Sran wie mɔ be ti nun w’a sanngan’n, yɛ be kannin ndɛ sɔ mun-ɔn. ?Ɔ ti nun w’a sanngan? ?Annzɛ a si sran kun mɔ i ti nun w’a sanngan’n?

Nán ɔ ngunmin yɛ sa sɔ’n ju ɔ su-ɔ. Andɛ’n, sran kpanngban be ti nun sanngan annzɛ be osufuɛ wie i ti nun sanngan.

Kɛ mɔ ‘lika’n wa yo kekle kpa’n’ i ti yɛ sa sɔ’n ju sran’m be su-ɔ. (2 Timote 3:1) Fluwa sifuɛ wie’m be seli kɛ mɛn wunmuan’n nun’n sɛ be fa sran mɔcuɛ’n, be nun kun i ti nun ti sannganwa. Afuɛ 2020 nun’n kɛ koronavirisi bali’n, be nga be ti nun sanngannin’n be su wa ukali kpa. Sɛ be fa sran 100 be nun 26 be ti nun sanngannin trali be nga be ti nun sanngannin afuɛ 2019 nun’n. Yɛ sɛ be fa sran 100 be nun 28 be liɛ’n yoli tɛtɛ kpa trali afuɛ 2019 nun liɛ mun.

Nán fluwa sifuɛ’m be ndɛ nga be kan’n, i su yɛ é jrán é sé kɛ sran kun i ti nun w’a sanngan annzɛ w’a sannganman-ɔn. Sanngɛ wafa nga ɔ bɔbɔ nin ɔ osufuɛ mun amun wun yo amun’n ɔ nin wafa nga amun di mɛn’n yɛ e kwla fa sie i sɔ liɛ’n i nzɔliɛ-ɔ.

Sran nga i ti’n kpɛn su’n, ɔ wun i wun fɛ yɛ ɔ yo ninnge mun ngwlɛlɛ su. Ɔ kwla wun sa nga be tɔ i su’n be trawlɛ yɛ ɔ kwla di junman yɛ i wla gua ase.

• I SƆ’N KLEMAN KƐ ɔ yoli sa tɛ wie ti-ɔ.

• I SƆ’N KLE KƐ tukpacɛ kun yɛ ɔ kle i yalɛ-ɔ. Tukpacɛ sɔ’n ti’n, i akunndan’n sanngan dan. Ɔ maan ɔ kwlá buman akunndan kpa sa, yɛ ɔ kwlá yoman ninnge mun kɛ ng’ɔ nin i fata’n sa.

• Ɔ ju wie’n, ɔ kwlá traman janvuɛ. Annzɛ ɔ kwlá yoman ninnge nga sran’m be yo be titi’n.

• Sa sɔ’n kwla ju sran kwlakwla su. Kannzɛ ɔ ti bakan-o, kpɛnngbɛn-o, sran ble-o, blɔfuɛ-o, ɔ su Ɲanmiɛn-o annzɛ ɔ suman Ɲanmiɛn-o, ɔ le sika-o annzɛ ɔ leman sika-o.

Ɔ ju wie’n, sɛ e sie i nzɔliɛ kɛ wafa nga e bɔbɔ annzɛ e osufuɛ wie i wun yo i’n w’a kaci’n, nán e ɲin kpa su. I wie yɛle kɛ ɔ kwla lafi dan, annzɛ ɔ lafiman kpa annzɛ ɔ kwla di like dan annzɛ ɔ diman like kpa. Asa ekun’n, i wla kwla bo i wun cɛ kpa annzɛ i akunndan’n sanngan cɛ kpa. Sɛ i sɔ sa’n ju e bɔbɔ annzɛ e osufuɛ wie su’n, e kwla ko wun dɔɔtrɔ kun wun naan ɔ kan like nga ti yɛ e wun yo e sɔ’n, ɔ nin like nga e kwla yo’n i ndɛ kle e. ?Sanngɛ ngue yɛ ɔ kwla uka i kpa-ɔ.

Zezi Klisi mɔ asiɛ wunmuan’n su’n, sran fi i ngwlɛlɛ liɛ’n tomɛn i’n, ɔ seli kɛ: “Be nga be ti juejue’n be mianman ayre yofuɛ wun, sanngɛ be nga be kpinndinman’n, be yɛ be miɛn i wun-ɔn.” (Matie 9:12) Be nga be ti nun w’a sanngan mɔ be ko wun dɔɔtrɔ’m be wun annzɛ be ɲan ayre kpa’n, be tukpacɛ’n tinman be su dan annzɛ ɔ yoman tɛ traman su. Sɛ amun wun kɛ tukpacɛ sɔ’n wo amun wun annzɛ ɔ su cɛ’n, ɔ fataman kɛ amun sisi amun bo naan amun a yo amun wun ayre. a

Kannzɛ bɔbɔ Biblu’n timan ayre yolɛ fluwa’n, sanngɛ sɛ e ti nun sanngan’n i nun ndɛ’n kwla uka e kpa. Fluwa nga nun’n, é wá wún wafa nga sɛ e ti nun sanngan’n, Biblu’n kwla uka e naan y’a wun i trawlɛ’n. Ɔ maan é wlá ɔ fanngan kɛ a fa ɔ ɲin sie i fluwa nga i nun ndɛ’n su kpa.