?Kɛ be se kɛ “mɛn’n i awieliɛ’n w’a mantan koko’n,” ngue su yɛ ɔ akunndan’n kɔ ɔ? Sran wie’m be liɛ’n, be ɲin kpɛn sran nga asɔnun’m be nun’n, Biblu’n o be sa nun mɔ be kpankpan be kan Ɲanmiɛn ndɛ’n be su. Wie’m be kusu’n, be ɲin kpɛn be nga be jran anngɔnda’m be su mɔ be kpan be se kɛ ɲrɛnnɛn sa’m be su wa ju’n be su. I sɔ’n ti, sran wie’m be bu mɛn’n i awieliɛ’n i ndɛ finfin. Sanngɛ, sran wie’m be bu i ndɛ cinnjin kpa.

Biblu’n se kɛ: “Mɛn i awieliɛ’n ɔ́ jú.” (Mat. 24:14) Biblu’n flɛ mɛn’n i awieliɛ’n i ekun kɛ “Nyanmiɛn b’ɔ kwla like kwlaa yo’n i cɛn dan’n” annzɛ “Armagedɔn.” (Ngl. 16:14, 16) Mɛn i awieliɛ’n i su ndɛ nga Ɲanmiɛn sulɛ wafa sunman be kan’n, ɔ ti sukusuku, yɛ ɔ kun srɛ. Sanngɛ, mɛn’n i awieliɛ’n i su ndɛ nga Ɲanmiɛn Ndɛ’n kan’n, ɔ ti weiin. Ɔ maan, sɛ cɛn sɔ’n te o mmua annzɛ w’a mantan koko’n, e wun i wlɛ weiin. I kpa bɔbɔ’n, Biblu’n kle e like ng’ɔ fata kɛ e yo naan y’a fite nun’n. Ndɛ akpasua nga bé bá lɛ’m be nun’n, é wá wún kɛ mɛn’n i awieliɛ’n i su ndɛ nga sran’m be kan’n, ɔ timan su. Kpɛkun, é wún i su ndɛ nga Biblu’n kan’n.

1. ASIƐ’N SU NUNNUNMAN.

   Biblu’n se kɛ: “[Ɲanmiɛn] wlali asiɛ’n i bo ase kekleke kpa! Kɛ ɔ o lɛ’n yɛ ɔ wo ɔ.” (Jue Mun 104:5) Biblu’n nun ndɛ mma ngalɛ’n, ɔ nin wie mun ekun be kle kɛ Ɲanmiɛn su nunnunman asiɛ’n. Yɛ ɔ su kplinman su kɛ asiɛ’n nunnun.​—Akunndanfuɛ’n 1:4; Ezai 45:18.

2. NÁN SANVUƐSA YƐ Ɔ́ ƝÁN SRAN MUN ƆN.

   Biblu’n kle kɛ Ɲanmiɛn sieli cɛn kun, naan cɛn sɔ’n nun yɛ mɛn’n wíe ɔ. Zezi seli kɛ: “Cɛn sɔ’n nin dɔ sɔ’n sran fi si-mɛn, anz’m bɔ be o nyanmiɛn su lɔ’n nin m bɔ n ti i Wa’n bɔbɔ e si-mɛn, saan n Si kunngba cɛ yɛ ɔ si i-ɔ. An fa sie amun klun kpa, an tran minndɛ, afin an si-man cɛn nga sa sɔ’m bé yó’n.” (Mark 13:32, 33) Nanwlɛ, Ɲanmiɛn yɛ ɔ sieli “cɛn nga” mɛn’n i awieliɛ’n jú’n niɔn.

3. Ɔ FINMAN SRAN MUN, KUSU NAAN NGLO LƆ NINNGE MUN YƐ BÉ KPÚKE Ɔ.

   Sa Nglo Yilɛ 19:11 nun’n, Zan kannin sa kun m’ɔ́ wá jú’n i ndɛ. I waan: “Yɛ n wunnin kɛ nyanmiɛn su lɔ’n ɔ tili muaan, ń nían-an, nnɛn kpanngɔ ufue kun yɛ. Sran ng’ɔ fu su’n, be flɛ i Sran-bɔ-be-kwla-fa-be-wla-guɛ-i-su nin Nanwlɛfuɛ.” Ɔ seli ekun kɛ: “N wunnin nnɛn mun nin asiɛ’n su famiɛn’m be nin be alɛfuɛ mun, be yiali kɛ be nin sran ng’ɔ fu nnɛn kpanngɔ’n su’n nin i alɛfuɛ mun bé kún.” (Sa Nglo Yilɛ 19:11-21) Sran ng’ɔ fu nnɛn kpanngɔ’n su’n nin i alɛ kunfuɛ mun’n, be yɛle Zezi nin anzi mun. Ɲanmiɛn wá súnman be naan be nunnun i kpɔfuɛ mun.

1. SRAN’M BE FAMIƐN DIWLƐ’M BE SU TRANMAN LƐ KUN.

   Biblu’n se kɛ: “Nyanmiɛn m’ɔ o nglo lɔ’n ɔ́ síe famiɛn diwlɛ kun m’ɔ su saciman le, yɛ mɛn uflɛ  su siemɛn i le. Famiɛn diwlɛ sɔ’n ɔ́ núnnún famiɛn diwlɛ kun nga mun, kpɛkun i bɔbɔ ɔ́ ká lɛ tititi.” (Daniɛl 2:44) E wunnin kɛ “asiɛ’n su famiɛn’m be nin be alɛfuɛ mun, be yiali kɛ be nin sran ng’ɔ fu nnɛn kpanngɔ’n su’n nin i alɛfuɛ mun bé kún.” Sanngɛ, asiɛ’n su famiɛn’m be nin be alɛfuɛ’m be su fiteman nun.​—Sa Nglo Yilɛ 19:19.

2. ALƐ NIN NZAJE SA MUN, Ɔ NIN SRAN LUFLE BULƐ’N BE SU TRANMAN LƐ KUN.

   Biblu’n se kɛ: “Kɛ ɔ fɛ i lele b’ɔ́ fá jú mɛn’n i awieliɛ lɔ’n, [Ɲanmiɛn] w’a yo maan alɛ kunlɛ’n w’a wie.” (Jue Mun 46:10) Ɔ se ekun kɛ: “Sran kpafuɛ mun, be yɛ bé wá trán mɛn nga nun-ɔn, bé trán be nga be nanti sein’n be mɛn’n nun. Klunwifuɛ’m be liɛ’n, bé trá be mɛn nga nun bé kɔ́. Bé tú gblɛfuɛ’m be bo.” (Nyanndra Mun 2:21, 22) Kpɛkun ɔ se kɛ: “Nian, m’an kaci like’n kwlaa uflɛ.”​—Sa Nglo Yilɛ 21:4, 5.

3. ƝANMIƐN SULƐ NGA BE TIMAN SU’N BE SU TRANMAN LƐ KUN.

   Biblu’n se kɛ: “Min nuan ijɔfuɛ’m be bo ato jasin. Min nyrun jranfuɛ’m be like nyanlɛ akunndan yɛ be bu-ɔ. [...] ?Yɛ i sin’n, amún yó i sɛ?” (Zeremi 5:31) Ɔ se ekun kɛ: “Jɔlɛ dilɛ cɛn nun’n, sran kpanngban kpa bé wá úsa n kɛ: ‘?Nannan, Nannan, ɔ dunman nun y’a kan-man Nyanmiɛn ndɛ? ?Ɔ dunman nun y’a fuan-man asiɛ usu? ?Yɛ ɔ dunman nun y’a yo-man sa kekleekle mun?’ Yɛ ń sé be kɛ: ‘Amun bɔ amun saci mmla’n, an fa jao min wun lɛ. N si-man amun mlɔnmlɔn.’”​—Matie 7:21-23.

4. BE NGA BE KLO MƐN TƐ NGA’N BE SU TRANMAN LƐ KUN.

   Zezi seli kɛ: “An nian sa ti yɛ ɔ bu be fɔ sɔ’n yɛ: i b’ɔ ti kɛ wia sa’n, ɔ bali mɛn’n nun, sanngɛ sran’m be kloli aosin’n trali wia’n be nzuɛn tɛtɛ’n ti.” (Zan 3:19) Biblu’n kan kɛ Nowe m’ɔ ti sran nanwlɛfuɛ’n i blɛ su’n, Ɲanmiɛn nunnunnin mɛn’n. I waan: ‘Nzue’n yi katali asiɛ’n su, ɔ nunnunnin laa mɛn liɛ’n. Ɲanmiɛn kunngba’n yɛ ɔ seli ekun kɛ maan be sie ɲanmiɛn su lɔ’n nin asiɛ nga be o lɛ ndɛ’n, be lɛ maan sin di be. Bé síe be lɛ lele fá jú cɛn nga bé bú sran nga be sroman Ɲanmiɛn’n be fɔ mɔ bé sáci be’n.’​—2 Piɛr 3:5-7.

Maan e sie i nzɔliɛ kɛ, “cɛn nga bé bú sran nga be sroman Ɲanmiɛn’n be fɔ mɔ bé sáci be’n,” ɔ́ yó kɛ Nowe i blɛ su “mɛn liɛ’n” i nunnunlɛ’n sa. Nowe blɛ su’n, Ɲanmiɛn w’a nunnunman asiɛ’n. Sanngɛ, “sran nga be sroman Nyanmiɛn’n,” be yɛ Ɲanmiɛn “nunnunnin” be ɔ. I wafa kunngba’n, mɛn’n i awieliɛ’n nun’n, “bé bú sran nga be sro-man Nyanmiɛn’n be fɔ.” Yɛle kɛ bé núnnún be. Sanngɛ, Ɲanmiɛn yáci i janvuɛ’m be lɛ kɛ ng’ɔ yacili Nowe nin i awlofuɛ’m be lɛ’n sa.​—Matie 24:37-42.

Kɛ Ɲanmiɛn wá núnnún be nga be saci asiɛ’n, nanwlɛ, asiɛ’n wá yó klanman dan. Ɔ maan, mɛn’n i awieliɛ’n i su ndɛ nga Biblu’n kan’n, ɔ ti ndɛ fɛ. Sanngɛ atrɛkpa’n, a usa ɔ wun kɛ: “?Biblu’n kle cɛn nga mɛn’n i awieliɛ’n jú’n? ?W’a mantan koko? ?Ngue yɛ ń yó naan m’an fite nun ɔn?”