Ipinapahiling kaiyan na bakong tama na maggamit nin mga armas sa pakikilaban, arog kan handgun, riple, o iba pang klase nin badil, bilang proteksiyon laban sa ibang tawo. Pag-isipan an minasunod:

Sagrado para ki Jehova an buhay—lalo na an buhay nin tawo. Aram kan salmistang si David na si Jehova “an burabod nin buhay.” (Sal. 36:9) Kaya, kun naggigibo nin paagi an sarong Kristiyano tanganing protektaran an saiyang sadiri o an saiyang mga pagsadiri, gigibuhon niya an gabos niyang makakaya tanganing dai makagadan nin tawo asin dai magkasala sa dugo.—Deut. 22:8; Sal. 51:14.

Totoo, ano man na bagay na ginagamit tanganing idepensa an sadiri puwedeng makagadan, pero mas madaling makakagadan an badil—tinutuyo man o dai. * Saka kun mahiling nin nang-aatake—na tibaad natataranta na—na may badil an saro, posibleng marhay na maggrabe an sitwasyon asin puwedeng may magadan.

Kan sinabi ni Jesus sa saiyang mga parasunod na magdara sinda nin mga espada sa huring banggi niya sa daga, bako iyan para magin proteksiyon ninda. (Luc. 22:36, 38) Imbes, gusto sindang tukduan ni Jesus nin sarong importanteng leksiyon: Dai maggamit nin dahas, dawa mapaatubang sinda sa sarong armadong grupo. (Luc. 22:52) Kan hugkuton ni Pedro an saiyang espada laban sa uripon kan halangkaw  na saserdote, ipinagbuot ni Jesus ki Pedro: “Ibalik mo sa sarungan an saimong espada.” Dangan sinabi ni Jesus an sarong pundamental na katotoohan, sarong prinsipyo na naggigiya sa saiyang mga parasunod sagkod ngunyan: “An gabos na minagamit kan espada magagadan sa espada.”—Mat. 26:51, 52.

Kauyon kan Mikas 4:3, ‘pupulpugon kan mga lingkod nin Diyos an saindang mga espada tanganing magin mga arado asin an saindang mga garod tanganing magin mga pantakras na kutsilyo.’ (An Marahay na Bareta Biblia) An kuwalidad na ini na nagpapamidbid sa tunay na mga Kristiyano kauyon kan ipinasabong na sadol na isinurat ni apostol Pablo: “Dai magbalos nin maraot sa siisay man na naggibo sa saindo nin maraot. . . . Kun posible, sagkod na magigibo nindo, makipagkatuninungan sa gabos na tawo.” (Roma 12:17, 18) Sa ibong kan dakul na masakit na sitwasyon na inagihan ni Pablo, kaiba na an “peligro sa mga tulisan,” isinabuhay niya an sinabi niya, nungka niyang ikinompromiso an mga prinsipyo sa Bibliya tangani sanang maprotektaran an saiyang sadiri. (2 Cor. 11:26) Imbes, nagtiwala siya sa Diyos asin sa kadunungan na yaon sa Saiyang Tataramon—an kadunungan na mas ‘marahay kisa [mga armas] sa pakikipaglaban.’—Par. 9:18.

Mas mahalagang marhay para sa mga Kristiyano an buhay kisa sa materyal na mga bagay. ‘Dai makakatao nin buhay sa sarong tawo an pagsadiri niya.’ (Luc. 12:15) Kaya, kun dai mapapundo kan mabuot na pananaram an armadong tulisan, susunudon kan madunong na mga Kristiyano an prinsipyo sa sinabi ni Jesus: “Dai ka magtumang sa maraot na tawo.” Tibaad kaipuhan ta pa ngani na itao an satong panglaog asin pangluwas na bado, sabi ngani. (Mat. 5:39, 40; Luc. 6:29) * Siyempre, an pinakamarahay na gibuhon iyo na maglikay. Kun lilikayan ta “an pagpasikat . . . kan mga bagay na igwa” kita asin kun midbid kita kan satong kapwa bilang mapagpatuninong na mga Saksi ni Jehova, puwede tang malikayan na magin puntirya nin bayolenteng mga kriminal.—1 Juan 2:16; Tal. 18:10.

Iginagalang kan mga Kristiyano an konsiyensiya kan iba. (Roma 14:21) Kun maaraman kan ibang tugang na may sarong miyembro kan kongregasyon na igwa nin badil bilang proteksiyon laban sa ibang tawo, tibaad ikabigla ninda iyan, asin masingkog pa ngani. Papahiruon kita kan pagkamuot na inuton an kapakanan kan iba, dawa kun pagmati ta may deretso man kitang magkaigwa kaiyan.—1 Cor. 10:32, 33; 13:4, 5.

Hinihinguwa kan mga Kristiyano na magin marahay na halimbawa. (2 Cor. 4:2; 1 Ped. 5:2, 3) Kun tinawan na nin sadol suno sa Kasuratan an sarong Kristiyano pero padagos pa man giraray siyang nagsasaray nin badil bilang proteksiyon laban sa ibang tawo, dai siya maibibilang na marahay na halimbawa. Kaya dai siya makukuwalipikar para sa mga paninimbagan o espesyal na mga pribilehiyo sa laog kan kongregasyon. Aplikado man iyan sa sarong Kristiyano na padagos na nagdadara nin badil huling parte iyan kan trabaho niya. Mas marahay nanggad na maghanap siya nin ibang trabaho! *

Personal na desisyon nin sarong Kristiyano kun paano niya poprotektaran an saiyang sadiri, pamilya, o an saiyang mga pagsadiri, pati na kun anong trabaho an pipilion niya. Pero makakatabang sa sato an mga prinsipyo sa Bibliya huling mahihiling niyato diyan an kadunungan nin Diyos asin an pagkamuot niya sa sato. Bilang pagsunod sa mga prinsipyong iyan, pipilion nin sarong Kristiyanong maygurang sa espirituwal na dai magkaigwa nin armas bilang proteksiyon laban sa ibang tawo. Aram ninda na an tunay asin daing sagkod na katiwasayan makakamtan sana kan mga nagtitiwala sa Diyos paagi sa pamumuhay kauyon kan mga prinsipyo sa Bibliya.—Sal. 97:10; Tal. 1:33; 2:6, 7.