 116:1.