Ɲanmiɛn yoli maan sran’m be nin i kwla koko yalɛ kpɛkun be kan wafa nga be wun yo be’n, i ndɛ kle i. Ɲanmiɛn nuan ijɔfuɛ Davidi srɛli Ɲanmiɛn seli kɛ: “Sɛ be srɛ wɔ ɔ, a ti. Sran’m be kwlaa bé bá ɔ sin.” (Jue Mun 65:3) ?Sanngɛ wafa sɛ yɛ ɔ fata kɛ e srɛ Ɲanmiɛn naan w’a ti naan w’a yra e su-ɔ?

Kɛ é srɛ́ Ɲanmiɛn’n, e kwla kan ‘like ng’ɔ mian e sa’n i ndɛ e kle i. Kpɛkun e kwla kan e klun ndɛ e kle i. (Jue Mun 62:9) Kɛ e tu e klun e srɛ Ɲanmiɛn kɛ ngalɛ sa’n, ɔ yo i fɛ dan.

Ɲanmiɛn le tɔnndɔnlɛ dunman kaka. Sanngɛ i dunman kpakpafuɛ’n ti kunngba cɛ. Ɲanmiɛn Ndɛ’n se kɛ: ‘N ti Zoova, * min dunman’n yɛ ɔ o lɛ-ɔ.’ (Ezai 42:8, NWT) Ɲanmiɛn i dunman’n wo Ɲanmiɛn Ndɛ’n nun kpɛ kɔe 7.000. Kɛ Ɲanmiɛn nuan ijɔfuɛ kaka bé srɛ́ i’n be boli i dunman’n. Abraamun seli kɛ: “Nannan [Zoova], [...] maan n kan kun ekun [kle wɔ].” (Bo Bolɛ 18:30) E kusu kɛ é srɛ́ Ɲanmiɛn’n, e kwla bo i dunman mɔ yɛle Zoova’n.

Ɲanmiɛn ti aniɛn ngba. Ɔ maan sɛ e waan é kán e klun ndɛ’n, nin wafa nga e wun yo e’n i ndɛ é klé i’n, e kwla kan ndɛ’n e klɔ aniɛn’n nun. I nuan Ndɛ’n se kɛ: “Ɲanmiɛn kpaman sran nun. Sanngɛ nvle kwlaa nun’n, sran ng’ɔ sro i m’ɔ yo sa ng’ɔ ti kpa’n, i sɔfuɛ’n yɛ i klun jɔ i wun-ɔn.” (Sa Nga Be Yoli’n 10:34, 35)

Sanngɛ sɛ e kunndɛ kɛ Ɲanmiɛn yra e su’n, ɔ fataman kɛ e kɛ i srɛlɛ’n i ngunmin su. Ndɛ akpasua nga i sin liɛ’n nun’n, é wá kán like ng’ɔ fata kɛ e yo’n, i ndɛ.