1. Paano niyato dapat mansayon an satong pagtubod?

SARONG mahalagang marhay na kuwalidad an pagtubod. Bako gabos na tawo igwa kaiyan. (2 Tes. 3:2) Pero, tinawan ni Jehova an kada saro sa mga parasamba niya nin sarong ‘sukol nin pagtubod.’ (Roma 12:3; Gal. 5:22) Dapat na ipagpasalamat iyan na marhay kan gabos na igwa kaiyan.

2, 3. (a) Anong mga bendisyon an posibleng makamtan nin saro na may pagtubod? (b) Anong mga hapot an pag-uulayan niyato ngunyan?

² Paagi kan saiyang Aki, irinarani kan satong Ama sa langit an mga tawo pasiring sa Saiya. Kun an saro matubod ki Jesus, mapapatawad an sarong iyan kan saiyang mga kasalan. Dangan, magkakaigwa siya kan oportunidad na magin katuod ni Jehova asin mabuhay na daing katapusan. (Juan 6:44, 65; Roma 6:23) Ano an satong ginibo para magin maninigo sa arog kaiyan kagayon na bendisyon? Huling bilang mga parakasala, kagadanan sana an maninigo para sa sato. (Sal. 103:10) Pero nahiling ni Jehova an potensiyal niyato na magin marahay. Huli sa saiyang daing kapantay na kabuutan, tinabangan niya kitang manudan an maugmang bareta. Kaya nagpuon na kitang magtubod ki Jesus asin huli  kaini may paglaom kitang mabuhay na daing sagkod.—Basahon an 1 Juan 4:9, 10.

³ Pero ano man nanggad an pagtubod? Kun nasasabutan na niyato an mga bendisyon na itinagama nin Diyos para sa sato, nangangahulugan daw iyan na igwa na kita nin pagtubod? Asin an mas mahalaga, sa anong mga paagi niyato dapat ipahiling an satong pagtubod?

4. Ipaliwanag kun taano ta an pagtubod urog pa sa pagkaigwa sana nin pakasabot.

⁴ An pagtubod bako sanang basta pagkaigwa nin pakasabot sa katuyuhan nin Diyos. Iyan sarong makusog na puwersa na nagmomotibar sa sarong tawo na humiro kauyon kan kabutan nin Diyos. An pagkaigwa nin pagtubod sa saro na ginamit nin Diyos sa pagliligtas, magpapahiro sa sarong may pagtubod na ipahayag man sa iba an maugmang bareta. Si apostol Pablo nagsabi: “Kun hayagan mong ipinapahayag paagi sa saimong nguso na si Jesus Kagurangnan, asin sa saimong puso nagtutubod ka na ibinangon siya nin Diyos hali sa mga gadan, maliligtas ka. Huling sa saiyang puso, an saro nagtutubod para maibilang na matanos, alagad paagi sa nguso an saro hayagan na nagpapahayag para sa kaligtasan.”—Roma 10:9, 10, NW; 2 Cor. 4:13.

5. Taano ta mahalagang marhay an pagtubod, asin paano niyato iyan mapagdadanay na makusog? Iilustrar.

⁵ Malinaw nanggad, tanganing magkamit nin buhay na daing sagkod sa bagong kinaban nin Diyos, dapat kitang magkaigwa nin pagtubod asin papagdanayon iyan na makusog. An pangangaipong papagdanayon na makusog an satong pagtubod maiaagid sa pangangaipo nin sarong tinanom para sa tubig. Bakong arog nin sarong plastik na tinanom, an sarong totoong tinanom padagos na nagtatalubo. Kun regular niyatong babaribian iyan, padagos iyan na mabubuhay. Pero kun dai tatawan nin supisyenteng tubig an sarong dating mataba o marambong na tinanom, maluluyos iyan, dangan pag-abot nin panahon, magagadan. Arog man kaiyan an satong pagtubod. Máluya iyan asin mawawara kun papabayaan. (Luc. 22:32; Heb. 3:12) Pero kun tatawan niyato iyan nin igong atensiyon, magdadanay iyan na buháy asin padagos na ‘magtatalubo,’ asin magigin kitang “makusog an pagtubod.”—2 Tes. 1:3; Tito 2:2, NW.

6. Ano an duwang deskripsiyon na itinao kan Hebreo 11:1 sa pagtubod?

⁶ An deskripsiyon kan Bibliya sa pagtubod mababasa sa Hebreo 11:1. * (Basahon.) An pagtubod nakapokus sa duwang bagay na dai niyato nahihiling: (1) “An piglalauman”—puwedeng kaiba digdi an mga mangyayari sa maabot na ipinanugang mauutob pero dai pa nangyayari, arog kan katapusan kan gabos na karatan asin an pag-abot kan bagong kinaban. (2) “Mga bagay na dai nahihiling [na] talagang totoo.” Sinasabi sa tekstong iyan an “pagkaigwa nin nakakakumbinsir na ebidensiya” na talagang totoo an “mga bagay na dai nahihiling,” arog kan pag-eksister kan Diyos na Jehova, ni Jesus, saka kan mga anghel, asin an mga ginigibo kan langitnon na Kahadian. (Heb. 11:3) Paano niyato maipapahiling na buháy an satong paglaom asin na nagtutubod kita sa dai nahihiling na mga bagay na sinasabi sa Tataramon nin Diyos? Paagi sa satong mga tataramon asin gibo—na kun mayo iyan kulang an satong pagtubod.

7. Paano kita natatabangan kan halimbawa ni Noe na masabutan an kahulugan kan pagkaigwa nin pagtubod? (Hilingon an ritrato sa kapinunan kan artikulo.)

⁷ Idinuduon kan Hebreo 11:7 an pagtubod ni Noe, na “pagkatapos siyang patanidan nin Diyos mapadapit sa dai pa nahihiling na mga bagay, nagpahiling nin pagkatakot sa Diyos asin naggibo nin arka para sa kaligtasan kan saiyang pamilya.” Ipinahiling ni Noe an saiyang pagtubod paagi sa paggibo kan dakulaon na arka. Siguradong hinapot siya kan mga kataraid niya kun taano ta naggigibo siya kan arog kaiyan kadakulang estruktura. Dai daw naggirong si Noe o sinabi niya sa mga ini  na dai siya pakiaraman? Dai nanggad! Pinahiro siya kan saiyang pagtubod na daing takot na magpatotoo asin patanidan an saiyang mga kakontemporanyo mapadapit sa nagdadangadang na paghukom nin Diyos. Posibleng marhay na inutro ni Noe sa mga tawo an eksaktong mga sinabi ni Jehova sa saiya: ‘[Nagdesisyon] na akong paraon an katawuhan huli ta an daga pano na nin kadahasan huli sa sainda. Papadarahan ko nin baha an bilog na kinaban tanganing gadanon an gabos na may buhay. Magagadan an gabos na yaon sa daga.’ Siguradong ipinaliwanag man ni Noe sa mga tawo an solamenteng paagi para makaligtas, na inuutro an pagbuot nin Diyos: “Lumaog ka sa arka.” Kaya lalo pang ipinahiling ni Noe an saiyang pagtubod paagi sa pagigin ‘parahulit nin katanusan.’—Gen. 6:13, 17, 18, BPV ^[1]; 2 Ped. 2:5.

8. Ano an ipinasabong na paliwanag sa disipulong si Santiago mapadapit sa kahulugan kan tunay na Kristiyanong pagtubod?

⁸ An surat ni Santiago posibleng marhay na isinurat dai nahaloy pagkatapos na isurat ni Pablo an ipinasabong sa saiyang deskripsiyon kan pagtubod. Arog ni Pablo, ipinaliwanag ni Santiago na an tunay na Kristiyanong pagtubod bako sanang basta paniniwala; may kaiba iyan na gibo. Si Santiago nagsurat: “Ipahiling mo sa sako an saimong pagtubod na mayong mga gibo, asin ipapahiling ko sa saimo an pagtubod ko paagi sa sakuyang mga gibo.” (Sant. 2:18, NW) Dangan, ipinaliwanag ni Santiago an pagkakalain kan basta pagkaigwa sana nin paniniwala asin kan pagpahiling nin pagtubod. An mga demonyo naniniwala na igwa nin Diyos, pero mayo sindang pagtubod sa saiya. Imbes, hinihinguwa nindang  ulangon an mga katuyuhan nin Diyos. (Sant. 2:19, 20) Sa kabaliktaran kaini, si Santiago naghapot na pinanunungdan an sarong suanoy na halimbawa nin pagtubod: “Bakong si Abraham na satuyang ama ipinahayag na matanos paagi sa mga gibo pagkatapos niyang idulot sa altar an saiyang aking si Isaac? Nahiling mo na an saiyang pagtubod aktibong naghiro kaiba an saiyang mga gibo asin an saiyang pagtubod nagin lubos paagi sa saiyang mga gibo.” Dangan, tanganing malinaw na ipasabot an punto na an pagtubod dapat na ipahiling paagi sa mga gibo, sinabi pa ni Santiago: “Kun paanong an hawak na daing espiritu gadan, an pagtubod man na daing mga gibo gadan.”—Sant. 2:21-23, 26, NW.

9, 10. Paano kita tinatabangan ni apostol Juan na masabutan na mahalaga na magpahiling nin pagtubod?

⁹ Pakalihis nin labing tulong dekada, isinurat ni apostol Juan an saiyang Ebanghelyo asin an saiyang tulong surat. Nasasabutan daw niya an rarom kan kahulugan kan tunay na Kristiyanong pagtubod arog kan ipinasabong sa ibang mga kagsurat kan Bibliya na paliwanag diyan? Kumpara sa iba pang kagsurat kan Bibliya, mas dakul na beses ginamit ni Juan an Griegong pandiwa na itinatradusir minsan na “magtubod.”

¹⁰ Halimbawa, ipinaliwanag ni Juan: ‘An minatubod sa Aki igwa nin buhay na dai nin katapusan; an dai minakuyog sa Aki dai makakahiling nin buhay, kundi an kaanggutan nin Diyos magdadanay sa saiya.’ (Juan 3:36) Kaiba sa Kristiyanong pagtubod an pagsunod sa mga pagbuot ni Jesus. Parating kinotar ni Juan an mga sinabi ni Jesus na nagtutukdo na an pagpahiling nin pagtubod sarong nagpapadagos na proseso.—Juan 3:16; 6:29, 40; 11:25, 26; 14:1, 12.

11. Paano ta maipapahiling an satong pasasalamat na naaraman niyato an katotoohan?

¹¹ Nagpapasalamat nanggad kita ki Jehova huling ginamit niya an saiyang banal na espiritu tanganing ihayag sa sato an katotoohan asin tanganing magtubod kita sa maugmang bareta! (Basahon an Lucas 10:21.) Dapat na nungka kitang magpundo na pasalamatan si Jehova na irinani niya kita sa saiya paagi kan saiyang Aki, an “Panginot na Instrumento asin Tagapagkumpleto kan satuyang pagtubod.” (Heb. 12:2, NW) Tanganing maipahiling an satong pasasalamat sa siring na daing kapantay na kabuutan, dapat niyatong padagos na pakusugon an satong pagtubod paagi sa pagpamibi asin pag-adal kan Tataramon nin Diyos.—Efe. 6:18; 1 Ped. 2:2.

12. Sa anong mga paagi niyato dapat na ipahiling an satong pagtubod?

¹² Dapat na padagos niyatong ipahiling an satong pagtubod sa mga panuga ni Jehova. Dapat niyatong gibuhon ini sa mga paaging malinaw na nahihiling kan iba. Halimbawa, padagos kitang naghuhulit manungod sa Kahadian nin Diyos asin nakikikabtang sa gibuhon na paggibo nin mga disipulo. Padagos man kitang ‘naggigibo nin karahayan sa gabos na tawo, asin urog na sa mga [tugang niyato] sa pagtubod.’ (Gal. 6:10) Asin nagmamaigot kitang “hubaon . . . an lumang personalidad kasabay an mga gibo kaiyan” tanganing maprotektaran an sadiri laban sa ano man na makakapaluya sa satong espirituwalidad.—Col. 3:5, 8-10, NW.

13. Gurano kahalaga an “pagtubod sa Diyos,” asin sa ano iyan iinagid, saka taano?

¹³ An Bibliya nagsasabi: “Kun mayo nin pagtubod imposibleng mapaugma an Diyos, huli ta an siisay man na minadulok sa Diyos dapat na magtubod na siya nag-eeksister asin na siya an paratao nin balos sa mga maigot na naghahanap sa saiya.” (Heb. 11:6, NW) Sinasabi kan Tataramon nin Diyos na an “pagtubod sa Diyos” kabtang kan “pundamental na mga katukduan” o sa literal na Griegong tataramon kaini, kabtang kan “pundasyon” na kaipuhan tanganing magin, asin magdanay na sarong tunay na Kristiyano an siisay man. (Heb. 6:1, NW) Apuwera sa pagtubod na kabtang kan pundasyon na iyan, dapat na idagdag kan mga Kristiyano an iba pang mahahalagang kuwalidad tanganing ‘magdanay sinda sa pagkamuot nin Diyos.’—Basahon an 2 Pedro 1:5-7; Jud. 20, 21.

14, 15. Gurano kaimportante an pagtubod kun ikukumparar sa pagkamuot?

¹⁴ Idinuon kan mga Kristiyanong kagsurat kan  Bibliya an kahalagahan kan pagtubod paagi sa pagsambit kaiyan nin ginatos na beses. Mayo nang ibang Kristiyanong kuwalidad an sinambit nin arog kaiyan kadakul. Nangangahulugan daw iyan na an pagtubod iyo an pinakamahalagang Kristiyanong kuwalidad?

¹⁵ Ikinumparar ni Pablo an pagtubod sa pagkamuot. Siya nagsurat: “Kun igwa ako nin makusugon na pagtubod na makakapahiro nin mga bukid, pero mayo akong pagkamuot, dai akong serbi.” (1 Cor. 13:2, NW) Kan simbagon ni Jesus an hapot na: ‘Arin an [pinakaimportanteng] pagbuot sa Katugunan?’ idinuon niya na an pinakamahalagang kuwalidad iyo an pagkamuot sa Diyos. (Mat. 22:35-40) Kalabot an pagkamuot sa dakul na mahalagang marhay na Kristiyanong mga kuwalidad, kaiba na an pagtubod. An Bibliya nagsasabi: ‘An pagkamuot, nagtutubod sa gabos [na bagay].’ Nagtutubod iyan sa gabos na bagay na sinabi nin Diyos sa saiyang Tataramon nin katotoohan.—1 Cor. 13:4, 7.

16, 17. Paano parehong idinuon sa Kasuratan an pagtubod saka pagkamuot, pero arin an nakakalabi sa duwa, asin taano?

¹⁶ Huli sa kahalagahan kan pagtubod asin pagkamuot, dakul na beses na magkaibanan na idinuon kan mga Kristiyanong kagsurat kan Bibliya an mga kuwalidad na ini, na sa parati sa parehong pangungusap o frase. Sinadol ni Pablo an saiyang mga tugang na ‘isulog an takop sa daghan nin pagtubod asin nin pagkamuot.’ (1 Tes. 5:8) Si Pedro nagsurat: ‘Namumutan nindo [si Jesus] maski dai nindo siya nahihiling, nagtutubod kamo saiya, maski dai pa nindo siya nahihiling ngunyan.’ (1 Ped. 1:8, BPV) Hinapot ni Santiago an saiyang linahidan na mga tugang: “Bako daw na pinili nin Diyos idtong mga dukha sa pagmansay kan kinaban tanganing sinda magin mayaman kun mapadapit sa pagtubod asin magin mga tagapagmana kan Kahadian, na saiyang ipinanuga sa mga namumuot sa saiya?” (Sant. 2:5, NW) Si Juan nagsurat: ‘Ini an tugon [nin Diyos]: na kita magtubod sa ngaran kan saiyang Aki na si Jesu-Cristo asin na magkaminuruot-muutan.’—1 Juan 3:23.

¹⁷ Dawa mahalagang marhay an pagtubod, an mga aspekto kan kuwalidad na ini matatapos. Halimbawa, sa maabot na panahon, dai na niyato kaipuhan na magkaigwa nin pagtubod sa mga panuga nin Diyos para sa bagong kinaban huling mahihiling na niyatong nauutob iyan. Pero nungkang matatapos an pangangaipo na pakusugon an satong pagkamuot sa Diyos asin sa satuyang kapwa. Kaya, naisurat ni Pablo: “Alagad ngunyan magdadanay an tulong ini: pagtubod, paglaom, pagkamuot; pero an pinakaurog sa mga ini iyo an pagkamuot.”—1 Cor. 13:13, NW.

18, 19. Anong sarong patunay kan pagigin mapuwersa kan pagtubod an nahihiling ta sa ngunyan, asin siisay an maninigong tawan nin kredito para kaini?

¹⁸ Sa presenteng panahon, ipinapahiling kan banwaan ni Jehova an saindang pagtubod sa naestablisar nang Kahadian nin Diyos. Bilang resulta, nagkaigwa nin sarong pambilog na kinaban na espirituwal na paraiso na may labi nang otso milyones na habitante. Sarong lugar iyan na abunda sa bunga kan banal na espiritu nin Diyos. (Gal. 5:22, 23) Sarong patunay nanggad ini na mapuwersang mga kuwalidad an tunay na Kristiyanong pagtubod asin pagkamuot!

¹⁹ Mayo nin tawo an puwedeng tawan nin kredito para kaini. An satong Diyos an naggibo kaini. An makangangalas na gibong ini nagigin bagay na ‘ikakabantog [ni Jehova], sarong tanda na nuarin man dai [mapapara].’ (Isa. 55:13, An Banal na Biblia) Tunay nanggad, sarong regalo o ‘balaog nin Diyos’ na kita ‘makakaligtas huli sa pagtubod.’ (Efe. 2:8) Padagos na máuswag asin malakop an satong espirituwal na paraiso sagkod na mapano an bilog na kinaban nin perpekto, matanos, asin maugmang mga tawo na daing sagkod na mag-uumaw sa pangaran ni Jehova. Lugod na padagos kitang magpahiling nin pagtubod sa mga panuga ni Jehova!