Be waan kɛ sran kun wu’n, be wu i ekun. Ɔ maan sɛ sran sɔ’n su fɛ’n, ɔ fin sa ng’ɔ yoli be ka naan b’a wu i ekun’n annzɛ ng’ɔ yo be dɔ nga su’n. Asa ekun’n, sɛ sran sɔ’n kunndɛ kɛ i su afɛ’n wie’n, ɔ fata kɛ ɔ miɛn i ɲin naan i ɲin tu mɛn’n nun ninnge’m be su. I liɛ’n sɛ ɔ wu’n, be su wumɛn i ekun. Ɔ maan siɛn’n w’a ɲɛn i ti. Be flɛ i sɔ’n kɛ mɔksa.

Be waan sɛ sran kun su fɛ’n, nn Ɲanmiɛn yɛ ɔ su tu i fɔ-ɔ. Asa kusu’n Ɲanmiɛn su sɛ i nian naan sɛ ɔ lafi i su-o. Be flɛ fluwa sifuɛ kun kɛ Sayidi Sayɛdi. Ɔ ti Ɲanmiɛn flɛfuɛ nga be o Amlɛnkɛn’m be mɛn’n i nglo lɔ lika’n nun’n be anuannzɛ’n i su kpɛn. Ɔ seli kɛ sanvuɛsa’m be kpɛn e wla kɛ “ɔ fata kɛ e si like nga Ɲanmiɛn yo man e’n, i su ye titi. Asa’n, be kle e kɛ ɔ fata kɛ e suan be nga be o asamian nun’n be bo.”

Be waan sɛ afɛ o sran kun su’n, ɔ fin like ng’ɔ yo i dɔ nga su’n. Zifu wie’m be lafi su kɛ bé cɛ́n sran mun, naan i sin’n, be nga be wunnin be ɲrun mɔ kusu b’a yoman sa fi’n, bé dí be ndɛ klanman bé mán be. Sanngɛ Zifu’m be Ɲanmiɛn sulɛ wafa’n i akpasua kun liɛ’n i waan kɛ sran kun wu’n, be wu i ekun. Ɔ maan ɔ kwla yo sa kpa fa kle kɛ sa ng’ɔ yoli be ka naan b’a wu i ekun’n, be yo i nsisɔ.

Be kusu be lafi su kɛ, kɛ sran wu’n be wu i ekun. Ɔ maan blɛ kwlaa nga bé wú i ekun sɔ’n, ɔ́ wún i ɲrun sa trilili. Sɛ sran sɔ’n waan i su afɛ’n kwlaa wie’n, yɛle kɛ ɔ́ trán Niivana nun’n, ɔ fata kɛ ɔ yaci sa tɛ yolɛ nin akunndan tɛtɛ bulɛ ɔ nin i konvi m’ɔ sɔ ninnge tɛtɛ mun’n. Asa ekun’n, ɔ fata kɛ ɔ miɛn i ɲin suan ngwlɛlɛ, ɔ yo sa kpa, yɛ ɔ bu akunndan kpa.

Ndɛ’m be bo tulɛ fluwa kun seli kɛ Kɔnfisisifuɛ’m be bu i kɛ, kɛ mɔ “sran’m b’a yo tɛ dan’n” i ti yɛ e wun e ɲrun-ɔn. (A Dictionary of Comparative Religion) Kɔnfisisifuɛ’m be se kɛ sɛ e mian e ɲin e yo sa kpa’n, ɲrɛnnɛn’n wá kán ase. Sanngɛ ɔ su wieman mlɔnmlɔn. Afin ɲrɛnnɛn’n i dan lika fin “aolia nun sran wie mɔ be le wunmiɛn tra klɔ sran mun’n. Ɔ maan ɔ o nun kɛ e kplin like nga be siesieli’n su.”

Be bu i kɛ sɛ sran kun su wun i ɲrun’n, nn b’a to i amuin. Be waan wunnzue yifuɛ’m be kwla man sran muae annzɛ be kwla bo i sannzan. Yɛ sɛ baefuɛ kun su yo sran kun i abɔlɛ’n, be kwla yi sraka annzɛ be kwla yo ninnge uflɛ wie mun be fa de sran sɔ’n. Ɔ maan sɛ tukpacɛ wie kle sran kun i yalɛ’n, ɔ fata kɛ ɔ wɔ wunnzue yifuɛ kun sin naan w’a yo juejue.

Be liɛ’n be waan afɛ ng’ɔ o mɛn nun’n ɔ fin sa tɛ nga klɔ sran nɲɔn klikli’m be yoli’n. Ndɛ kunngba’n yɛ Biblu’n nun fluwa ng’ɔ suan Bo bolɛ’n kan-ɔn. Sanngɛ sran wie’m be wa kpɛli ndɛ sɔ’n i wun. I wie yɛle kɛ Katoliki wie’m be waan sran kun kwla ‘se Ɲanmiɛn kɛ ɔ fɛ i su afɛ’n’ kaci muae man asɔnun’n nunfuɛ onga mun annzɛ ɔ fa de sran uflɛ.