WIE’N i su ndɛ nga sran’m be kan’n, ɔ sɔnnin yɛ ɔ ti fanunfanun. I sɔ’n fin like nga sran’n lafi su’n, annzɛ i finwlɛ’n. Sran wie’m be waan be wu be o lɔ. Yɛ wie’m be waan sran nga be wuli mun yɛ be wu be ekun-ɔn. Wie mun ekun be waan kɛ sran wu’n, nn i liɛ w’a wie mlɔnmlɔn.

Atrɛkpa’n, like nga be kleli wɔ ɔ bakan nun’n, ɔ nin wɔ finwlɛ’n ti’n, a le wɔ akunndan liɛ mɔ a bu-ɔ. ?Be wu be o lɔ? ?Kɛ mɔ i su tɛlɛ’n ti fanunfanun ti’n, wan yɛ ɔ kwla tɛ e su kpa man e-ɔ? ?Annzɛ nin yɛ e kwla wun ndɛ sɔ’n i su tɛlɛ’n niɔn?

Ɲanmiɛn sulɛ wafa’m be kpɛnngbɛn’m be se kɛ like kun o sran nun, naan kɛ sran’n wu’n, like sɔ’n wuman wie. Be waan like sɔ’n, ɔ kɔ ɲanmiɛn su. Be kɛn i sɔ titi w’a cɛ kpa. Be nga be waan be ti Klistfuɛ’n, nin Ɛndufuɛ mun, nin Zuifu nin Ɲanmiɛn flɛfuɛ mun, nin Ɲanmiɛn sulɛ wafa wie mun ekun be nunfuɛ’m be lafi i sɔ ndɛ’n su kpa. Budafuɛ’m be liɛ’n, be waan kɛ sran’n wu’n, be wu i ekun. Yɛle kɛ sɛ sran’n wu kpɛ blu’n, bé wú i kpɛ blu. Ɔ maan i agualiɛ su’n, ɔ́ dí alaje dan. Be flɛ i sɔ’n kɛ Nirvana.

Wie’n i su ndɛ fanunfanun mɔ sran’m be kan’n ti, sran sunman be bu i kɛ ɔ fata kɛ sran wu naan ɔ ko di mɛn lika uflɛ. Sran wie’m be bu i kɛ ɔ fata kɛ ninnge nga nguan o be nun’n be wu, naan Ɲanmiɛn yɛ ɔ siesieli i sɔ-ɔ. ?Yɛ Biblu’n nin? ?Ndɛ benin yɛ ɔ kan-ɔn? I su tɛlɛ’n o ndɛ nga i sin ndɛ akpasua’n nun. Kanngan nun nian.