IPINAHILING kan nainot na mga artikulo na huli sa manlain-lain na makulog na mga pangyayari sa buhay puwede mong mamati na garo baga dai mo na kayang magpadagos pa. Mantang tinatagalan an sadiri mong mga problema, tibaad maihapot mo kun baga may saysay pang mabuhay o kun may nagmamakulog pa man saimo. Makakasigurado ka na may pakiaram an Diyos sa mga ikinakapurisaw mo. Mahalaga kang marhay sa saiya.

Ipinahiling kan kagsurat kan Salmo 86 an saiyang pagtitiwala sa Diyos: “Nag-aapod ako sa saimo sa aldaw na napupurisaw ako, huling sisimbagon mo ako.” (Salmo 86:7) Pero tibaad maisip mo, ‘Paano ako sisimbagon nin Diyos “sa aldaw na napupurisaw ako”?’

Tibaad dai man tulos halion nin Diyos an saimong mga problema, pero sinisigurado kan saiyang Tataramon, an Bibliya, na tatawan ka niya nin panglaog na katuninungan na matabang saimo na makatagal: “Dai kamo mahadit sa ano man na bagay, kundi sa gabos na bagay paagi sa pamibi asin pagngayo-ngayo na may kaibang pasasalamat, ipaaram nindo sa Diyos an saindong mga kahagadan; asin an katuninungan nin Diyos na nakakalabi sa gabos na pakasabot iyo an magbabantay sa saindong puso asin kaisipan.” (Filipos 4:6, 7) Hilingon kun paano an minasunod na mga bersikulo sa Bibliya nagtatao sa sato nin garantiya na an Diyos mamumuton na nagmamakulog sa sato.

“Mayo ni [sarong dignos] an dai namamangno nin Diyos. . . . Mas mahalaga kamo kisa sa dakul na dignos.”—Lucas 12:6, 7, nota sa ibaba.

PAG-ISIPAN: An saradit na gamgam garo baga mayong halaga para sa mga tawo, pero an Diyos nagmamakulog sa sainda. Mayo ni sarong sadit na dignos an dai naririparo nin Diyos; an lambang saro sa sainda mahalagang marhay na mga linalang. Mas mahalaga nanggad sa Diyos an mga tawo kisa sa mga dignos. An mga tawo, na iyo an pinakanangungurog sa mga linalang nin Diyos digdi sa daga, ginibo uyon sa saiyang “ladawan” asin may kakayahan na magkaigwa saka magpahiling kan saiyang marahayon na mga kuwalidad.—Genesis 1:26, 27.

“O Jehova, siniyasat mo ako, asin midbid mo ako. . . . Nasasabutan mo . . . an mga kaisipan ko. . . . Siyasaton mo ako, asin aramon mo an mga ikinakahadit kan isip ko.”—Salmo 139:1, 2, 23.

PAG-ISIPAN: Midbid kang marhay nin Diyos. Aram niya maski an kalaog-laugi kan puso mo asin mga ikinakahadit. Dai man masabutan kan iba an ikinakapurisaw mong problema, pero an Diyos iyo, asin gusto ka niyang tabangan. Kaya may saysay pa man giraray an mabuhay.

“O Jehova, danguga an pamibi ko; lugod na an paghagad ko nin tabang makaabot sa saimo. . . . Ikiling mo sa sako an saimong talinga; simbagon mo tulos ako pag mag-apod ako. . . . Tatawan niya nin atensiyon an pamibi kan mga dukhang-dukha.”—Salmo 102:1, 2, 17.

PAG-ISIPAN: Puon pa sa kapinunan kan pagsakit nin tawo, garo baga nagsasaray na si Jehova nin rekord kan lambang luha na minaturo sa saindang mga mata. (Salmo 56:8) Kaiba diyan an saimong mga luha. Dai nalilingawan nin Diyos an gabos na sákit na inagihan mo pati na an mga luha mo huling mahalaga kang marhay sa saiya.

“Dai ka maghadit, ta ako an saimong Diyos. Papakusugon taka, iyo, tatabangan taka . . . Ako, si Jehova na saimong Diyos, . . . an Saro na nagsasabi sa saimo, ‘Dai ka matakot. Tatabangan taka.’”—Isaias 41:10, 13.

PAG-ISIPAN: Gusto nin Diyos na tabangan ka. Kun matumba ka, tatabangan ka niyang makabangon.

“An Diyos namuot na gayo sa kinaban kaya itinao niya an saiyang bugtong na Aki, tanganing an siisay man na nagtutubod sa saiya dai malaglag kundi magkaigwa nin buhay na daing katapusan.”—Juan 3:16.

PAG-ISIPAN: Namumutan kang marhay nin Diyos kaya gikan sa buot niyang itinao an saiyang Aki, si Jesus, para tubuson ka. Huli sa pantubos, igwa ka na nin paglaom na makamtan an sarong maugma asin makahulugan na buhay sagkod lamang. *