SI REBEKKA mangida adaran na mansai bidang di botari i. Dung marmingguminggu di pardalanan, nunga somal be pangkilalaanna hundul di tanggurung ni unto. Nunga dao ditadingkon ibana Haran, huta hatubuanna, hirahira marratus kilometer di tungkan timur laut. Ndang boi be ra ibana jumpang muse dohot keluargana. Godang do sungkunsungkun na ro tu pingkiranna taringot aha na masa di ari na naeng ro, tarlumobi naeng sahat nasida tu huta i.

Nunga godang huta dibolus nasida sian Kanaan jala borhat ma nasida tu selatan ni Kanaan, saonari digoari Negeb. (1 Musa 24:62) Diida si Rebekka ma angka birubiru di adaran i. Koring jala tungil do luat i, alai bidang do disi inganan laho marmahan. Jala inganan na somal do on di baoa na matua i. Las do roha ni baoa na matua i mandapothon tuanna! Alai, sungkunsungkun do si Rebekka taringot songon dia parngoluonna di huta i? Songon dia do rupa ni si Isak na laho tungganedolina? Ndang hea dope nasida pajumpang! Lomo do roha ni si Isak mangida ibana? Jala, songon dia do pangkilaanna tu si Isak?

Saonari on, marasingasing do hasomalan ni halak laho mangalului dongan saripe. Di pigapiga inganan, somal do halak dipatohotoho. Songon dia pe hasomalan di luatmuna, tontu sapandapot do hamu, sungkunsungkun do roha ni si Rebekka taringot na laho masa di ngoluna. Alai, sahalak borua na barani do ibana jala togu haporseaonna. Tahaporluhon do angka parange on tingki adong na muba di parngoluonta. Jala godang do angka parange na so dipatudu halak saonari, na boi tatiru sian si Rebekka.

Ra, ndang mura si Rebekka mangadopi hamubaon na mansai balga di ngoluna. Dipagodanggodang di Mesopotamia do ibana, huta na jonok tu Haran. Natuatuana ndang mangihuthon hasomalan ni halak Haran na manomba dewa bulan, i ma Sin. Alai, Debata Jahowa do na disomba nasida.​—1 Musa 24:50.

Mansai uli do rupa ni si Rebekka jala songon uli ni rupana do rohana. Ringgas jala marparange na ias do ibana. Na mora do keluargana jala godang do pangurupi ni nasida. Nang pe songon i, ndang dipamanja si Rebekka, alai disuru do ibana karejo. Songon somalna angka borua di tingki i, godang do karejona, dohot ma i manarui aek tu jabuna. Molo dung botari, diboan ibana ma gunsi laho manarui aek.​—1 Musa 24:11, 15, 16.

Di sada tingki, didapothon sahalak baoa na matua ma si Rebekka tingki mambuat aek di sumur. Didok ma tu ibana, ”Ua lehon aek i otik inumonku sian panguhatanmu [gunsimu].” Dipangido ibana do denggan tu si Rebekka! Diida si Rebekka do molo baoa i ro sian huta na dao. Hatop ma dipaturun ibana gunsina jala dilehon ibana minum sampe sombu uasna. Diida si Rebekka ma adong sampulu untona jala ndang adong dope aek diparade laho inumon ni angka unto i. Asi ma rohana gabe didok ma tu baoa i, ”Hutahui pe dohot di angka untom, paima sombu uasna.”​—1 Musa 24:17-19.

Ndang holan otik ditimba si Rebekka aek laho inumon ni angka unto i, alai sampe sombu do uasna dibahen. Sada unto na mauas hian boi do pahabishon 95 liter aek! Molo sampulu unto i mauas  hian, boi ma tapingkirhon sadia godang ditimba si Rebekka aek i. Hape ndang mauas situtu angka unto i. * Alai diboto si Rebekka do on umbahen na olo ibana mangulahon i? Ndang! Na asi do rohana jala rade mangurupi baoa i. Jala baoa i pe paloashon ibana mangulahon i. Sai diparrohahon ibana do si Rebekka mangisi gunsina jala mulahulak manimba aek i sian sumur.​—1 Musa 24:20, 21.

Parange ni si Rebekka na rade mangurupi gabe sitiruon tu hita. Saonari, angka jolma holan mangkaringkothon dirina sandiri. Songon na disurirangkon, ”mangkaholongi dirina ma jolma” jala ndang olo rade mangurupi donganna. (2 Timoteus 3:1-5) Alani i, halak Kristen na pasidingkon parange ni portibi on, porlu maniru si Rebekka, na olo loja mulahulak manimba aek sian sumur.

Diida si Rebekka do na diparrohahon baoa na matua i ibana. Longang jala las do rohana mangida haburjuon ni si Rebekka. Dung sae si Rebekka manimba aek i, dilehon baoa i ma perhiasan na arga! Dung i, disungkun ma, ”Atehe, boru ni ise do ho? Ua paboa di ahu; siat do hami di bagas ni amanta i marborngin?” Tingki dipaboa ibana ise keluargana, lam las ma roha ni baoa i. Alani las ni rohana, didok si Rebekka ma muse, ”Galagala ni eme pe dohot gagaton, godang do di hami, parbornginan pe adong do.” Tontu on ma na dihaporluhon halak na ro sian na dao songon baoa na matua on. Dung i, marlojong ma si Rebekka paboahon i tu omakna.​—1 Musa 24:22-28, 32.

Tangkas ma, diajari natuatuana do asa rade si Rebekka mangurupi sude jolma. Parange on ndang somal be dipatudu halak saonari. On ma na mambahen hita porlu maniru haporseaon ni si Rebekka. Haporseaon tu Debata mangurupi hita boi rade mangurupi sude jolma. Rade do Jahowa mangurupi sude jolma jala lomo do rohaNa asa sude naposoNa mangulahon i. Las do roha ni Jahowa molo taurupi sude jolma dohot ma i na so  tolap mambalos haburjuonta.​—Mateus 5:44-46; 1 Petrus 4:9.

Ise do baoa na matua na di sumur i? Ibana sahalak naposo ni si Abraham, ompung ni si Rebekka na martinodohon. Alani i do, las roha ni si Betuel manamue ibana. Ra, goar ni naposo on si Elieser. * Tingki diparade tu ibana sipanganon, ndang olo ibana mangallang andorang so dipaboa ibana aha na mambahen ibana ro tusi. (1 Musa 24:31-33) Boi ma tapingkirhon las ni rohana paboahon taringot Jahowa na manogunogu ibana mangulahon ulaon i. 

Pingkiri ma songon dia si Elieser paboahon na masa tu si Betuel dohot tu si Laban, ito ni si Rebekka. Dipaboa ibana do na dipasupasu Jahowa ulaon ni si Abraham di Kanaan. Tubuan anak do ibana sian si Sarah, i ma si Isak, na laho manean sude arta ni si Abraham. Jala dilehon si Abraham do tu naposona sada ulaon na ringkot i ma, mangaririt na laho tungganeboru ni si Isak, sian keluargana di Haran.​—1 Musa 24:34-38.

Disuru si Abraham do asa marsumpa si Elieser na so buatonna boru ni halak Kanaan gabe tungganeboru ni si Isak. Boasa? Halak Kanaan ndang manomba Jahowa. Diboto si Abraham do na laho ripashonon ni Debata angka parjahat. Alani i, ndang lomo roha ni si Abraham molo si Isak marsaor jala marparange songon halak Kanaan. Tangkas do diboto si Abraham, marhite si Isak do Debata manggohi janjiNa.​—1 Musa 15:16; 17:19; 24:2-4.

Dipaboa si Elieser ma aha na diulahon ibana dung sahat di sumur na jonok di Haran. Martangiang do ibana tu Jahowa asa diurupi mamillit ise na gabe tungganeboru ni si Isak. Carana? Dipangido si Elieser ma tu Debata asa dipatudu ise borua na ro tu sumur i gabe tungganeboru ni si Isak. Ingkon rade do borua i mangalehon ibana minum dohot angka untona. (1 Musa 24:12-14) Ise do na ro jala na mangulahon i? Si Rebekka! Pingkirhon ma songon dia pangkilalaan ni si Rebekka dohot keluargana tingki manangihon sarito i!

Porsea do si Betuel dohot si Laban tu hatorangan ni si Elieser i. Nasida mandok, ”Na ro sian Jahowa do hata i.” Songon na somal di tingki i, diririt ma si Rebekka asa gabe tungganeboru ni si Isak. (1 Musa 24:50-54) Oloan ni si Rebekka do nasida?

Andorang so borhat si Elieser, nunga disungkun ibana tu si Abraham, ”Beha ia so olo boruboru i mangihuthon ahu?” Dialusi si Abraham ma, ”Disi pe asa malua ho sian na niuarihonmu [sumpami] tu ahu.” (1 Musa 24:39, 41) Alani hiras ni roha ni si Elieser, dipangido ibana do asa dipaloas diboan si Rebekka marsogotna i. Alai, di keluarga ni si Betuel, diargai do pandapot ni borua. Dipangido keluargana ma asa tading si Rebekka sampulu ari nai. Alani i, didok nasida ma, ”Antong hujou hami ma si betet [si Rebekka] i, asa itasungkun hatana i.”​—1 Musa 24:57.

Ra, on ma sungkunsungkun na borat di ngolu ni si Rebekka. Aha do alusna? Dipangido ibana do tu natuatuana asa disundati ibana laho? Manang, olo do ibana borhat ala porsea tu pangurupion ni Jahowa? Sian alusna, tarida ma molo ibana ndang mabiar mangadopi na laho masa di ngoluna. Tangkas do didok ibana, ”Laho pe ahu.”​—1 Musa 24:58.

Marpos ni roha situtu do si Rebekka! Saonari, nang pe marimbar hasomalan na diulahon laho mangalului dongan saripe, alai godang do na boi taparsiajari sian si Rebekka. Aha na diulahon ibana ndang laho pasonangkon dirina sandiri, alai pasonangkon Jahowa do. Saonari, rade do tudutudu di Bibel taringot songon dia mamillit dongan saripe dohot songon dia gabe tungganedoli manang tungganeboru na denggan. (2 Korint 6:14, 15; Epesus 5:28-33) Tatiru ma si Rebekka marhite mangihuthon poda na sian Debata.

Dipaborhat keluarga ni si Betuel ma si Rebekka, si Debora parorotna dohot angka naposo borua mangihuthon rombongan ni si Elieser. (1 Musa 24:59-61; 35:8) Nunga dao ditadingkon nasida huta Haran, hirahira 800 kilometer. Lelengna nasida di pardalanan hirahira tolu minggu. Loja do nasida di pardalanan. Nang pe si Rebekka jotjot mangida unto, alai ndang marpengalaman ibana mamboan unto. Di Bibel dipaboa, parmahan birubiru do keluarga ni si Rebekka, ndang na somal mamangke unto. (1 Musa 29:10) Halak na so somal mamangke unto jotjot do holsoan mamboan unto, nang pe jonok pardalananna!

Asa pos roha ni si Rebekka, saleleleng di pardalanan godang do disungkun ibana tu si Elieser taringot si Isak dohot keluargana. Pingkirhon ma songon dia nasida mangkatai huhut mambahen api unggun. Dipaboa ma tu ibana songon dia janji ni Jahowa tu si Abraham. Dijanjihon Debata do, marhite pinompar ni si Abraham boi sude jolma mandapot pasupasu. Rimangi ma songon dia las ni roha ni si Rebekka dung diboto ibana molo Jahowa manggohi janjiNa marhite si Isak, na laho tungganedolina, manang boi didok marhite sian ibana!​—1 Musa 22:15-18.

Ujungna, sahat ma nasida songon na dipaboa di mula ni artikel on. Nunga botari nasida sahat di Negeb. Ditatap si Isak ma adong ro rombongan. Dung diida si Rebekka adong sahalak baoa mardalan di adaran i, ”gabe manimbung ibana sian unto i”, andorang so hundul dope untona. Disungkun ibana ma tu si Elieser, ”Ise do halak an na mardalandalan di ladang i manjumpangkon hita?” Dung diboto ibana si Isak do i, dibuat ibana ma salendang manghungkupi bohina. (1 Musa 24:62-65) Boasa diulahon ibana songon i? Hasomalan i patuduhon pangargaion tu halak na laho tungganedolina. Ndang diulahon be hasomalan i saonari. Alai sian hasomalan on, tangkas ma angka baoa manang borua porlu maniru serep ni roha ni si Rebekka.

Si Isak, sahalak baoa na marumur 40 taon. Marhabot ni roha dope ibana nang pe naung tolu taon mate omakna, si Sarah. Boi tadok, lambok jala baoa na parholong do si Isak. Alani i, denggan situtu do ala jumpangna tungganeboru na ringgas, rade mangurupi jala marserep ni roha! Songon dia do na masa dung jumpang nasida? Bibel paboahon, ”Holong rohana [si Isak] di ibana.”​—1 Musa 24:67; 26:8.

Nang pe nunga 3900 taon naung salpu masa on, alai sude do hita marlomo ni roha tu si Rebekka. Songon dia do hita boi maniru habaranion, haringgason, rade mangurupi jala serep ni roha ni si Rebekka? Sude hita, na poso dohot na matua, baoa dohot borua, na marhasohotan dohot na so marhasohotan porlu maniru haporseaon ni si Rebekka!