KUN nakaligtas ka sa grabeng kalamidad, siguradong nasasabutan mo an namatian kan mga nakaeksperyensiya man kaiyan. Tibaad nakamati ka nin pagkabigla, dai mo maako an nangyari, ribaraw ka, napupurisaw, saka binabangungot sa nangyari. An dakul sa mga nakaligtas pinangluluyahan nin buot saka mayo na nin kusog, kaya haros mayo na sindang ganang mabuhay.

Kun haros mayo nang natada saimo dahil sa kalamidad, puwedeng mamati mo man na garo dai mo na kaya. Tibaad ngani maisip mo na mayo nang saysay na mabuhay. Pero, ipinapaliwanag kan Bibliya na may saysay an mabuhay saka igwa nin masarig na basehan para maglaom sa sarong marahayon na puturo.

Sinasabi kan Eclesiastes 7:8: “Mas marahay an katapusan nin sarong bagay kisa sa kapinunan kaiyan.” Pag inagihan ka pa sana nin kalamidad, tibaad mamati mo na garo baga mayo nang paglaom. Pero mantang mapasensiya kang naghihinguwa na makabangon, puwedeng bumalik giraray sa normal an buhay mo.

Ihinula kan Bibliya na maabot an panahon na “mayo nang madadangog . . . na boses nin pagtangis o pag-agrangay huli sa kasakitan.” (Isaias 65:19) Mangyayari iyan pag nagi nang paraiso an daga sa irarom kan Kahadian nin Diyos. (Salmo 37:11, 29) Mayo nang mangyayaring kalamidad. An gabos na kulog pati an dai malingaw-lingawan na maraot na mga nangyari permanente nang paparaon, huling nanunuga an Diyos na Makakamhan sa Gabos: “An dating mga bagay dai na masabong pa sa isip, asin an mga iyan dai na mapapasapuso.”—Isaias 65:17.

Isipa na sana: May ginibo an Kaglalang para tawan ka nin “magayon na puturo asin paglaom”—sarong matuninong na buhay sa irarom kan perpektong pamamahala nin Diyos. (Jeremias 29:11) Matatabangan ka daw kan pakaaram mo kan katotoohan na ini na mamati na may saysay pa an mabuhay? Si Sally, na nasambitan sa inutan, nagsabi, “Pag iniisip-isip mo an magagayon na bagay na gigibuhon kan Kahadian nin Diyos para sa sato pag-abot nin panahon, matatabangan ka kaiyan na bayaan na an nakaagi asin atubangon an presente.”

Puwede mong aramon kun ano pa an madali nang gibuhon kan Kahadian nin Diyos para sa mga tawo. Sa paggibo kaiyan, makakasiguro ka na dawa inagihan ka nin grabeng kalamidad, may saysay pa man giraray an mabuhay mantang hinahalat-halat mo an panahon na mayo nang mangyayaring kalamidad. Pero sa ngunyan, nagtatao an Bibliya nin praktikal na mga giya na makakatabang saimo na makayanan an mga epekto kan kalamidad. Pag-isipan an nagkapirang halimbawa.