1, 2. (a) Sa paanong paagi may pagkakaagid an presenteng sistema nin mga bagay sa sarong nasentensiyahan nang kriminal? (Hilingon an ritrato sa itaas.) (b) Ano an magigin reaksiyon kan gabos na anghel asin tawo kun paraon na an maraot na sistemang ini?

“GADAN NA NAGLALAKAW!” Iyan an ikinurahaw sa sarong kinakatakutan na kriminal kan ilinuluwas ini sa saiyang selda mantang nadadangog sa likod niya an makusog na tanog kan batbat na mga pinto. Taano ta sinasabi iyan kan mga guwardiya kan preso? Kun hihilingon makusog man an lalaki; garo mayo man siyang hilang na nakakagadan. Pero dadarahon ninda siya sa lugar na pagbibitayan sa saiya. An sentensiyadong kriminal na iyan garo na man sana gadan. *

² An presenteng sistema nin mga bagay may pagkakaagid sa kriminal na iyan na nakatalaga nang bitayon. Haloy nang nasentensiyahan an maraot na kinaban na ini asin madali na iyan na paraon. Sinasabi kan Bibliya: “An kinaban mapapara.” (1 Juan 2:17) Siguradong maabot an katapusan kaiyan. Pero, may dakulang pagkakaiba an katapusan kan kinaban na ini asin kan kriminal na idto. Sa pagbitay sa kriminal, tibaad may mga magprotesta sa sentensiya, na  kinukuwestiyon an pagigin makatanusan kaiyan o na tibaad naglalaom na maaatraso an pagbitay. Alagad sa kaso kan kinaban na ini, an nagsentensiya iyo an Soberano kan uniberso na may perpektong hustisya. (Deut. 32:4) Dai maaatraso an pagpara sa maraot na kinaban na ini, asin mayong magdududa kun baga makatanusan an sentensiyang iyan. Kun maisagibo na iyan, an gabos na tawo asin anghel talagang mauruyon na nakamtan na an hustisya. Dakulang pakaginhawa nanggad iyan!

3. Ano an pag-uulayan niyatong apat na bagay na mawawara kun mag-abot na an Kahadian nin Diyos?

³ Pero ano an kaiba sa “kinaban” na “mapapara”? An dakul sa ibinibilang kan mga tawo na permanente nang parte nin buhay sa kinaban na ini mapapara. Mamundong bareta daw iyan? Kabaliktaran nanggad! An totoo, mahalagang kabtang iyan kan ‘maugmang bareta kan Kahadian.’ (Mat. 24:14) Kaya pag-ulayan niyato ngunyan an apat na bagay na mawawara kun mag-abot na an Kahadian nin Diyos: mga maraot na tawo, mga maraot na organisasyon, mga maraot na gibo, asin makamumundong mga sitwasyon. Sa kada saro kaiyan, aaramon ta (1) kun paano kita apektado kaiyan ngunyan, (2) kun ano an gigibuhon ni Jehova sa mga iyan, asin (3) kun paano niya iyan sasalidahan nin mga bagay na talagang marahay.

4. Paano kita apektado ngunyan kan mga maraot na tawo?

⁴ Paano kita apektado ngunyan kan mga maraot na tawo? Ihinula ni apostol Pablo na magigin “delikado asin masakit [an] panahon” na kinabubuhayan niyato. Dangan, pinasabngan siyang isurat: “An mga maraot na tawo asin impostor lalo pang magigin maraot.” (2 Tim. 3:1-5, 13) Nahihiling mo daw na nauutob na an hulang iyan? Dakul sa sato an nabiktima na nin mga maraot na tawo, arog nin bayolenteng mga bully, maisog na mga panatiko, asin madahas na mga kriminal. An iba sa sainda hayagan na naggigibo nin maraot; an iba man mga impostor na nagsasagin na matanos asin na may halangkaw na pamantayan sa moral. Dawa bako kita an mismong nabiktima, apektado pa man giraray kita kan mga maraot na tawong iyan. Nangingiri kitang marhay pag nababaretaan niyato an makatatakot na mga gibo ninda. Nakakapanggirabo an daing hirak na paggadan ninda sa mga aki, gurang, asin sa mga daing kalaban-laban. Ipinapahiling kan mga gibo ninda an mga ugaling bakong sa-tawo—mga ugaling sa-hayop, sa-demonyo pa ngani. (Sant. 3:15) Marahay na sana ta sa ibong kan mamundong mga baretang iyan, may maugmang bareta sa Tataramon ni Jehova.

5. (a) Anong oportunidad an bukas pa para sa mga maraot na tawo? (b) Ano an kaaabtan kan mga maraot na tawo na habong magbago?

⁵ Ano an gigibuhon ni Jehova? Tinatawan ngunyan ni Jehova an mga maraot na tawo nin oportunidad na magbago. (Isa. 55:7) Bilang mga indibidwal, dai pa sinda nag-aako nin panghuring paghukom. An nasentensiyahan na iyo an sistemang ini sa kinaban. Pero, paano idtong mga tawo na habong magbago na padagos na masuportar sa sistemang ini sagkod sa panahon kan dakulang kahurasaan o grabeng kasakitan? Nanuga si Jehova na permanente niyang hahalion an mga maraot. (Basahon an Salmo 37:10.) Puwedeng hunaon kan mga maraot na ligtas sinda sa paghukom na iyan. Sa kinaban na ini, dakul na tawo an eksperto sa pagtago kan maraot nindang mga gibo, asin garo baga parati nindang nadudulagan an hustisya asin an mga konsekwensiya kan ginibo ninda. (Job 21:7, 9) Pero sinasabi sa sato kan Bibliya: ‘An mga mata nin Diyos yaon sa mga dalan kan tawo, asin nahihiling Niya an gabos niyang lakad. Dai nin kadikluman ni [madiklom na] limpoy na matataguan kan mga naggigiribo nin karatan.’ (Job 34:21, 22) Mayo nin maitatago sa Diyos na Jehova. Daing impostor na makakadaya sa Saiya; dai nin limpoy, gurano man iyan kadiklom, na makakatahob sa paghiling  nin Diyos para maaraman niya kun ano an totoo. Dangan, pagkatapos kan Armagedon, hanapon man niyato an mga maraot, dai na niyato sinda manunumpungan. Mawawara na sinda—sagkod lamang!—Sal. 37:12-15.

6. Sairisay an matatada pag nawara na an mga maraot na tawo, asin taano ta maugmang bareta iyan?

⁶ Sairisay an matatada pag nawara na an mga maraot na tawo? Itinao ni Jehova an magayunon na panugang ini: ‘An daga masasadirihan kan mga mahuyo, mamumuhay sinda sa [labi-labing] katuninungan.’ Mababasa pa niyato sa salmo man sanang iyan: ‘Masasadirihan kan mga matanos an daga asin mag-iirok sinda duman sagkod lamang.’ (Sal. 37:11, 29, An Marahay na Bareta Biblia) Sairisay an mga “mahuyo” asin “matanos”? An mga mahuyo iyo idtong mga mapakumbabang nagpapatukdo asin nagpapagiya ki Jehova; an mga matanos iyo idtong mga tawo na gustong gibuhon an tama sa paghiling kan Diyos na Jehova. Sa kinaban na ini, kakadikit kan mga matanos kumpara sa mga maraot. Pero sa maabot na bagong kinaban, an mga mahuyo asin matanos bako nang minoriya ni mayoriya kan populasyon; sinda na sana an mabubuhay digdi sa daga. Iyo, paraiso na nanggad kun arog kaiyan an mga nakaistar sa daga!

7. Paano kita apektado ngunyan kan mga maraot na organisasyon?

⁷ Paano kita apektado ngunyan kan mga maraot na organisasyon? Dakul sa mga maraot na nangyayari sa kinaban na ini kagigibuhan bako nin indibidwal na mga tawo kundi nin mga organisasyon. Dinadaya kan mga relihiyon an minilyon na tawo. Halimbawa, itinatago ninda an katotoohan dapit sa Diyos, sinasabi ninda na dai mapagtitiwalaan an Bibliya, dinadaya ninda an mga tawo dapit sa puturo kan daga saka kan katawuhan, asin kun anu-ano pa. Kumusta man an mga gobyernong lakop an pangungurakot asin paboritismo, na nagsusuportar sa mga giyera asin ralaban nin mga etnikong grupo saka nagpapasakit sa mga dukha asin sa mga mayong kalaban-laban? Kumusta man an mahanab na mga korporasyon na inaatian an kapalibutan, inuubos an natural na yaman kan daga, asin inaaprobetsaran an inosenteng mga parabakal, na pinapayaman na marhay an pipira mantang nagtitios an minilyon? Malinaw na an mga maraot na organisasyon an responsable sa kadakul na kasakitan sa kinaban ngunyan.

8. Uyon sa Bibliya, ano an mangyayari sa mga organisasyon na iniisip kan dakul na tawo ngunyan na garo baga dai matatanyog?

⁸ Ano an gigibuhon ni Jehova? Mapuon an grabeng kasakitan kun balingan na kan pulitikal na mga organisasyon an gabos na palsong relihiyon na irinerepresentar kan imoral na babayi na inaapod na Dakulang Babilonya. (Kap. 17:1, 2, 16; 18:1-4) Biyong lalaglagon an mga organisasyon na iyan nin relihiyon. Pero, kumusta an iba pang maraot na organisasyon? Sinasabi kan Bibliya na garo baga dai sinda matatanyog arog kan mga bukid asin isla. (Basahon an Kapahayagan 6:14.) Pero ihinuhula man kaiyan na an mga gobyerno asin an gabos na organisasyon na konektado diyan mayuyugyog sa saindang pundasyon. An grabeng kasakitan masagkod sa paglaglag sa gabos na gobyerno kan kinaban na ini asin sa gabos na nagsurog diyan laban sa Kahadian nin Diyos. (Jer. 25:31-33) Pagkatapos kaiyan, mayo nang maraot na organisasyon na matatada digdi sa daga!

9. Taano ta makakasigurado kita na magigin organisadong marhay an bagong daga?

⁹ Ano an isasalida sa mga maraot na organisasyon? Pagkatapos kan Armagedon, magkakaigwa pa daw nin ano man na organisasyon sa daga? Sinasabi sa sato kan Bibliya: “Igwa nin bagong mga langit asin sarong bagong daga na hinahalat niyato uyon sa saiyang panuga, asin sa mga ini magdadanay an katanusan.” (2 Ped. 3:13) An dating mga langit asin daga, an maraot na mga gobyerno saka an sosyedad nin tawo na kontrolado  kaiyan, mawawara na. Ano an isasalida? An mga tataramon na “bagong mga langit asin sarong bagong daga” nangangahulugan na magkakaigwa nin sarong bagong gobyerno asin sarong bagong sosyedad nin tawo sa daga na pamamahalaan kan gobyernong iyan. Sa pamamahala ni Jesu-Cristo, perpektong maipapahiling kan Kahadian an personalidad kan Diyos na Jehova, na iyo an Diyos nin areglo. (1 Cor. 14:33) Kaya an “bagong daga” magigin organisado. May kuwalipikadong mga lalaki na maasikaso kan mga bagay-bagay. (Sal. 45:16) Gigiyahan sinda ni Cristo asin kan 144,000 na kairiba niyang mamamahala. Isip-isipa na sana kun mag-abot na an panahon na an gabos na maraot na organisasyon sasalidahan na nin saro sanang organisasyon, na nagkakasararo asin dai nuarin man magigin maraot!

10. Anong mga maraot na gibo an lakop sa lugar nindo, asin paano kamo asin an saindong pamilya apektado kaiyan?

¹⁰ Paano kita apektado kan mga maraot na gibo ngunyan? Nabubuhay kita sa kinaban na ini na lakop an mga maraot na gibo. Sa sistemang ini nin mga bagay, dawa sain makakahiling ka nin imoral, bakong onesto, asin maringis na mga gibo. An mga magurang an lalo nang nasasakitan sa pagprotektar sa saindang mga aki laban sa mga maraot na gibong iyan. An industriya nin entertainment ginigibo ngunyan na mas kaakit-akit an iba-ibang klase nin maraot na gibo mantang pinagngingisihan an mga pamantayan ni Jehova sa kun ano an tama asin sala. (Isa. 5:20) Hinihinguwa kan tunay na mga Kristiyano na labanan an impluwensiyang iyan. Pinagmamaigutan nindang protektaran an saindang integridad sa kinaban na nagpapalakop nin paglapastangan sa mga pamantayan ni Jehova.

11. Ano an manunudan niyato sa ginibong paghukom ni Jehova sa Sodoma asin Gomora?

¹¹ Ano an gigibuhon ni Jehova sa mga maraot na gibo? Isipa an ginibo niya sa Sodoma asin Gomora kaidto. (Basahon an 2 Pedro 2:6-8.) Napurisaw na marhay an matanos na si Lot sa gabos na maraot na gibo na nakapalibot sa saiya asin sa saiyang pamilya. An paglaglag ni Jehova sa bilog na rehiyon na idto bako sanang paghali sa mga maraot na gibo sa lugar na iyan. Nagserbi man iyan na “patanid sa bakong diyosnon na mga tawo mapadapit sa mga bagay na maabot.” Kaya kun paanong hinali ni Jehova an gabos na imoral na gibo kaidto, hahalion man niya an mga gibong kaagid kaiyan ngunyan kun isagibo na niya an paghukom sa presenteng sistemang ini nin mga bagay.

12. Anong mga aktibidad an gustong-gusto mong gibuhon kun mayo na an lumang sistemang ini nin mga bagay?

¹² Ano an masalida sa mga maraot na gibo? Kadakul kan nakakaugmang aktibidad sa Paraiso. Isipa na sana an magayunon na trabaho na gibuhon na paraiso an planetang ini, o an pagtugdok nin harong para sa sato asin sa satong mga namumutan sa buhay. Kabali man diyan an pagsabat sa minilyon na nagadan saka pagtukdo sa sainda dapit sa mga dalan ni Jehova asin sa mga ginibo niya para sa katawuhan puon kaidto. (Isa. 65:21, 22; Gibo 24:15) Magigin sibot kita sa mga aktibidad na talagang ikakaugma niyato asin matao nin kaumawan ki Jehova!

13. Anong makamumundong mga sitwasyon ngunyan sa kinaban an resulta kan pagrebelde ni Satanas, Adan, asin Eva?

¹³ Paano kita apektado kan makamumundong mga sitwasyon ngunyan? Huli sa mga maraot na tawo, mga maraot na organisasyon, asin mga maraot na gibo, nagigin makamumundo an kamugtakan nin buhay digdi sa daga. Siisay sa sato an makakapagsabing dai siya apektado nin giyera, pagtios, asin diskriminasyon, pati na kan hilang asin kagadanan? Gabos kita apektado kan mga iyan. Direktang mga epekto iyan kan pagrebelde ki Jehova kan tulong maraot—si Satanas, Adan, asin  Eva. Mayo sa sato an ligtas ngunyan sa grabeng kariribukan na resulta kan pagrebelde ninda.

14. Ano an gigibuhon ni Jehova sa makamumundong mga sitwasyon? Magtao nin halimbawa.

¹⁴ Ano an gigibuhon ni Jehova sa makamumundong mga sitwasyon? Kun dapit sa giyera, nanuga si Jehova na biyo niya iyan na tatapuson. (Basahon an Salmo 46:8, 9.) Kumusta man an mga hilang? Hahalion niya iyan. (Isa. 33:24) An kagadanan? Paparaon iyan ni Jehova sagkod lamang! (Isa. 25:8) Hahalion man niya an pagtios. (Sal. 72:12-16) Iyan man an gigibuhon niya sa gabos na iba pang makamumundong sitwasyon na dahilan kan pagigin miserable kan buhay ngunyan. Hahalion pa ngani niya an maraot na “duros” kan sistema kan kinaban na ini, huling mawawara na an impluwensiya ni Satanas asin kan saiyang mga demonyo.—Efe. 2:2.

15. Ano an nagkapirang bagay na biyo nang mawawara pagkatapos kan Armagedon?

¹⁵ Imahinara an sarong kinaban na mayo nang giyera, hilang, asin kagadanan? Mayo nang mga puwersa militar, mga armas o mga bagay na magpapagirumdom sa giyera. Mayo nang mga ospital, doktor, nars, o mga health insurance; mayo nang mga morge, punerarya, o sementeryo! Huling mayo nang krimen, dai na kaipuhan nin mga guwardiya, alarm system, mga pulis, pati gayod mga kandado o liyabe mayo na man! An mga kahaditan na nagpaparibok ngunyan sa satong isip asin puso mawawara na.

16, 17. (a) Ano an mamamatian kan mga makakaligtas sa Armagedon? Magtao nin ilustrasyon. (b) Ano an kaipuhan mong gibuhon tanganing masigurado na magdadanay kang buhay pag pinara na an maraot na kinaban na ini?

¹⁶ Ano an magigin buhay niyato kun mawara na an makamumundong mga sitwasyon? Dai ta iyan lubos maisip ngunyan. Huling haloy na kitang nabubuhay sa lumang kinaban na ini, tibaad dai na niyato naririsa kun gurano kita kaapektado kan mga pangyayari sa kinaban. Kaagid iyan kan mga nakaistar harani sa istasyon nin tren na tibaad dai na gayong naririsa an ribok. O kan mga nakaistar harani sa tambakan nin basura na tibaad dai na gayong naririsa an parong. Pero ano daw kun halion an gabos na maraot na mga bagay na iyan? Iyo, nakakaginhawa nanggad!

¹⁷ Ano an masalida sa mga kahaditan na namamatian niyato ngunyan? Ini an simbag kan Salmo 37:11: ‘Magkakararanga sinda nin labi-labi sa katuninungan.’ Bako daw na nakakaugmang marhay iyan? Iyo, asin iyan an gusto ni Jehova para sa sato. Kaya, gibuhon lugod niyato an satong pinakamakakaya na magdanay na harani sa Diyos na Jehova asin sa saiyang organisasyon sa huring mga aldaw na ini na pano nin mga kahaditan! Pahalagahan na marhay an satong paglaom, hurop-hurupon iyan, gibuhon na totoong-totoo iyan sa satong isip asin puso—asin sabihon iyan pirmi sa iba! (1 Tim. 4:15, 16; 1 Ped. 3:15) Paagi kaiyan, makakasigurado kitang dai kita makakaiba sa pagpara sa sentensiyado nang lumang kinaban na ini. Imbes, magdadanay kitang buhay asin maugma sagkod lamang!