Jeremias 29:1-32
29 Ini an mga tataramon sa surat ni Jeremias na propeta hali sa Jerusalem na ipinadara niya sa iba pang kamagurangan na kaiba sa banwaan na puwersahan na pinahali,* sa mga saserdote, sa mga propeta, asin sa bilog na banwaan, na puwersahan na dinara* ni Nabucodonosor haling Jerusalem pasiring sa Babilonya;
2 ipinadara niya ini pagkatapos na makahali sa Jerusalem si Hading Jeconias,+ an inang reyna,*+ an mga opisyal kan palasyo, an mga halangkaw na opisyal* kan Juda asin Jerusalem, asin an mga ekspertong trabahador saka mga panday.*+
3 Ipinadara niya an surat paagi ki Elasa na aki ni Safan+ asin Gemarias na aki ni Hilkias, na isinugo sa Babilonya ni Hading Zedekias+ kan Juda ki Hading Nabucodonosor kan Babilonya. An sabi sa surat:
4 “Ini an sabi ni Jehova na pamayo nin mga hukbo, an Diyos kan Israel, sa bilog na banwaan na pinangyari kong puwersahan na darahon hali sa Jerusalem pasiring sa Babilonya,
5 ‘Magtugdok kamo nin mga harong asin istaran nindo an mga iyan. Maggibo kamo nin mga hardin asin kakanon nindo an mga bunga kan mga iyan.
6 Mag-agom kamo asin magkaaki nin mga lalaki saka babayi; paagumon nindo an mga aki nindong lalaki asin ipaagom nindo an mga aki nindong babayi, tanganing magkaigwa man sinda nin mga aking lalaki saka babayi. Magpakadakul kamo diyan, asin dai kamo magdiit.
7 Asin suportaran nindo an katuninungan kan siyudad kun sain ko kamo puwersahan na dinara, asin ipamibi nindo iyan ki Jehova, huling kun may katuninungan diyan, magkakaigwa man kamo nin katuninungan.+
8 Huli ta ini an sabi ni Jehova na pamayo nin mga hukbo, an Diyos kan Israel: “Dai kamo magpaloko sa mga propeta asin mga parahula na kaibanan nindo,+ asin dai kamo magdangog sa mga pangaturugan ninda.
9 Huling ‘nagpopropesiya sinda sa saindo nin mga kaputikan sa ngaran ko. Dai ko sinda isinugo,’+ an sabi ni Jehova.”’”
10 “Huli ta ini an sabi ni Jehova, ‘Pag natapos na an 70 taon sa Babilonya, tatawan ko kamo nin atensiyon,+ asin uutubon ko an panuga kong ibalik kamo sa lugar na ini.’+
11 “‘Huli ta aram kong marhay kun ano an gusto kong gibuhon para sa saindo,’ an sabi ni Jehova, ‘an tawan kamo nin katuninungan, asin bakong kapahamakan,+ tanganing magkaigwa kamo nin magayon na puturo asin paglaom.+
12 Asin maapod kamo sa sako asin madurulok saka mamimibi sa sako, asin dadangugon ko kamo.’+
13 “‘Hahanapon nindo ako asin manunumpungan nindo ako,+ ta bilog na puso nindo akong hahanapon.+
14 Asin itutugot kong manumpungan nindo ako,’+ an sabi ni Jehova. ‘Asin titipunon ko an mga nabihag sa saindo asin sararo ko kamong kukuanon sa gabos na nasyon asin lugar kun sain ko kamo iwinararak,’+ an sabi ni Jehova. ‘Asin ibabalik ko kamo sa lugar na hali diyan pinangyari kong puwersahan kamong kuruanon.’+
15 “Pero sinabi nindo, ‘Tinawan na kami ni Jehova nin mga propeta sa Babilonya.’
16 “Huli ta ini an sabi ni Jehova sa hadi na nakatukaw sa trono ni David+ asin sa bilog na banwaan na nag-iistar sa siyudad na ini, su mga tugang nindo na dai nindo kaibang puwersahan na pinahali,
17 ‘Ini an sabi ni Jehova na pamayo nin mga hukbo: “Ipapadara ko laban sa sainda an espada, an tiggutom, asin an epidemya,*+ asin gigibuhon ko sindang siring sa lapang* mga bungang igos na grabeng kanos mala ta dai iyan makakan.”’+
18 “‘Asin lalapagon ko sinda paagi sa espada,+ tiggutom, asin epidemya, asin gigibuhon ko sindang sarong bagay na magigin dahilan na an gabos na kahadian sa daga tarakigan,+ asin sarong sumpa, asin sarong bagay na pagngangalasan, sarong bagay na tataghuyan,+ asin sarong katuyawan sa tahaw kan gabos na nasyon na diyan iwinawarak ko sinda,+
19 huling dai sinda nagdangog sa sakuyang mga tataramon na ipinaabot ko sa sainda paagi kan mga lingkod kong propeta,’ an sabi ni Jehova, ‘na isinusugo ko nin pauruutro.’*+
“‘Pero pati kamo dai nagdangog,’+ an sabi ni Jehova.
20 “Kaya, danguga nindo an tataramon ni Jehova, kamo gabos na puwersahan na dinara, na pinahali ko sa Jerusalem pasiring sa Babilonya.
21 Ini an sabi ni Jehova na pamayo nin mga hukbo, an Diyos kan Israel, manungod ki Ahab na aki ni Kolaias asin ki Zedekias na aki ni Maaseias, na nagpopropesiya nin mga kaputikan sa saindo sa ngaran ko,+ ‘Itatao ko sinda sa kamot ni Hading Nabucodonosor* kan Babilonya, asin gagadanon niya sinda sa atubangan nindo.
22 Asin an mangyayari sa sainda gagamiton kan gabos na taga Juda na puwersahan na dinara sa Babilonya sa pagmaldisyon sa iba: “Lugod na gibuhon ka ni Jehova na magin arog ni Zedekias asin Ahab, na isinugba* sa kalayo kan hadi kan Babilonya!”
23 huling guminawi sinda nin makasusupog sa Israel.+ Nakikisambay sinda sa mga agom na babayi kan saindang kapwa asin nagtataram nin putik na mga tataramon sa ngaran ko na dai ko man ipinagbuot sa sainda.+
“‘“Ako an Saro na nakakaaram, asin saksi ako,”+ an sabi ni Jehova.’”
24 “Asin sabihon mo ki Semaias+ na taga Nehelam,
25 ‘Ini an sabi ni Jehova na pamayo nin mga hukbo, an Diyos kan Israel: “Huling nagpadara ka nin mga surat sa ngaran mo sa bilog na banwaan na yaon sa Jerusalem, ki Sofonias+ na saserdote na aki ni Maaseias, asin sa gabos na saserdote, na nagsasabi,
26 ‘Ginibo kang saserdote ni Jehova na magin kasalida ni Jehoiada na saserdote tanganing mamahala sa harong ni Jehova, tanganing dakupon an siisay man na bua na minagawing siring sa propeta asin tanganing ibugtak siya sa mga pandog* na pambitis asin sa pandog na pangkamot saka pangliog;*+
27 taano baya ta dai mo sinaway si Jeremias na taga Anatot,+ na minagawing siring sa propeta diyan sa saindo?+
28 Nagpadara pa ngani siya nin mensahe sa samuya sa Babilonya, na nagsasabi: “Mahahaloy pa! Magtugdok kamo nin mga harong asin istaran nindo an mga iyan. Maggibo kamo nin mga hardin asin kakanon nindo an mga bunga kan mga iyan,+—”’”’”
29 Kan basahon ni Sofonias+ na saserdote an surat na ini mantang nagdadangog si Jeremias na propeta,
30 uminabot ki Jeremias an tataramon ni Jehova, na an sabi:
31 “Ipadara mo an mensaheng ini sa gabos na puwersahan na pinahali, ‘Ini an sabi ni Jehova manungod ki Semaias na taga Nehelam: “Huling nagpropesiya sa saindo si Semaias, dawa dai ko man siya isinugo, asin pinurbaran niyang papaniwalaon kamo sa mga kaputikan,+
32 ini ngunyan an sabi ni Jehova, ‘Ibabaling ko an sakong atensiyon laban ki Semaias na taga Nehelam asin sa mga gikan niya. Mayo ni saro sa mga gikan niya na kabilang sa banwaan na ini an makakaligtas, asin dai niya mahihiling an karahayan na gigibuhon ko para sa banwaan ko,’ an sabi ni Jehova, ‘ta dinadagka niya an banwaan na magrebelde ki Jehova.’”’”
Mga Nota
^ O “banwaan na idinistiyero.”
^ O “na idinistiyero.”
^ O “an senyora.”
^ O “mga prinsipe.”
^ O posibleng “mga paratugdok nin kuta.”
^ O posibleng “nagburuka nang.”
^ O “hilang.”
^ Sa literal, “na nagbabangon nin amay asin nagsusugo.”
^ Sa literal, “Nabucodorosor,” saro pang ispeling kan pangaran.
^ O “inihaw.”
^ O “asin sa lansang na ipitan nin liog.”
