Hukom 4:1-24
4 Alagad pagkagadan ni Ehud, ginibo na naman kan mga Israelita an maraot sa paghiling ni Jehova.+
2 Kaya itinao* sinda ni Jehova sa kamot ni Jabin na hadi kan Canaan,+ na naghahadi sa Hazor. An pamayo kan saiyang hukbo iyo si Sisera, na nakaistar sa Haroset+ kan mga nasyon.*
3 Nag-apod an mga Israelita ki Jehova,+ huling igwa si Jabin* nin 900 na karwaheng panggiyera na may mga karit na lansang,*+ asin grabe an ginibo niyang pang-aapi sa mga Israelita+ sa laog nin 20 taon.
4 Kan panahon na iyan, si Debora, na sarong propetisa+ asin agom ni Lappidot, an nagseserbing hukom sa Israel.
5 Parating nagtutukaw si Debora sa sirong kan saiyang puon nin palma na nasa pag-ultanan kan Rama+ asin Bethel+ sa kabukidan nin Efraim; nagduduman sa saiya an mga Israelita para aramon an mga paghusgar nin Diyos.
6 Ipinaapod niya si Barak+ na aki ni Abinoam hali sa Kedes-neftali+ asin sinabihan ini: “Bakong may itinaong pagbuot si Jehova na Diyos kan Israel? ‘Magduman ka sa Bukid nin Tabor, asin mag-iba ka nin 10,000 na lalaki hali sa tribo ni Neftali asin Zebulon.
7 Dadarahon ko sa saimo sa sapa* nin Kison+ si Sisera, an pamayo kan hukbo ni Jabin, pati an saiyang mga karwaheng panggiyera saka an saiyang mga suldados, asin itatao ko siya sa saimong kamot.’”+
8 Nagsabi sa saiya si Barak: “Kun maiba ka sako, maduman ako, pero kun dai ka maiba sako, dai ako maduman.”
9 Huli kaini, nagsabi siya: “Iyo, maiba ako saimo. Pero bako saimo mapapaduman an kaumawan sa gigibuhon mong pakikilaban na ini, huling sa kamot nin sarong babayi itatao ni Jehova si Sisera.”+ Dangan nagtindog si Debora asin uminiba ki Barak paduman sa Kedes.+
10 Ipinaapod ni Barak sa Kedes an Zebulon saka an Neftali,+ asin 10,000 na lalaki an nagsunod sa saiya. Nag-iba man sa saiya si Debora.
11 Si Heber na Kenita suminuway sa iba pang mga Kenita,+ na mga gikan ni Hobab, na panugangan ni Moises,+ asin itinindog niya an saiyang tolda harani sa dakulang kahoy sa Zaananim, na nasa Kedes.
12 Ibinareta ninda ki Sisera na nagtukad si Barak na aki ni Abinoam sa Bukid nin Tabor.+
13 Dali-daling tinipon ni Sisera an gabos niyang karwaheng panggiyera—900 na karwahe na may mga karit na lansang*—saka an gabos na suldados na kaiba niya tanganing magpasiring sa sapa* nin Kison+ hali sa Haroset kan mga nasyon.
14 Sinabi ngunyan ni Debora ki Barak: “Lakaw na, huli ta ini an aldaw na itatao ni Jehova sa kamot mo si Sisera. Bakong nasa inutan mo si Jehova?” Asin buminaba si Barak hali sa Bukid nin Tabor kaiba an 10,000 na lalaki na nagsusunod sa saiya.
15 Dangan rinibaraw+ ni Jehova si Sisera saka an gabos niyang karwaheng panggiyera asin an bilog niyang hukbo asin linaglag sinda paagi sa espada ni Barak. Kan huri, buminaba si Sisera sa saiyang karwahe asin duminalagan padulag.
16 Linapag ni Barak an mga karwaheng panggiyera asin an hukbo sagkod sa Haroset kan mga nasyon. Kaya nagadan an gabos na suldados ni Sisera paagi sa espada; mayo ni sarong natada.+
17 Pero nakadulag si Sisera pasiring sa tolda ni Jael+ na agom ni Heber+ na Kenita, huling igwa nin katuninungan sa pag-ultanan ni Jabin+ na hadi kan Hazor asin kan pamilya* ni Heber na Kenita.
18 Dangan nagluwas si Jael para sabaton si Sisera asin sinabihan niya ini: “Magdagos ka tabi, kagurangnan ko. Dai ka matakot.” Kaya naglaog siya sa tolda ni Jael, asin tinamungan siya ni Jael.
19 Dangan nagsabi si Sisera sa saiya: “Tawan mo tabi akong tubig, ta paha na ako.” Kaya binukasan niya an sarong lalagan na anit na may laog na gatas asin pinainom niya ini,+ tapos tinamungan niya giraray ini.
20 Sinabihan pa siya ni Sisera: “Magtindog ka sa may laugan kan tolda, tapos kun may mag-abot asin maghapot saimo, ‘May nagdigding lalaki?’ sabihon mo, ‘Mayo!’”
21 Pero nagkua si Jael na agom ni Heber nin taldok na pantolda asin malyete. Dangan mantang turugon si Sisera asin pagal-pagal, luway-luway siyang nagrani sa saiya asin ipinalpal* niya sa saiyang sentido an taldok na pantolda sagkod na tumadok iyan sa daga, asin nagadan si Sisera.+
22 Nagduman si Barak para hanapon si Sisera. Nagluwas si Jael para sabaton siya asin nagsabi: “Madya asin ipapahiling ko saimo an lalaking hinahanap mo.” Nag-iba siya sa saiya asin naglaog sa saiyang tolda, tapos nahiling niya duman si Sisera na nakahigda asin gadan na, na may nakalagbas na taldok na pantolda sa mga sentido.
23 Kaya kan aldaw na idto, tinawan nin Diyos nin kapangganahan an mga Israelita laban ki Jabin na hadi kan Canaan.+
24 Asin dagos-dagos an pandadaog kan mga Israelita ki Jabin na hadi kan Canaan,+ sagkod na magadan ninda si Jabin na hadi kan Canaan.+
Mga Nota
^ Sa literal, “ipinabakal.”
^ O “sa Haroset-ha-goiim.”
^ Sa literal, “siya.”
^ Sa literal, “karwaheng lansang.”
^ O “sulugan na kababan.”
^ Sa literal, “karwaheng lansang.”
^ O “sulugan na kababan.”
^ Sa literal, “harong.”
^ O “pinatadom.”
