Si Odval tading di Mongolia. Ndang apala tangkas diingot sadia umurna, alai didok ibana ra taon 1921 do ibana tubu. Tingki dakdanak, marmahan do ibana jala holan sataon marsingkola. Alani i, ndang diboto manjaha. Alai na parpudi on, adong do buku na margombar mangurupi ibana mananda Debata jala marsiajar taringot bagabagaNa tu halak na mangoloi Ibana. Hona do parsiajaran i tu rohana.

Buku on dipabinsar Sitindangi Ni Jahowa taon 2011 jala adong dua macam buku on. Bagak do angka gombar di buku on alai ndang sarupa godang ni suratna.

Buku na gumodang suratna marjudul Tangihon ma Debata Asa Mangolu Salelenglelengna laho dibahen di bagasan 583 bahasa; na sada nai marjudul Tangihon ma Debata di bagasan 483 bahasa. Molo dibandingkon tu Deklarasi Universal Hak Asasi Manusia ni PBB, diterjemahon di bagasan 413 bahasa do sahat tu taon 2013. Asing ni i, nunga dicetak buku on hirahira 80 juta.

Di Brasil, sahalak ina na matua manjalo buku Tangihon ma Debata mandok, ”Las do roha umboto adong na manarihon halak na songon ahu. Najolo ndang hea olo ahu manjalo bukumuna ala ndang huboto manjaha. Alai lomo do rohangku manjalo buku on.”

Si Brigitte na so boi manjaha sian Prancis mandok, ”Sai huida ma angka gombar na di buku i ganup ari.”

Sian Afrika Selatan sahalak Sitindangi manurat, ”Denggan do buku on dipangke laho mangurupi halak mamboto ajaran ni Bibel tu halak na marbahasa Cina. Nunga godang hujumpangi halak, na singkola na timbo, na mansai malo dohot na so boi manjaha—sude halak. Buku Tangihon ma Debata Asa mangolu Salelenglelengna mangurupi ahu hatop pasahathon ajaran na sian Bibel. Di bagasan satonga jom, nunga boi hupungka parsiajaran Bibel.”

Sahalak sitindangi di Jerman mangurupi na mardongan saripe marsiajar Bibel. Timbo do singkola ni nasida. Las do roha ni tungganedolina manjalo buku i, jala didok ma, ”Boasa ndang sian najolo dilehon hamu buku on? Ala manjaha buku on gabe huantusi ma isi ni Bibel.”

Sahalak borua na ngungu di Australia mandok, ”Nunga martaontaon ahu tading di biara. Maraleale do ahu dohot angka pandita. Alai ndang hea diajarhon nasida taringot Harajaon ni Debata tu ahu. Alai dung huida angka gombar di buku on gabe huantusi ma lapatan ni Mateus 6:10.”

Kantor cabang Sitindangi Ni Jahowa di Kanada manurat, ”Dung diida halak Sierra Leone buku Tangihon ma Debata di bagasan bahasa Krio, didok nasida ma nunga marsitutu Sitindangi Ni Jahowa laho mamaritahon isi ni Bibel. Adong muse na mandok, ’Imbar do hamu sian na asing, disarihon hamu do sude halak.’ ”