?Ngue ti yɛ sran sunman be bumɛn i kɛ be o sran nun-ɔn?
?NGUE TI YƐ SƐ E BU E WUN SRAN’N Ɔ TI KPA-Ɔ?
Be nga be bu be wun sran’n, be kwla jran sa nga be tɔ be su’n be ɲrun kekle. Be sa sin bubuman be ndɛndɛ.
-
Fluwa sifuɛ wie’m be waan be nga be bumɛn i kɛ be o sran nun’n, blɛ sunman’n be koko dan, be wla bo be wun, yɛ be diman aliɛ kpa annzɛ kusu be di aliɛ tratra su. Asa’n be kwla fa nzan nin drɔgi nɔnlɛ’n fa cici be ti.
-
Be nga be bu be wun sran’n, be faman be wun sunnzunman be wiengu. Ɔ maan be nin be wiengu’m be kwla ti be wun aniɛn yɛ be afiɛn kwla mantan kpa. Be nga be bumɛn i kɛ be o sran nun’n be liɛ’n, be ndɛ kanlɛ yo ya. Ɔ maan be nin be wiengu’m be afiɛn kwla saci ndɛndɛ.
-
Be nga be bu be wun sran’n, kɛ sa kekle tɔ be su’n, be jran kekle. Kannzɛ ninnge wie’m be tanndan be ɲrun’n, sanngɛ be mian be ɲin be yo like nga be sunnzunnin kɛ bé yó’n. Be nga be buman be wun sran’n, kɛ like kaan sa bɔbɔ tanndan be ɲrun’n, be sa sin ka lɛ bubu be.
LIKE NGA A KWLA YO’N
Be nga be kwla wla ɔ fanngan’n, be yɛ ɔ fata kɛ a tra be janvuɛ-ɔ. Be nga be ɲin yi sran’n, mɔ ɔ ndɛ lo be sakpa’n, mɔ be kwla wla ɔ fanngan’n, be yɛ ɔ fata kɛ a nin be san nun-ɔn.
Uka ɔ wiengu mun. Sɛ ɔ klun ti ufue naan a yo be nga be le wie-o annzɛ be nga be leman wie-o be ye’n, i sɔ’n mán ɔ aklunjɔɛ. Kannzɛ bɔbɔ sran’m be sieman like nga a yo’n i nzɔliɛ’n, sanngɛ á dí aklunjɔɛ.
Uka ɔ mma mun naan be bu be wun sran. Wafa nga a kwla yo sɔ’n, yɛle kɛ ɔ ju wie’n yaci be nun naan be bɔbɔ be kunndɛ sa nga be tɔ be su’n be trawlɛ. I liɛ’n, sɛ sa tɔ be su’n bé wún wafa nga be kwla yo naan b’a jran kekle’n annzɛ b’a wun sa sɔ’n i trawlɛ’n. I sɔ’n yó maan bé bú be wun sran. Yɛ kɛ bé wá yó kaklaka’n, i sɔ’n úka be kpa.
LIKE NGA ZOOVA I LALOFUƐ’M BE YO’N
Aɲia nga Zoova i Lalofuɛ’m be yo be’n, ɔ nin Biblu’n nun like mɔ be suan’n be uka sran mun naan be nzuɛn’n w’a yo kpa. Yɛ i sɔ’n yo maan be bu be wun sran.
AƝIA NGA E YO BE LEMƆCUƐ KWLAKWLA’N
E aɲia’m be bo’n, be fa Biblu’n be man e afɔtuɛ wie mun. Wie liɛ’n wafa nga e kwla yo naan y’a bu e wun sran’n, i ndɛ yɛ be kan-ɔn. Be tanninman sika naan b’a tran e aɲia’m be bo, yɛ sran kwlaa kwla trɛn i bo. Sɛ a tran e aɲia’m be bo’n ...
-
á wún i wlɛ kɛ ɔ ndɛ lo Ɲanmiɛn.
-
á sí sa nga ti yɛ e o asiɛ’n su’n.
-
á wún wafa nga a kwla yo naan w’a tra janvuɛ kpa’n.
Asa ekun’n, á wún kɛ janvuɛ kpa mun ‘be uka be wun.’—1 Korɛntifuɛ Mun 12:25, 26.
Sɛ a kunndɛ kɛ á sí wafa nga e yo e aɲia mun i su ndɛ kpa ekun’n, kɔ jw.org su naan nian video nga be flɛ i kɛ ?Ngue yɛ be yo i Ɲanmiɛn Sielɛ Sua’n nun lɔ-ɔ?
SRAN’M BE BIBLU’N NUN LIKE MƆ E KLE’N
E fa fluwa A kwla di aklunjɔɛ tititi! e kle sran’m be Biblu’n nun like. Kɛ é yó sɔ’n, e deman sran’m be sika. Desɛn nin Biblu’n nun ndɛ mma cinnjin wie’m be o fluwa sɔ’n nun. Wafa nga be yiyi Ɲanmiɛn ndɛ’n nun’n, ɔ ti weiin. Kosan nga be o fluwa sɔ’n nun’n, be yo maan sran bu akunndan. Yɛ fluwa sɔ’n fa sran’m be ɲin sie i video wie’m be su. Kɛ e fa fluwa sɔ’n e kle sran’m be like’n, i sɔ’n uka be naan be nzuɛn’n w’a yo kpa naan b’a bu be wun sran.
Sɛ ɔ waan á sí sa nga ti yɛ ɔ ti cinnjin kɛ a nin Zoova i Lalofuɛ’m be suan Biblu’n nun like’n, kɔ jw.org su naan nian video nga be flɛ i kɛ ?Ngue ti yɛ Biblu’n nun like suanlɛ’n ti cinnjin-ɔn?
Ninnge wie mɔ be kwla yo ɔ fɛ ekun'n
KOSAN MƆ BIBLU’N TƐ BE SU’N
?E bɔbɔ e wun klolɛ’n i su ndɛ benin yɛ Biblu’n kan-ɔn?
Zezi seli kɛ: “Klo ɔ wiengu kɛ a fa klo ɔ bɔbɔ wun’n sa.” ?Ndɛ sɔ’n i bo’n yɛle benin?
E SU NDƐ
Se e naan e wa nian ɔ osu
A nin Zoova i Lalofuɛ mun amun koko Biblu’n nun ndɛ kun su yalɛ, annzɛ kunndɛ kɛ á sí be su ndɛ kpa.
E SU NDƐ
Tran e aɲia’m be bo
Nian wafa nga e yo e aɲia mun. A kwla wun e aɲia yowlɛ kun ɔ tranwlɛ’n nun lɔ.
