Linalang ni Jehova si Adan asin Eva na may oportunidad na mabuhay nin daing sagkod sa Paraiso. Pinakaraot ni Satanas an ngaran nin Dios asin kinuestion an Saiyang deretso na mamahala. Uminayon si Adan asin Eva sa pagrebelde ni Satanas, na nagresulta sa kasalan asin kagadanan ninda mismo saka kan mga naggikan sa sainda

Sinentensiahan ni Jehova an mga rebelde asin nanuga na maabot an Paraligtas, o Banhi, na malaglag ki Satanas saka mahale kan gabos na epekto nin pagrebelde asin kasalan

Si Jehova nanuga ki Abraham asin David na sinda magigin apoon kan Banhi, o Mesiyas, na mamamahala bilang Hade sagkod lamang

Pinasabngan ni Jehova an mga propeta na ihula na an Mesiyas matao nin solusyon tanganing mahale an kasalan asin kagadanan. Sia, na may kairibang mamamahala, mareynar bilang Hade kan Kahadean nin Dios, na iyo an mahale sa mga guerra, helang, patin kagadanan

Isinugo ni Jehova an saiyang Aki pasiring sa daga asin ipinamidbid si Jesus bilang an Mesiyas. Si Jesus naghulit manongod sa Kahadean nin Dios asin itinao an saiyang buhay bilang atang. Dangan sia binuhay liwat ni Jehova bilang sarong espiritu

Pinatukaw ni Jehova sa trono an saiyang Aki bilang Hade sa langit, na tanda na nagpoon na an huring mga aldaw kan sistemang ini nin mga bagay. Ginigiyahan ni Jesus an saiyang mga parasunod digdi sa daga mantang ihinuhulit ninda an Kahadean nin Dios sa bilog na daga

Pinagbotan ni Jehova an saiyang Aki na ipaabot sa daga an pamamahala kan Kahadean. Lalaglagon kan Kahadean an gabos na maraot na gobyerno, eestablisaron an Paraiso, asin gigibohon na sangkap an maimbod na mga tawo. Mabibindikar an deretso ni Jehova na mamahala, asin mapapakangbanal an saiyang ngaran sagkod lamang