Maan e suan Ɲanmiɛn Ndɛ’n nun like

?Ngue ti yɛ Ɲanmiɛn le anuannzɛ kun ɔn?

Ndɛ akpasua nga tɛ kosan wie mɔ atrɛkpa’n amun fa usali amun wun’n be su. Yɛ ɔ kle e Biblu’n i bue nga e kwla kanngan nun naan y’a wun kosan sɔ’m be su tɛlɛ’n. Zoova i Lalofuɛ’m be klo kɛ bé yíyí ndɛ sɔ’m be nun klé amun.

1. ?Ngue ti yɛ Ɲanmiɛn fali Izraɛlifuɛ mun yoli nvle kun ɔn?

Zoova fali Abraamu i anunman mun yoli nvle kun, yɛ ɔ mannin be mmla. Ɔ flɛli nvle sɔ’n kɛ Izraɛli. Yɛ i waan be yo naan like fi w’a saciman i sulɛ kpafuɛ’n, naan kusu be sasa i nuan ndɛ nga be klɛli’n. (Jue Mun 147:19, 20) I sɔ ajalɛ’n yoli asiɛ’n su nvlenvle kwlaa ye.​—An kanngan Bo Bolɛ 22:18 nun.

Ɲanmiɛn kpali Izraɛlifuɛ’m be kɛ be yo i lalofuɛ. Kɛ be fali Ɲanmiɛn i mmla’m be su nantili’n, be dili ye. (Mmla’n 4:6) Sɛ e suan Izraɛlifuɛ’m be su like’n, i sɔ’n úka e maan é sí Ɲanmiɛn Kpli i su like kpa ekun.​—An kanngan Ezai 43:10, 12 nun.

2. ?Ngue ti yɛ be fali Klistfuɛ kpa mun yoli anuannzɛ kun ɔn?

Kɛ ɔ́ kɔ́ i ɲrun’n, Izraɛlifuɛ’m be yoli maan Ɲanmiɛn yili i sa be su. Kpɛkun ɔ fali Klistfuɛ mun sinnin be osu. (Matie 21:43; 23:37, 38) Laa’n, Izraɛlifuɛ’m be ti Ɲanmiɛn i Lalofuɛ. Andɛ’n, Klistfuɛ kpa mun yɛ be ti Zoova i Lalofuɛ ɔ.​—An kanngan Sa Nga Be Yoli’n 15:14, 17 nun.

Zezi siesieli i sɔnnzɔnfuɛ mun naan be bo yo kun be kan Zoova i ndɛ. Yɛ be kle nvlenvle kwlaa be nunfuɛ’m be like naan be kaci Zezi i sɔnnzɔnfuɛ. (Matie 10:7, 11; 24:14; 28:19, 20) Junman sɔ’n w’a tɔ i ba nun. Afin andɛ’n, Zoova w’a yiayia nvlenvle kwlaa nun sran akpiakpi kpanngban yɛ be su i kɛ ɔ nin i fata’n sa. (Sa Nglo Yilɛ 7:9, 10) Asa ekun’n, Zezi seli Klistfuɛ’m be kɛ be di junman likawlɛ naan b’a kwla ukauka be wun naan kusu b’a wla be wiengu fanngan. Asiɛ wunman’n su’n, Biblu’n nun like nga be suɛn i be aɲia’n be bo le mɔcuɛ kwlaa nun’n, ɔ ti kun.​—An kanngan Ebre Mun 10:24, 25 nun.

  3. ?Wafa sɛ yɛ e blɛ liɛ’n su Zoova i Lalofuɛ’m be boli be bo ɔ?

Afuɛ nga be flɛ i 1870 nun yɛ e blɛ liɛ’n su Zoova i Lalofuɛ’m be boli be bo ɔ. Afuɛ sɔ’n nun’n, nn be ti Biblu’n nun like suanfuɛ akpasua kaan kun. Biblu’n nun ndɛ nga be wlɛ wunlɛ’n fili sran’m be ɲin’n, be wa wunnin be wlɛ. Be wunnin i wlɛ i kɛ Zezi siesieli Klistfuɛ mun naan be bo jasin fɛ’n. I sɔ’n ti’n, be wa fali be wun wlali Ɲanmiɛn Sielɛ’n i jasin fɛ’n i bolɛ’n nun. Be yoli i sɔ asiɛ wunmuan’n su. Afuɛ nga be flɛ i 1931 nun’n yɛ be wa fali dunman Zoova i Lalofuɛ’n niɔn.​—An kanngan Sa Nga Be Yoli’n 1:8 nin Yo 2:1, 4 ɔ nin Yo 5:42 nun.

4. ?Wafa sɛ yɛ Zoova i Lalofuɛ’m be siesie be ninnge mun ɔn?

Klistfuɛ klikli’m be blɛ su’n, ɔ le sran akpasua kun mɔ be nian asɔnun nga be o nvlenvle’m be nun’n, be su ɔ. I sɔfuɛ’m be wun i wlɛ kɛ Zezi yɛ ɔ ti asɔnun’n i su kpɛn’n niɔn. (Sa Nga Be Yoli’n 16:4, 5) I kunngba’n andɛ’n, Zoova i Lalofuɛ’m be wun i wlɛ kɛ Zezi yɛ ɔ ti be su kpɛn’n niɔn. (Matie 23:9, 10) Asa kusu’n, be nun sran akpasua kun o lɛ m’ɔ nian be asɔnunasɔnun 100.000 tra su mɔ be o nvlenvle’m be nun’n be su ɔ. Sran sɔ’m be ti asɔnun kpɛnngbɛn yɛ be si Ɲanmiɛn Ndɛ’n i kpa. Be jran Biblu’n su be wla be niaan’m be fanngan yɛ be kle be atin. Zoova i Lalofuɛ’m be asɔnun kwlaa nun’n, yasua mɔ be ɲin w’a ti Ɲanmiɛn i sulɛ nun kpa’n, be sie be asɔnun kpɛnngbɛn. Be nian Ɲanmiɛn i bua fa’n i lika klolɛ su.​—An kanngan 1 Piɛr 5:2, 3 nun.

Zoova i Lalofuɛ’m be siesie be asɔnunasɔnun mun naan b’a kwla bo jasin fɛ’n naan kusu’n b’a kle sran’m be like naan b’a kaci Zezi i sɔnnzɔnfuɛ. Kɛ ɔ ko yo naan b’a kwla uka sran mun lika kwlaa’n, be yi Biblu’n i akua mun aniɛnaniɛn 500 tra su nun yɛ be fa manman sran mun. Asa kusu’n, kɛ akoto’m be fa yoli’n sa’n, be bo jasin fɛ’n awloawlo’m be nun. (Sa Nga Be Yoli’n 20:20) Be se be nga be klo ndɛ nanwlɛ’n i sakpasakpa’n kɛ bé klé be Biblu’n nun like. Like nga Zoova i sran’m be ko yo naan Ɲanmiɛn i klun w’a jɔ be wun’n naan kusu’n b’a kwla uka sran mun’n, yɛ ɔ ti be cinnjin ɔn. I sɔ’n ti’n be anuannzɛ’n nun’n, be di aklunjuɛ.​—An kanngan Jue Mun 33:12 nin Sa Nga Be Yoli’n 20:35 nun.

Sɛ amun kunndɛ kɛ amún sí nun ekun’n, an nian fluwa ?Ngue like yɛ biblu’n kle i sakpasakpa ɔ? i ndɛ tre 19 nun. Zoova i Lalofuɛ mun yɛ be yili ɔ.