Mga Anghel—Kun Paano Sinda Nakakaapektar sa Katawohan

“Pagkatapos kan mga bagay na ini nakaheling ako nin saro pang anghel na naghihilig hale sa langit, na may dakulang autoridad . . . Asin sia nagkurahaw sa makosog na tingog, na sinasabi: ‘Sia buminagsak na! An Dakulang Babilonya buminagsak na!’”—KAPAHAYAGAN 18:1, 2.

1, 2. Ano an nagpapaheling na naggagamit si Jehova nin mga anghel sa paggibo kan saiyang kabotan?

MANTANG nakadistiero sa isla nin Patmos, an gurang nang si apostol Juan tinawan nin propetikong mga bisyon. Naheling nia an nakakapukaw sa boot na mga pangyayari kan sia “paagi sa pasabong” mapasa “aldaw kan Kagurangnan.” An aldaw na iyan nagpoon kan patukawon sa trono si Jesu-Cristo kan 1914 asin nagpapadagos sagkod sa katapusan kan saiyang Sangribong Taon na Paghade.—Kapahayagan 1:10.

² Dai direktang itinao ni Jehova Dios ki Juan an kapahayagan na ini. Naggamit sia nin pinakapaagihan. An Kapahayagan 1:1 nagsasabi: “Sarong kapahayagan ni Jesu-Cristo, na itinao sa saiya nin Dios, tanganing ipaheling sa saiyang mga oripon an mga bagay na mangyayari nanggad sa dai na mahahaloy. Asin isinugo nia an saiyang anghel asin itinao iyan sa mga tanda paagi sa saiya sa saiyang oripon na si Juan.” Si Jehova, paagi ki Jesus, naggamit nin anghel tanganing ipaisi ki Juan an makangangalas na mga bagay mapadapit sa “aldaw kan Kagurangnan.” May panahon na si Juan ‘nakaheling man nin saro pang anghel na naghihilig hale sa langit, na may dakulang autoridad.’ Ano an asignasyon kan anghel na ini? “Sia nagkurahaw sa makosog na tingog, na sinasabi: ‘Sia buminagsak na! An Dakulang Babilonya buminagsak na!’” (Kapahayagan 18:1, 2) An makapangyarihan na anghel na ini nagkapribilehiong magpaisi manongod sa pagbagsak kan Dakulang Babilonya, an pambilog na kinaban na imperyo nin falsong relihion. Huli kaini, dai mapagdududahan na ginagamit ni Jehova an mga anghel sa mahalagang paagi sa paggibo kan saiyang kabotan. Bago niato siyasaton nin detalyado an papel kan mga anghel sa katuyohan nin Dios asin kun paano sinda nakakaapektar sa sato, estudyaran niato an ginikanan kan espiritung mga linalang na ini.

Paano Nag-eksister an mga Anghel?

3. Ano an salang paghona kan dakol na tawo manongod sa mga anghel?

³ Minilyon na tawo ngonyan an naniniwala na nag-eeksister an mga anghel. Alagad dakol an may salang ideya manongod sa sainda asin sa ginikanan ninda. Halimbawa, iniisip nin nagkapirang relihiosong tawo na kun magadan an sarong namomotan, an tawong iyan inapod tanganing makaibanan nin Dios asin magin sarong anghel. Iyan daw an itinotokdo kan Tataramon nin Dios manongod sa paglalang, pag-eksister, asin katuyohan kan mga anghel?

4. Ano an sinasabi sa sato kan Kasuratan manongod sa ginikanan kan mga anghel?

⁴ An anghel na pangenot sa kapangyarihan asin autoridad—an poon na anghel—nginaranan na Miguel na arkanghel. (Judas 9) Sia daing iba kundi si Jesu-Cristo. (1 Tesalonica 4:16) Kaidtong dai masokol na panahon na an nakaagi kan magin katuyohan ni Jehova na magin sarong Kaglalang, an pinakaenot sa mga linalang nia iyo an anghel na Aking ini. (Kapahayagan 3:14) Sa huri, paagi sa panganay na Aking ini, linalang ni Jehova an gabos na iba pang espiritung linalang. (Colosas 1:15-17) Nagtataram manongod sa mga linalang na anghel na ini bilang saiyang mga aki, hinapot ni Jehova an patriarkang si Jacob: “Haen ka kan lalangon ko an daga? Magsabi ka, kun igwa ka nin pakasabot . . . Siisay an nagbugtak kan gapong pangeskina kaiyan, kan an mga bitoon nin kaagahan iribang nagkururahaw na may kagayagayahan, asin an gabos na aki nin Dios nagkururahaw sa pag-omaw?” (Job 38:4, 6, 7) Malinaw nanggad, an mga anghel linalang nin Dios, asin nag-eksister na sinda haloy pa bago an mga tawo.

5. Paano an pagkaorganisar sa mga anghel?

 ⁵ “An Dios sarong Dios, bakong nin karibarawan, kundi nin katoninongan,” an sabi kan 1 Corinto 14:33. Huli kaiyan, inorganisar ni Jehova an espiritung mga aki nia sa tolong pangenot na kategoriya: (1) mga serafin, na naglilingkod bilang mga katabang sa trono nin Dios, nagpapahayag kan saiyang kabanalan, asin nagpapadanay sa espirituwal na kalinigan kan saiyang banwaan; (2) mga kerubin, na nagsusuportar sa kamahalan ni Jehova; asin (3) iba pang anghel na naggigibo kan saiyang kabotan. (Salmo 103:20; Isaias 6:1-3; Ezequiel 10:3-5; Daniel 7:10) Ano an nagkapirang paagi na an espiritung mga linalang na ini nakakaapektar sa mga tawo?—Kapahayagan 5:11.

Ano an Papel kan mga Anghel?

6. Paano ginamit ni Jehova an mga kerubin may koneksion sa hardin nin Eden?

⁶ An enot na direktang pagsambit sa espiritung mga linalang nasa Genesis 3:24, na dian mababasa niato: “Pinaluwas [ni Jehova] an tawo asin ibinugtak sa sirangan kan hardin nin Eden an mga kerubin asin an naglalaad na espada na naglalabadlabad tanganing bantayan an dalan pasiring sa kahoy nin buhay.” Ginibong imposible kan mga kerubin na ini para ki Adan asin Eva na makalaog giraray sa saindang orihinal na istaran na hardin. Nangyari iyan sa kapinonan kan kasaysayan nin tawo. Ano an nagin papel kan mga anghel poon kaidto?

7. Ano an ipinapaheling kan kahulogan kan mga termino sa orihinal na lenguahe para sa “anghel” manongod sa saro kan mga papel kan mga anghel?

⁷ An mga anghel nasasambitan nin haros 400 na beses sa Biblia. An Hebreo sagkod Griegong mga termino para sa “anghel” puedeng itradusir na “mensahero.” Sa siring, an mga anghel nagserbi bilang paagi nin komunikasyon sa pag-oltanan nin Dios asin nin katawohan. Siring kan sinabi sa enot na duwang parapo kan artikulong ini, naggamit si Jehova nin anghel tanganing ipaabot an saiyang mensahe ki apostol Juan.

8, 9. (a) Paano nakaapektar ki Manoa asin sa saiyang agom an mga pagdalaw nin sarong anghel? (b) Ano an manonodan nin mga magurang sa pakipag-olay ni Manoa sa anghel nin Dios?

⁸ Ginagamit man an mga anghel sa pagtao nin suporta asin pagparigon sa boot kan mga lingkod nin Dios sa daga. Halimbawa, kan panahon kan mga Hokom sa Israel, si Manoa asin an baog niang agom odok na nagmawot na magkaaki. Isinugo ni Jehova an saiyang anghel tanganing ibareta sa agom ni Manoa na mangangaki sia nin sarong aking lalaki. An pagkasaysay nagsasabi sa sato: “Uya! ika magbabados, asin ika mangangaki nanggad nin sarong aking lalaki, asin mayong labaha na maagi sa saiyang payo, huli ta an aki magigin Nazareo nin Dios pagluwas sa tulak; asin sia an mangengenot sa pagliligtas sa Israel sa kamot kan mga Filisteo.”—Hokom 13:1-5.

⁹ Pag-abot nin panahon, an agom ni Manoa nangaki nin sarong aking lalaki, si Samson, na nagin bantog sa kasaysayan kan Biblia. (Hokom 13:24) Bago mamundag an aki, hinagad ni Manoa na magbalik sa sainda an anghel tanganing tokdoan sinda kun ano an maninigo nindang gibohon sa pagpadakula sa aki. Si Manoa naghapot: “Ano an magigin paagi nin pamumuhay kan aki asin ano an gigibohon nia?” Inotro kan anghel ni Jehova an mga instruksion na itinao nia sa agom ni Manoa. (Hokom 13:6-14) Seguradong naparigon nanggad an boot ni Manoa! An mga anghel dai na nagdadalaw sa mga indibiduwal sa kaparehong paagi ngonyan, alagad arog ni Manoa, an mga magurang puedeng maghagad nin instruksion ki Jehova kun nagsasanay sa saindang mga aki.—Efeso 6:4.

10, 11. (a) Paano nakaapektar ki Eliseo asin sa saiyang surugoon an nagsasakyadang hukbo nin Siria? (b) Paano kita makikinabang sa paghorophorop sa pangyayaring ini?

 ¹⁰ Nagkaigwa nin makangangalas na halimbawa manongod sa pagsuportar nin mga anghel kan panahon ni Eliseo na propeta. Si Eliseo nag-iistar kaidto sa Dotan, sarong siudad sa Israel. Sarong aldaw kan an surugoon ni Eliseo buminangon nin amay sa pagkaaga asin nagheling sa luwas, naheling nia na napapalibotan an siudad nin mga kabayo asin karuwahe de guerra. An hade kan Siria nagpadara nin makapangyarihan na puersa militar tanganing dakopon si Eliseo. Ano an nagin reaksion kan katabang ni Eliseo? Natatakot, tibaad natatarantang marhay, sia nagkurahaw: “Ay, kagurangnan ko! Ano an gigibohon niato?” Para sa saiya, garo baga dai nang paglaom. Alagad si Eliseo nagsimbag: “Dai ka matakot, huli ta mas dakol an nasa sato kisa nasa sainda.” Ano an boot niang sabihon?—2 Hade 6:11-16.

¹¹ Aram ni Eliseo na yaon an mga hukbo nin mga anghel tanganing suportaran sia. Minsan siring, dai ini naheheling kan saiyang surugoon. Kaya “nagpoon na mamibi si Eliseo asin magsabi: ‘O Jehova, buklata tabi an saiyang mga mata tangani na sia makaheling.’ Tolos na binuklat ni Jehova an mga mata kan surugoon, kaya sia nakaheling; asin, uya! an mabukid na rehion pano-pano nin mga kabayo asin karuwahe de guerrang kalayo sa palibot ni Eliseo.” (2 Hade 6:17) Sa siring, naheling kan surugoon an mga hukbo nin mga anghel. Paagi sa espirituwal na pakarorop, puede man niatong maheling na an mga anghel, gabos nasa pagdirehir ni Jehova asin ni Cristo, nagtatao nin suporta asin proteksion sa banwaan ni Jehova.

Pagsuportar nin mga Anghel kan Panahon ni Cristo

12. Anong pagsuportar an inako ni Maria hale sa anghel na si Gabriel?

¹² Estudyare an pagsuportar na inako kan birhen na Judiang si Maria kan madangog nia an bareta: “Ika mangingidam sa saimong matris asin mangangaki nin sarong aking lalaki, asin aapodon mo an saiyang ngaran na Jesus.” Bago nanggad itao an nakakabiglang mensaheng ini, an anghel na si Gabriel, na isinugo hale sa Dios, nagsabi sa saiya: “Dai ka matakot, Maria, huli ta nagkamit ka nin ugay sa Dios.” (Lucas 1:26, 27, 30, 31) Seguradong naparigon nanggad an boot ni Maria asin napakosog sia kan mga tataramon na ini na nag-asegurar sa saiya kan pabor nin Dios!

13. Paano si Jesus sinuportaran kan mga anghel?

¹³ An saro pang pangyayari nin pagsuportar nin anghel nangyari pagkatapos na labanan ni Jesus an tolong sugot ni Satanas sa Saiya sa kaawagan. An pagkasaysay nagsasabi sa sato na sa pagtatapos kan mga pagbalo, “binayaan sia kan Diablo, asin, uya! nagdatong an mga anghel asin nagpoon na maglingkod sa saiya.” (Mateo 4:1-11) May nangyari man na kaagid kaiyan kan banggi bago si Jesus magadan. Huli sa labi-labing kamondoan, luminuhod si Jesus asin nagpoon na mamibi, na sinasabi:  “‘Ama, kun boot mo, halea an kopang ini sa sako. Minsan siring, mangyari logod, bakong an boot ko, kundi an boot mo.’ Dangan an sarong anghel hale sa langit nagpaheling sa saiya asin pinakosog sia.” (Lucas 22:42, 43) Alagad anong klaseng pagsuportar nin mga anghel an yaon sa sato ngonyan?

Pagsuportar nin mga Anghel sa Presenteng mga Panahon

14. Anong persekusyon an kinaipuhan na tagalan kan mga Saksi ni Jehova sa presenteng mga panahon, asin ano an nagin resulta?

¹⁴ Kun iniisip niato an kasaysayan kan paghuhulit kan mga Saksi ni Jehova sa presenteng panahon, bako daw na naheheling niato an prueba kan pagsuportar kan mga anghel? Halimbawa, natagalan kan banwaan ni Jehova an pagsalakay nin Nazismo sa Alemania asin Solnopan na Europa bago asin durante kan Guerra Mundial II (1939-45). Sa irarom kan mga rehimen na Fascistang Katoliko sa Italia, España, asin Portugal, kinaipuhan nindang tagalan an persekusyon nin mas haloy pa ngani. Asin sa laog nin mga dekada, tinagalan ninda an persekusyon sa dating Unyon Sobyet asin sa mga nasyon na sakop kaiyan. Dai man niato paglingawan an persekusyon na tinagalan kan mga Saksi sa nagkapirang nasyon sa Aprika. * Sa mas dai pa sana nahahaloy, an mga lingkod ni Jehova nagtagal nin maisog na persekusyon sa nasyon nin Georgia. Ginibo ni Satanas an gabos na makakaya nia tanganing papondohon an aktibidad kan mga Saksi ni Jehova. Pero, bilang sarong organisasyon, natagalan ninda an siring na pagtumang asin nagin mapanggana. Sa sarong kabtang, ini huli sa pagprotehir na itinao kan mga anghel.—Salmo 34:7; Daniel 3:28; 6:22.

15, 16. Anong pagsuportar nin mga anghel an inaako kan mga Saksi ni Jehova sa saindang pambilog na kinaban na ministeryo?

¹⁵ Isinasapuso kan mga Saksi ni Jehova an sugo sa sainda na ihulit an maogmang bareta kan Kahadean nin Dios sa bilog na daga asin na gumibo nin mga disipulo paagi sa pagtotokdo kan katotoohan sa Biblia sa interesadong mga tawo sa gabos na lugar. (Mateo 28:19, 20) Minsan siring, lubos nindang naaaraman na dai ninda maootob an sugong  ini kun mayo nin pagsuportar hale sa mga anghel. Huli kaini, an sinasabi sa Kapahayagan 14:6, 7 nagin dayaday na gikanan nin pagparigon sa boot ninda. Dian mababasa niato: “Nakaheling ako [si apostol Juan] nin saro pang anghel na naglalayog sa kaitaasan, asin igwa sia nin daing katapusan na maogmang bareta na ipapahayag bilang nakakaogmang notisya sa mga nag-eerok sa daga, asin sa lambang nasyon asin tribo asin lenguahe patin banwaan, na nagsasabi sa makosog na tingog: ‘Matakot kamo sa Dios asin pamurawayon nindo sia, huli ta nag-abot na an oras kan saiyang paghokom, kaya sambahon nindo an Saro na naggibo kan langit asin daga asin dagat patin mga burabod nin tubig.’”

¹⁶ Malinaw na ipinapaheling kan mga tataramon na ini na an lakop sa kinaban na pag-ebanghelyo kan mga Saksi ni Jehova suportado asin ginigiyahan kan mga anghel. Ginagamit ni Jehova an saiyang mga anghel tanganing giyahan an sinserong mga tawo pasiring sa mga Saksi nia. Ginigiyahan man kan mga anghel an mga Saksi pasiring sa mga maninigo. Ipinapaliwanag kaini kun taano ta sa kadakol na pangyayari—kadakol nanggad na dai masasabi na nagkanorongod sana—an saro sa mga Saksi ni Jehova nanunuparan an sarong tawo sa eksaktong panahon na nag-aagi ini nin krisis asin nangangaipo nin espirituwal na tabang.

Sarong Pambihirang Papel sa Harani Nang Ngapit

17. Ano an nangyari sa mga Asirio kan sinda salakayon nin saro sanang anghel?

¹⁷ Apuera sa paglilingkod bilang mga mensahero asin mga tabang na nagpapakosog sa mga parasamba ki Jehova, an mga anghel naglilingkod sa saro pang katuyohan. Sa nakaaging mga panahon, isinagibo ninda an mga paghokom nin Dios. Halimbawa, kaidtong ikawalong siglo B.C.E., an Jerusalem hinuma nin dakulang hukbo nin mga soldados na Asirio. Paano huminiro si Jehova? Sia nagsabi: “Susurogon ko nanggad an siudad na ini tanganing iligtas iyan para sa sakuya mismo asin para ki David na sakuyang lingkod.” An pagkasaysay sa Biblia nagsasabi sa sato kun ano an nangyari: “Nangyari kan bangging idto na luminuwas an anghel ni Jehova asin linugad an siento otsenta y singko mil sa kampo kan mga Asirio. Kan magbarangon sinda pagkaaga, tara, sinda gabos bangkay na.” (2 Hade 19:34, 35) Abaa kaluya kan mga hukbo nin tawo kun ikokomparar sa kosog nin saro sanang anghel!

18, 19. Ano an magigin pambihirang papel kan mga anghel sa harani nang ngapit, asin paano iyan makakaapektar sa katawohan?

¹⁸ An mga anghel magseserbing mga hukbo nin Dios na manggagadan sa harani nang ngapit. Dai na nanggad mahahaloy ngonyan, si Jesus maabot “kaiba an saiyang makapangyarihan na mga anghel sa naglalaad na kalayo.” An saindang misyon iyo na gibohon an ‘pamamalos sa mga dai nakakamidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus.’ (2 Tesalonica 1:7, 8) Pambihira nanggad an magigin epekto kaini sa katawohan! Lalaglagon an mga nagsasayumang maghimate sa maogmang bareta kan Kahadean nin Dios na ipinapahayag na ngonyan sa bilog na daga. Solamente an mga naghahanap ki Jehova, nin katanosan, asin nin kahoyoan an ‘matatago sa aldaw kan kaanggotan ni Jehova’ asin dai maaano.—Sofonias 2:3.

¹⁹ Makakapagpasalamat kita na ginagamit ni Jehova an saiyang makapangyarihan na mga anghel tanganing suportaran asin pakosogon an saiyang mga parasamba sa daga. An pakasabot niato sa papel kan mga anghel sa katuyohan nin Dios nakakaranga nanggad, huli ta may mga anghel na nagrebelde tumang ki Jehova asin nagin sakop kan pamomoon ni Satanas. Totokaron sa masunod na artikulo kun anong mga aksion an puedeng gibohon kan tunay na mga Kristiano tanganing protehiran an saindang sadiri sa makapangyarihan na impluwensia ni Satanas na Diablo asin kan mga demonyo nia.

[Nota sa Ibaba]

Ano an Nanodan Nindo?

• Paano nag-eksister an mga anghel?

• Paano ginamit an mga anghel sa mga panahon kan Biblia?

• Ano an ihinahayag kan Kapahayagan 14:6, 7 manongod sa aktibidad kan mga anghel ngonyan?

• Ano an magigin pambihirang papel kan mga anghel sa harani nang ngapit?

[Mga Hapot Para sa Pag-adal]

[Ritrato sa pahina 22]

Pinarigon nin sarong anghel an boot ni Manoa asin kan saiyang agom

[Ritrato sa pahina 23]

“Mas dakol an nasa sato kisa nasa sainda”