Asiɛ’n i bue wie’m be su’n, aunyɛyɛ’n kle sran’m be yalɛ dan le nɲɔn’n nun. Kɛ ɔ fɛ i laa lele andɛ’n, aunyɛyɛ’n nin-a kleman be yalɛ sɔ le. Asa ekun’n, lika’n m’ɔ lo dan’n ti’n, sanvuɛsa kɛ nzue m’ɔ tɔ di lika’n annzɛ sin m’ɔ yra bo mun’n, be kle sran’m be yalɛ wie. I su ndɛ wie mun yɛ:

•   ‘Afuɛ’n, Zuɛn anglo nun’n, aunyɛyɛ’n kleli sran’m be yalɛ kpa. Kɛ ɔ fɛ i afuɛ 1849 mɔ sran’m be boli lika m’ɔ lo’n i nzɔliɛ sielɛ bo lele andɛ’n, lika’n nin-a loman sɔ le.’—Agence américaine d’observation océanique et atmosphérique [NOAA], États-Unis, département du Commerce, 13 juillet 2023.

•   “Itali nin Ɛspaɲin nin Aflansi nin Alemaɲin nin Polɔɲun lɔ’n, aunyɛyɛ’n su kle sran’m be yalɛ kpa. Lika nga be flɛ be kɛ Silisi nin Saadɛɲin be nun lɔ’n, lika’n i lolɛ m’ɔ lo dan’n, ɔ cɛman naan w’a ju degle ablanan-nin-mɔcuɛ (48). Kɛ ɔ fɛ i laa lele andɛ’n, lika’n nin-a loman kɛ ngalɛ’n sa Abloki lɔ le.”—Agence spatiale européenne, 13 juillet 2023.

•   Fluwa sifuɛ kun seli kɛ: “Sɛ lika’n lo kɛ ngalɛ’n sa naan ɔ kanman ase’n, ɔ cɛman naan nzue’n w’a tɔ kpa w’a tra laa’n. Kpɛkun nzue’n dí lika’n yɛ ɔ́ sáci ninnge kpanngban trá laa’n.”—Stefan Uhlenbrook (directeur de l’hydrologie, de l’eau et de la cryosphère à l’Organisation météorologique mondiale, 17 juillet 2023).

 Ndɛ kɛ ngalɛ’n sa’n yɛ e ti be le nɲɔn’n nun-ɔn. ?Ndɛ sɔ’m be ti’n, amun wla guaman ase? An nian sa sɔ’n i su ndɛ nga Biblu’n kan’n.

 Ɛɛn-ɛn. Biblu’n kannin kɛ sa kɛ lika’n m’ɔ lo dan tratra su’n nin nzue m’ɔ tɔ dan saci ninnge mun’n annzɛ i wunsu sa wie mun ekun’n, bé jú e blɛ liɛ’n nun. I wie yɛle ndɛ nga Zezi kannin’n. Ɔ seli kɛ é wá wún “ninnge sroesroe mun.” (Liki 21:11) Lika m’ɔ su lo dan tratra su’n ti’n, srɛ kun sran kpanngban. Afin be bu i kɛ ɔ cɛ kaan sa’n, asiɛ’n su tranlɛ’n su yoman ye kun.

 Cɛcɛ. Ɲanmiɛn yili asiɛ’n kɛ klɔ sran’m be tran su tititi. Ɔ su kplinman su kɛ klɔ sran’m be saci asiɛ’n mlɔnmlɔnmlɔn. (Jue Mun 115:16; Akunndanfuɛ’n 1:4) I kpa bɔbɔ’n, ɔ seli kɛ ɔ́ “núnnún be nga be saci asiɛ’n.”—Sa Nglo Yilɛ 11:18.

 Biblu’n kle kɛ Ɲanmiɛn kwla yo maan sa kɛ lika m’ɔ lo dan tratra su’n annzɛ i wunsu sa mun b’a juman asiɛ’n su. Biblu’n kle e kɛ i sɔ kusu yɛ ɔ́ wá yó-ɔ.

•   “[Ɲanmiɛn] yo maan aunmuan m’ɔ fita kekle kpa’n ɔ kan ase, jenvie m’ɔ bo’n ɔ jran diin.” (Jue Mun 107:29) Ɲanmiɛn i tinmin’n tra ninnge kɛ nzue ng’ɔ tɔ saci ninnge mun’n annzɛ wia’n sa’n be lelele. Ɔ maan asiɛ’n su ninnge nga be sacili mɔ i ti yɛ aunyɛyɛ’n kle sran’m be yalɛ’n, ɔ kwla siesie be ye.

•   “A nian asiɛ’n i lika, a yo maan i su ninnge’m be yo ye, yɛ ɔ ti kpa dan.” (Jue Mun 65:9) Ɲanmiɛn fanngan nun’n, asiɛ’n wá káci lika klanman kpa kun.

 Sɛ a kunndɛ kɛ á sí wafa nga Ɲanmiɛn wá síesíe asiɛ’n i ye’n i su ndɛ’n, kanngan ndɛ nga nun: “Qui sauvera la terre?”