Fluwa’n nun kannganfuɛ’m be kosan mun
?Be nga be timan Klistfuɛ’n be kannin Pɔnsu Pilati i ndɛ be fluwa’m be nun?
Be nga be kanngan Biblu’n nun titi’n, be si Pɔnsu Pilati i wun ndɛ. Afin, ɔ yoli maan be kleli Zezi i ɲrɛnnɛn yɛ be boboli i waka’n su. (Mat. 27:1, 2, 24-26) Sanngɛ, Pɔnsu Pilati i blɛ su sran wie mɔ be timan Klistfuɛ’n, be kɛnnin i ndɛ be fluwa’m be nun wie. Fluwa kun waan laa fluwa nga nán Klistfuɛ mun yɛ be klɛli be’n, be kannin Pɔnsu Pilati i “wun ndɛ kpanngban trali Rɔmu kpɛnngbɛn kwlaa nga be sieli Zide mɛn’n.”
Be flɛ Zuifu bian kun kɛ Zozɛfu. Yɛ ɔ suan laa sa’m be su like. Ɔ kannin Pɔnsu Pilati i ndɛ kpɛ sunman i fluwa’m be nun. I wie yɛle kɛ, ɔ kannin sa nga kɛ Pɔnsu Pilati síe Zide mɛn’n be juli mɔ be miɛnnin i sa’n, be nun nsan be ndɛ. Be flɛ Zuifu bian kun kɛ Filo. Ɔ kannin sa’n i nnan su m’ɔ miannin Pɔnsu Pilati i sa dan’n i ndɛ. Be flɛ Rɔmufuɛ kun kɛ Tasiti. Ɔ klɛli laa Rɔmu siefuɛ’m be wun ndɛ. Ɔ kɛnnin i weiin kɛ blɛ mɔ Tibɛli Sezali dí kpɛnngbɛn’n, Pɔnsu Pilati mannin atin kɛ be bobo Zezi waka’n su.
Be flɛ Izraɛli lɔ klɔ nvuɛn kun kɛ Sezare. Rɔmufuɛ’m be sieli klɔ sɔ’n i laa. Afuɛ 1961 nun’n, be nga be fufu asiɛ’n be kunndɛ laa ninnge mun’n, be wunnin yɛbuɛ kun klɔ sɔ’n su lɔ. Ndɛ kun mɔ be klɛli i yɛbuɛ sɔ’n su’n, Pɔnsu Pilati i dunman’n o nun. Bɛ klɛli i kɛ: “Nannan Pɔnsu Pilati m’ɔ sie Zide mɛn’n, ɔ kplannin sua nga mannin amuɛn mun.” Atrɛkpa’n, ɔ kplannin sua sɔ’n fa yili Rɔmu siefuɛ nga be flɛ i Tibɛli’n i ayɛ.
?Sɛ Klistfuɛ bla kun klé sran kun i Biblu’n nun like naan jasin bofuɛ yasua kun o lɛ’n, ɔ fata kɛ ɔ kɛtɛ i ti’n su?
Afuɛ 2002, Zuie 15, Sasafuɛ Tranwlɛ’n i bue 26-27 tɛli fluwa’n nun kannganfuɛ’m be kosan sɔ’n su. Ɔ seli kɛ sɛ Klistfuɛ bla kun klé sran kun i Biblu’n nun like naan jasin bofuɛ yasua kun o lɛ’n, kannzɛ be nin a yoman yasua sɔ’n i batɛmu bɔbɔ’n, ɔ fata kɛ aniaan bla’n kɛtɛ i ti’n su. Sanngɛ, e wa fali e ɲin e sieli kosan sɔ’n i su kpa ekun. Ɔ maan, e wunnin kɛ ɔ fata kɛ e tinngɛ i su tɛlɛ’n i kan.
Sɛ b’a yo jasin bofuɛ yasua’n i batɛmu’n, aniaan bla m’ɔ su kle sran like’n kwla kɛtɛ i ti’n su. Kɛ ɔ yo sɔ’n, ɔ kle kɛ i ɲin yi Zoova. Afin Zoova kleli kɛ yasua mun yɛ ɔ fata kɛ be kle like asɔnun’n nun ɔn. (1 Kor. 11:5, 6, 10) Sɛ jasin bofuɛ yasua’n kwla kle sran’n i like’n, aniaan bla’n kwla se i kɛ ɔ kle i like cɛn sɔ’n nun.
Sɛ be nin a yoman jasin bofuɛ yasua’n i batɛmu, naan kusu aniaan bla’n timɛn i yi’n, Ɲanmiɛn Ndɛ’n kleman kɛ saan fii aniaan bla’n kɛtɛ i ti’n su. Sanngɛ, aniaan bla wie’m be kunndɛman kɛ be klun akunndan’n bu be fɔ. I sɔ’n ti’n, be kpɛ i kpo be kata be ti’n su.
