Pag gusto mong mamidbid an saro, siguradong ihahapot mo nguna sa saiya, “Ano an pangaran mo?” Kun ihahapot mo iyan sa Diyos, ano kaya an sasabihon niya?

“Ako si Jehova. Iyan an sakuyang pangaran.”​—Isaias 42:8.

Mahalaga mismo sa Diyos an pangaran niya. Mayong nagtao sa Diyos kan saiyang pangaran; pinili niya iyan para sa saiyang sadiri. Si Jehova nagsabi: “Ini an sakuyang pangaran sagkod lamang, asin paagi sa pangaran na ini gigirumdumon ako sa gabos na henerasyon.” (Exodo 3:15) Sa Bibliya, mas dakul na beses na naglataw an pangaran nin Diyos kisa sa arin man na titulo niya, arog nin Makakamhan sa Gabos, Ama, Kagurangnan, o Diyos, asin mas dakul na beses pa kisa sa iba pang personal na pangaran, arog nin Abraham, Moises, David, o Jesus. Saro pa, kabutan ni Jehova na mamidbid an saiyang pangaran. An Bibliya nagsasabi: “Lugod na maaraman kan mga tawo na ika, na an pangaran Jehova, ika sana an Kahuruhalangkawi sa bilog na daga.”​—Salmo 83:18.

Mahalaga ki Jesus an pangaran nin Diyos. Sa pamibi na inaapod na Ama Niyamo o Pamibi kan Kagurangnan, tinukduan ni Jesus an mga parasunod niya na mamibi sa Diyos paagi sa mga tataramon na: “Pakangbanalon an pangaran mo.” (Mateo 6:9) Si Jesus mismo namibi sa Diyos: “Ama, pamurawaya an saimong pangaran.” (Juan 12:28) Nagin priyoridad sa buhay ni Jesus an pagpapamuraway kan pangaran nin Diyos, kaya sinabi niya sa pamibi: “Ipinamidbid ko sa sainda an saimong pangaran asin padagos kong ipapamidbid iyan.”​—Juan 17:26.

Mahalaga an pangaran nin Diyos sa mga nakakamidbid sa saiya. Aram kan banwaan nin Diyos kaidto na an saindang proteksiyon asin kaligtasan konektado sa daing kaagid na pangaran nin Diyos. “An pangaran ni Jehova sarong masarig na tore. Diyan minadalagan an matanos asin nag-aako nin proteksiyon.” (Talinhaga 18:10) “An lambang saro na nag-aapod sa pangaran ni Jehova maliligtas.” (Joel 2:32) Ipinapahiling kan Bibliya na an pangaran nin Diyos magigin midbidan kan mga naglilingkod saiya. “Huli ta an gabos na banwaan  malakaw sa ngaran kan saindang diyos, pero malakaw kita sa ngaran ni Jehova na satuyang Diyos sagkod nuarin pa man.”​—Mikas 4:5; Gibo 15:14.

An pangaran nin Diyos nagpapamidbid kun siisay siya. Sigun sa dakul na iskolar, an pangaran na Jehova nangangahulugan na “Pinangyayari Niyang Magin.” Ihinayag kan Diyos na Jehova an kahulugan kan saiya mismong pangaran kan sambiton niya ki Moises an mga tataramon na ini: “Ako Magigin Kun Ano an Gusto Kong Magin.” (Exodo 3:14) Kaya an pangaran nin Diyos naghahayag bako sana kan papel niya bilang an Kaglalang na nagpangyari na mag-eksister an gabos na bagay. Ipinapahayag kan saiyang pangaran an kakayahan niya na pangyarihon an saiyang sadiri pati an saiyang mga linalang na magin an ano man na kinakaipuhan para mautob an saiyang katuyuhan. An mga titulo nin Diyos puwedeng magladawan kan saiyang posisyon, awtoridad, o kapangyarihan, pero an pangaran niya, na Jehova, iyo sana an nagrerepresentar kan gabos manungod sa saiyang sadiri asin sa kaya niyang magin.

An pangaran nin Diyos naghahayag na interesado siya sa sato. An kahulugan kan pangaran nin Diyos nagpaparisa kan pagkamuot niya sa saiyang mga linalang, kaiba na kita. Saro pa, ipinamidbid nin Diyos an saiyang pangaran huling gusto niyang mamidbid ta siya. Sa katunayan, siya pa ngani an inot na naggibo nin paagi para sabihon sa sato an saiyang pangaran bago pa niyato maisip na ihapot iyan. Malinaw na gusto nin Diyos na mamidbid ta siya, bako bilang sarong harayo asin dai nagmamalasakit na diyos, kundi bilang sarong totoong Persona na puwede tang magin kadayupot.​—Salmo 73:28.

An paggamit kan pangaran nin Diyos naghahayag na gusto tang magin harani sa saiya. Halimbawa, may gusto kang magin amigo asin sinabihan mo siya na apudon ka niya sa saimong pangaran. Ano an mamamati mo kun padagos siyang nagsasayuma na apudon ka sa saimong pangaran? Pag-abot nin panahon posibleng maisip mo kun baga gusto niya talagang magin harani sa saimo. Arog man kaiyan kun dapit sa Diyos. Sinabi ni Jehova sa mga tawo an saiyang pangaran, asin dinadagka niya kitang gamiton iyan. Kun gigibuhon ta iyan, ipinapahiling ta ki Jehova na gusto tang magin harani sa saiya. An totoo, naririsa niya ngani dawa an “mga naghuhurop-hurop sa [o, “nagpapahalaga sa,” nota sa ibaba] saiyang pangaran”!—Malakias 3:16.

An pag-aram kan pangaran nin Diyos mahalagang marhay para mamidbid siya. Pero bako sana iyan an dapat tang gibuhon. Kaipuhan tang mamidbid an Persona sa likod kan pangaran na iyan. Kaipuhan tang maaraman an mga kuwalidad niya.