IGWA daw nin siisay man na tawo na magdadanay na maimbod sa Dios kun babaloon nin lubos asin kun an pagkuyog garo baga dai matao nin materyal na mga pakinabang? An hapot na iyan pinalataw​—asin nasimbag—​may koneksion sa sarong tawo na an ngaran Job.

Mantang an mga Israelita nasa Egipto pa, si Job, na paryente ni Abraham, nakaistar sa lugar na inaapod ngonyan na Arabia. Mientras tanto, an mga anghel sa langit nagtiripon sa atubangan nin Dios, asin an rebeldeng si Satanas kaiba ninda. Sa pagtiripon na iyan sa langit, ipinahayag ni Jehova an kompiansa nia sa saiyang maimbod na lingkod na si Job. Sa katunayan, sinabi ni Jehova na mayong ibang tawo na may integridad na kapareho kan ki Job. Alagad iininsistir ni Satanas na si Job naglilingkod sana sa Dios huling sia binebendisyonan asin pinoprotehiran nin Dios. Sinabi ni Satanas na kun hahaleon ki Job an gabos na bagay na yaon sa saiya, susumpaon nia an Dios.

Tinogotan nin Dios si Satanas na haleon ki Job enot an saiyang kayamanan asin mga aki, dangan an saiyang marahay na salud. Huling dai aram ni Job na si Satanas an naggibo kan gabos na ini, dai nia masabotan kun taano ta itinogot nin Dios na agihan nia an mga pagbalong ini. Sa ibong kaiyan, si Job nungkang nagtalikod sa Dios.

May tolo na bakong totoong katood na nagduman ki Job. Sa sunod-sunod na pahayag na isinurat sa libro nin Job, salang pinagmaigotan kan mga lalaking iyan na kombensiron si Job na pinapadusahan sia nin Dios huli sa itinatagong mga kasalan. Sinabi pa ngani ninda na an Dios dai naoogma sa saiyang mga lingkod ni nagtitiwala man sa sainda. Dai inako ni Job an saindang salang pangangatanosan. May kompiansang ipinahayag ni Job na papagdadanayon nia an saiyang integridad sagkod sa kagadanan!

Alagad si Job nasala sa labi-labing pagmamaigot na ipangatanosan an saiyang sadiri. Nagtaram an mas hoben na lalaki na an ngaran Eliu, na naghihinanyog sa bilog na argumento. Sinagwe ni Eliu si Job huling dai nia nasabotan na an pagbindikar sa soberaniya ni Jehova Dios mas mahalaga nanggad kisa sa pagbindikar sa siisay man na tawo. Makosog man na sinaway ni Eliu an bakong totoong mga katood ni Job.

Dangan, si Jehova Dios nagtaram ki Job, na itinatanos an saiyang kaisipan. Paagi sa pagsambit ni Jehova sa dakol na ngangalasan sa paglalang, tinawan nia nin leksion si Job dapit sa kasaditan nin tawo kun ikokomparar sa kadakulaan nin Dios. Mapakumbabang inako ni Job an pagtatanos na iyan gikan sa Dios. Huling si Jehova “mamomoton na marhay sa kapadangatan asin maheherakon,” ibinalik nia ki Job an saiyang marahay na salud, tinawan sia nin doble kan dati niang kayamanan, asin biniyayaan sia nin sampulong aki. (Santiago 5:11) Paagi sa pagdanay na may integridad ki Jehova mantang nag-aagi nin grabeng pagbalo, mapangganang nasimbag ni Job an sahot ni Satanas na an mga tawo dai magdadanay na maimbod sa Dios kun sinda babaloon.

​—Basado sa libro nin Job.