May mga regalo na mahalagang marhay sa sato huling itinao iyan nin saro na may awtoridad o iginagalang tang marhay. May mga regalo man na pinapahalagahan ta, dawa bakong mamahalon, huling hali iyan sa sarong namumutan na kapamilya o sa sarong pinagkakatiwalaan na amigo. Arog kaiyan an regalo ni Russell ki Jordan na sinambit sa nainot na artikulo. Totoo man ini sa regalo na pantubos. Paano?

Inot, sabi kan Bibliya, “isinugo nin Diyos sa kinaban an Saiyang bugtong na Aki tanganing magkamit kita nin buhay paagi sa saiya.” (1 Juan 4:9) Kaya talagang mahalagang marhay an regalong ini. Mayo nang may mas halangkaw pang awtoridad kisa sa Diyos. Dapit sa Saiya, sarong salmistang Hebreo an nagsurat: ‘An saimong ngaran iyo si Jehova; ika sana an Kahuruhalangkawi sa [bilog] na daga.’ (Salmo 83:18) May maregalo daw sa saimo na mas Kahuruhalangkawi pa kisa sa Diyos?

Ikaduwa, an Diyos an ‘satuyang Ama.’ (Isaias 63:16) Paano? Siya an nagtao sa sato nin buhay. Saro pa, mamumuton niya kitang inaataman arog nin sarong mapagpadangat na ama sa saiyang mga aki. Kan kaulay nin Diyos an saiyang suanoy na banwaan, sinabi niya: ‘Israel, ika an aki kong namumutan, an aki na sakong nawiwilihan. Hinihidaw taka. Kaya kahihirakan taka [nanggad].’ (Jeremias 31:20, BPV *) Arog man kaiyan an namamatian nin Diyos sa mga nagsasamba sa saiya ngunyan. Siya bako ta lang Kaglalang na makakamhan sa gabos, kundi sato man na maimbod na Ama asin Amigo. Kaya bako daw na papahalagahan tang marhay an ano man na regalong hali sa saiya?

May mga regalo na mahalagang marhay huling itinao iyan bako dahil sa obligasyon, kundi dahil sa tunay na pagkamuot. An sarong tunay na bukas-palad na nagtatao dai nag-aasa nin balos sa saiyang kabuutan.

Itinao nin Diyos an saiyang Aki para sa sato huling namumutan niya kita. “Kun manungod sa sato, an pagkamuot nin Diyos nahayag sa arog kaining paagi: isinugo nin Diyos sa kinaban an Saiyang bugtong na Aki,” an sabi kan Bibliya. Taano? “Tanganing magkamit kita nin buhay paagi sa saiya.” (1 Juan 4:9) Naobligar daw an Diyos na gibuhon ini? Dai nanggad! An “pantubos na ibinayad ni Cristo Jesus” kapahayagan kan “daing kapantay na kabuutan” nin Diyos.—Roma 3:24.

Taano ta sarong kapahayagan nin “daing kapantay na kabuutan” an regalong ini nin Diyos? Sabi kan Bibliya: “Dinadagka kita nin Diyos na akuon an saiyang pagkamuot na ipinahiling niya sa arog kaining paagi: si Cristo nagadan para sa sato kan kita mga parakasala pa.” (Roma 5:8) An dakulang pagkamuot nin Diyos an nagpahiro sa saiya tanganing tabangan an maluya, kahirak-hirak, asin makasalan na katawuhan. Bako kitang maninigo sa pagkamuot na iyan, ni mababayadan ta man iyan sa saiya. An saiyang regalo iyo an pinakanangungurog na kapahayagan nin pagkamuot sa kasaysayan.

May mga regalo na mahalagang marhay huling dakula an isinakripisyo kan kagtao kaiyan. Pag an sarong tawo gikan sa buot na itinatao sa sato an sarong bagay na importanteng marhay sa saiya, talagang napapahalagahan ta an regalo huli sa sakripisyo niya.

“Itinao [nin Diyos] an saiyang bugtong na Aki.” (Juan 3:16) Puwede kutanang dai niya itao sa sato an saiyang pinakanamumutan. Sa halawig na panahon na paglalang nin Diyos kan uniberso, kaibanan niya si Jesus na nagtrabaho asin ini nagin an saro na saiyang ‘ikinakaugma.’ (Talinhaga 8:30) Si Jesus an “namumutan na Aki” nin Diyos asin “an ladawan kan Diyos na dai nahihiling.” (Colosas 1:13-15) Dai ta lubos maisip kun gurano sinda kadayupot sa kada saro.

Pero, an Diyos “dai ngani . . . nag-alangan na itao an sadiri niyang Aki.” (Roma 8:32) Itinao ni Jehova sa sato an saiyang pinakamarahay. Dakulaon an isinakripisyo niya para maitao an regalo na pantubos.

May mga regalo na mahalagang marhay huling talagang kaipuhan iyan o kaipuhan tulos iyan. Halimbawa, nagpabulong ka asin naligtas an saimong buhay, pero dai mo kayang bayadan an gastos diyan. Siguradong grabe an pasasalamat mo sa sarong tawo na boluntaryong nagbayad kaiyan. Bako daw na daing kapantay an regalong iyan?

“Kun paanong dahil ki Adan an gabos nagagadan, siring man dahil sa Cristo an gabos mabubuhay.” (1 Corinto 15:22) Bilang mga gikan ni Adan, kita gabos “nagagadan,” asin dai ta kayang makadulag sa epekto kan hilang saka kagadanan. Dai ta man kayang makipag-ulian sa Diyos asin magdanay na daing sála sa paghiling niya. Asin bilang hamak na mga tawo, mayo kitang kakayahan na papagdanayon na ‘buhay’ an satong sadiri o an iba. Sinasabi kan Bibliya: ‘Sa katotoohan mayong makakabalukat kan saiyang [tugang]; ni mababayadan niya an Diyos kan halaga kan saiyang buhay. An ibabayad niya dai nanggad magkakanigo.’ (Salmo 49:7, 8, BPV) Kaipuhan tang marhay nin tabang huling dai ta kayang bayadan an halaga kan pantubos. Kun mayong matabang sa sato, magigin kahirak-hirak nanggad kita.

Huli sa dakulang pagkamuot ni Jehova, gikan sa buot niyang binayadan an nagliligtas-buhay na “pagpabulong” na kaipuhan niyato, tanganing paagi ki Jesus “an gabos mabubuhay.” Paano ini pinagin posible kan pantubos? “An dugo ni Jesus na saiyang Aki linilinig kita sa gabos na kasalan.” Iyo, an pagtubod sa pinabulos na dugo ni Jesus nagtatao nin oportunidad na mapatawad kita sa satong kasalan asin magkaigwa nin buhay na  daing katapusan. (1 Juan 1:7; 5:13) Asin ano an magigibo kan pantubos para sa nagadan tang mga mahal sa buhay? “Kun paanong an kagadanan nag-abot paagi sa sarong tawo, an pagkabuhay liwat kan mga gadan maabot man paagi sa sarong tawo [si Jesus].”—1 Corinto 15:21. *

Mayo nang makakalabi sa regalong atang na pantubos ni Jesus huling hali iyan sa saro na Kahuruhalangkawi asin itinao iyan huli sa dakulaon na pagkamuot. Mayong makakapantay sa isinakripisyo kan Diyos na Jehova para sa sato. Asin mayo nang ibang regalo na mas kaipuhan ta kisa sa sakripisyong iyan huling ilinigtas kita kaiyan sa kasalan asin kagadanan. Iyo, mayo nang ibang regalo na maikukumparar sa dai ikaladawan na halaga kan pantubos.