?Ɲanmiɛn yáci sran’m be lɛ naan be kle be wiengu ɲrɛnnɛn trilili? Cɛcɛ. Ndɛ akpasua ng’ɔ sinnin lɛ’n, ɔ kleli kɛ Ɲanmiɛn wá yó maan sran’m be su kleman be wiengu ɲrɛnnɛn kun. Ɲanmiɛn m’ɔ yili sran nin asiɛ’n, ɔ kunndɛ kɛ a si blɛ ng’ɔ́ wá yó i sɔ liɛ’n. ?Ngue yɛ ɔ fa mannin e naan y’a si blɛ sɔ’n niɔn?

Maan e fa sunnzun ase kun e nian. Kɛ sran wie’m bé kɔ́ lika’n, be fa fluwa kun be tra nun. Lika ng’ɔ fata kɛ be sin’n, ɔ nin nzɔliɛ nga be o atin’n su’n, be klɛklɛ fluwa’n su. Ɔ maan, kɛ sran kun kɔ́ lika m’ɔ wun nzɔliɛ nga be kle kɛ w’a wie ju’n, i wla’n gua ase. I wafa kunngba’n, Ɲanmiɛn fɛli i Ndɛ’n mannin e. I Ndɛ sɔ’n nun’n, ɔ kle e sa nga bé jú mɔ é wún i wlɛ kɛ mɛn’n i awieliɛ’n w’a mantan koko’n. Kɛ e wun kɛ sa sɔ’m be su ju’n, e lafi su kɛ e o mɛn’n i bue nuan.

Biblu’n kle kɛ sa wie’m bé wá jú mɛn wunmuan’n nun. Naan kɛ mɛn’n wá jú i bue nuan’n, yɛ é wún sa sɔ’m be kpa ɔ. Wafa nga sa sɔ’m bé jú’n, awlanmannun’n, be nin a wunmɛn i sɔ le. Sa sɔ’m be nun wie mun yɛ:

1. MƐN’N YÓ TƐ: Matie ndɛ tre 24 kan sa wie mɔ bé wá jú asiɛ’n su’n, be ndɛ. Sa sɔ’m be ti “mɛn’n i awieliɛ’n” i nzɔliɛ. Yɛle kɛ bé jú, i sin yɛ “mɛn i awieliɛ’n ɔ́ jú-ɔ.” (Matie 24:3, 14) I wie yɛle kɛ sran’m bé kún alɛ, awe’n kpɛ́n, asiɛ’n kéje lika wie’m be nun, sa tɛtɛ’m bé sɔ́n, sran klolɛ’n wíe, sran wie’m bé tɔ́n be wun suɛn kɛ be ti Ɲanmiɛn nuan ijɔfuɛ yɛ bé láka sran mun. (Matie 24:6-26) Ɔ ti su kɛ sa sɔ’m be juli laa. Sanngɛ, kɛ mɛn’n wá jú i bue nuan’n, sa kwlaa sɔ’m bé jú asiɛ wunmuan’n su blɛ kunngba’n nun. Yɛ sa wie mun ekun bé jú.

2. SRAN’M BE AYELIƐ’N: Biblu’n se kɛ, kɛ “mɛn’n ɔ́ kɔ́ i bue nuan’n,” sran’m be ayeliɛ’n yó tɛ dan. I waan: “Sran’m bé bú be bɔbɔ be wun akunndan, bé yó sika klofuɛ, bé dí be nuan, bé tú be wun, bé sáci Nyanmiɛn wun, be nyin su yi-man be si nin be nin mun, be su si-man ye, be nyin su yi-man Nyanmiɛn, be su klo-man sran, be yo be sa-a be su yaci cɛ-man, bé dí abla, be su si-man be wun su nian, bé yó wlɛ, bé kpɔ́ sran kpa mun, bé yí be janvuɛ mun mán, bé yó like-ɔ be su bu-mɛn i akunndan, bé dí tutre, bé kló mɛn dilɛ’n trá Nyanmiɛn.” (2 Timote 3:1-4) Ɲin kekle yolɛ’n finman andɛ. Sanngɛ, kɛ “mɛn’n ɔ́ kɔ́ i bue nuan’n,” ɲin kekle yolɛ’n wá yó dan. Ɔ maan “lika’n ɔ́ yó kekle.” ?Like nga sran’m be yo m’ɔ kle kɛ be ayeliɛ’n w’a yo tɛ dan’n, w’a sie i nzɔliɛ?

3. SRAN’M BE SÁCI ASIƐ’N: Biblu’n se kɛ Ɲanmiɛn wá “núnnún be nga be saci asiɛ’n.” (Sa Nglo Yilɛ 11:18) ?Wafa sɛ yɛ sran’m be saci asiɛ’n niɔn? Nowe blɛ su’n, sran’m be sacili asiɛ’n. Biblu’n waan: “I blɛ sɔ nun’n, wuun mɛn wunmuan’n nun sran’m b’a saci mlɔnmlɔn. Sa kekleekle mun yɛ sran’m be yo-ɔ. Nyanmiɛn nían asiɛ nin-ɔn, ɔ wunnin kɛ w’a wie saci.” (Bo Bolɛ 6:11-13) ?A sie i nzɔliɛ kɛ sran’m be su yo sa kekleekle mun dan asiɛ wunmuan’n su? E blɛ liɛ nga ti i liɛ ngunmin. Alɛ ninnge nga sran’m b’a yi be’n, be kwla fa nunnun sran’m be kwlakwla. Asa ekun’n, be saci jenvie’n, ɔ nin bo mun. Be saci lika’n. Ɔ maan, e kwlá loman wunmiɛn. Yɛ b’a wie nnɛn’m be kun.

Laa’n, ninnge nga sran’m be yi be’n, be kwla fa saciman asiɛ’n su ninnge’m be sekeseke. Sanngɛ siɛn’n, be le i sɔ ninnge mun kpanngban be fa saci asiɛ’n. Sran’m b’a yi ninnge mun lele be  wunman be yowlɛ kun. Sanngɛ, sɛ asiɛ’n núnnún annzɛ ɔ su nunnunman’n, nán sran mun yɛ bé fɛ́ i wun ajalɛ ɔ. Afin Ɲanmiɛn su kplinman su kɛ sran’m be yo i sɔ like’n. I kpa bɔbɔ’n, ɔ seli kɛ ɔ́ wá núnnún be nga be saci asiɛ’n.

4. BÉ WÁ BÓ JASIN FƐ’N MƐN WUNMUAN’N NUN: Like kun ekun m’ɔ́ wá klé kɛ e o mɛn’n i bue nuan’n, yɛle junman dan kun mɔ be nin a dimɛn i wunsu sɔ le’n. Ɲanmiɛn Ndɛ’n se kɛ: “Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n. I sin yɛ mɛn i awieliɛ’n ɔ́ jú-ɔ.” (Matie 24:14) Ɲanmiɛn sulɛ wafa sunman be kan Ɲanmiɛn i ndɛ titi. Sanngɛ, nɛ́n i ndɛ kanlɛ sɔ’n yɛ ɔ ti jasin fɛ nga bé wá bó i mɛn wunmuan’n nun’n niɔn. Kɛ mɛn’n wá kɔ́ i bue nuan’n, jasin fɛ nga bé wá bó’n, yɛle ‘Ɲanmiɛn Sielɛ’n i jasin fɛ’n.’ ?Ɲanmiɛn sulɛ wafa benin yɛ a sie i nzɔliɛ kɛ ɔ bo jasin fɛ sɔ’n niɔn? Sran wie’m be tɔn be wun suɛn kɛ be bo jasin fɛ sɔ’n. Sanngɛ, e wunman kɛ be bo ti kun. Yɛ e wunman kɛ be bo Ɲanmiɛn Sielɛ’n i jasin fɛ’n “mɛn wunmuan’n nun naan sran’n kwlaa be ti Nyanmiɛn ndɛ’n.”

Ɛntɛnɛti adrɛsi www.mr1310.com fa sran’m be ɲin sie i ‘Ɲanmiɛn Sielɛ’n i jasin fɛ’n’ su. Yɛ fluwa kpanngban nga be o jw.org su’n, be yiyi jasin fɛ’n sɔ’n nun aniɛn 700 tra su nun. ?Sran benin mun yɛ a wun kɛ Ɲanmiɛn Sielɛ’n i ndɛ kanlɛ’n ti be cinnjin kɛ ngalɛ’n sa ekun ɔn? I nun mɔ ɛntɛnɛti nin a juman su’n, sran’m be wunnin kɛ Zoova i Lalofuɛ’m be boli Ɲanmiɛn Sielɛ’n i jasin fɛ’n titi. Kɛ ɔ fɛ i afuɛ 1939 nun’n, ndɛ ng’ɔ klɛ Sasafuɛ Tranwlɛ’n i bui’n su’n yɛle kɛ “Sasafuɛ Tranwlɛ’n bo Zoova i Sielɛ Blɛ’n i jɔ.” Fluwa kun kannin jasin fɛ’n mɔ Zoova i Lalofuɛ’m be bo’n, i ndɛ. Ɔ seli kɛ wafa nga be wla be wun ase be bo jasin fɛ’n, ɔ leman wunsu. I sɔ’n kle wein kɛ ɔ ka kan “mɛn i awieliɛ’n ɔ́ jú.”

?Sa nnan nga Biblu’n kan be ndɛ mɔ ndɛ akpasua nga w’a yiyi be nun yɛ’n, a wun wafa nga be kpɛn su titi’n? I afuɛ ya kun tra su yɛ, Sasafuɛ Tranwlɛ’n kan sa nga be ju mɛn nun’n be ndɛ titi naan sran nga be kanngan nun’n, be wun i wlɛ kɛ mɛn’n i awieliɛ’n w’a mantan koko sakpa. Sanngɛ, sran wie’m be bumɛn i nanwlɛ. Be waan ɔ ti ndɛ blɔlɛ. Asa ekun’n, be waan sa nga be ju siɛn’n, be su ndɛ’n tru ndɛndɛ. Naan i sɔ’n ti yɛ  sran’m be bu i kɛ mɛn’n su yo tɛ trá laa’n niɔn. Sanngɛ sran sunman be wun i wlɛ wein kɛ blɛ nga e o nun yɛ’n, ɔ ti i liɛ ngunmin naan e o mɛn’n i bue nuan.

Fluwa sifuɛ dandan wie’m be wun i wlɛ kɛ sa cinnjin kpa wie’m be su wa ju asiɛ’n su. Afuɛ 2014 nun’n, be nun wie’m be kannin kɛ sɛ sran’m b’a nianman be wun kpa’n, ninnge nga be yi be’n ti’n, sa kekleekle’m bé tɔ́ mɛn’n nun. Be kannin sɔ naan nvlenvle’m be anuannzɛ nga be flɛ i ONU, ɔ fɛ i ɲin sie sa sɔ’m be su. Nanwlɛ, sran sunman be wun i wlɛ kɛ blɛ nga e o nun yɛ’n, ɔ ti i liɛ ngunmin. Be nga be yi Sasafuɛ Tranwlɛ’n, ɔ nin be nga be kanngan nun’n, be wun i wlɛ kɛ mɛn’n i awieliɛ’n w’a mantan koko. Sanngɛ, ɔ fataman kɛ srɛ kun ɔ. Afin a kwla fite nun.