Arogon si Jesus—Magtokdo na May Pagkamoot

“Mayo pa nin ibang tawo na nagtaram nin arog kaini.”—JUAN 7:46.

1. Ano an nagin reaksion kan mga tawo sa paagi nin pagtotokdo ni Jesus?

IMAHINARA kun gurano kanakakaogmang madangog na magtokdo si Jesus! An Biblia nagtatao sa sato nin ideya kan nagin epekto nia sa mga nakamidbid sa saiya. Halimbawa, isinaysay kan kagsurat nin Ebanghelyo na si Lucas na an mga tawo sa ginikanan na banwaan ni Jesus ‘nagpoon na magngalas sa managom na mga tataramon na nagluluwas sa saiyang ngoso.’ Ibinareta ni Mateo na ‘nagngalas nin labi-labi sa paagi nin pagtotokdo’ ni Jesus an mga naghinanyog sa saiya kan itokdo nia an Sermon sa Bukid. Asin si Juan nagsabi na an mga opisyal na sinugo na umarestar ki Jesus nagbalik na dai sia dara, na nagsasabi: “Mayo pa nin ibang tawo na nagtaram nin arog kaini.”—Luc. 4:22; Mat. 7:28; Juan 7:46.

2. Anong mga pamamaagi nin pagtotokdo an ginamit ni Jesus?

² Dai nasala an mga opisyal na idto. Daing duda na si Jesus an pinakadakulang Paratokdo na nabuhay kasuarin man. Sia nagtokdo nin malinaw, simple, asin dai mapapahimutikan an saiyang lohika. Eksperto siang naggamit nin mga ilustrasyon asin hapot. Ibinagay nia an saiyang pagtotokdo sa mga nakakaolay nia, baga man sinda may halangkaw na posisyon o ordinaryong mga tawo. An mga katotoohan na itinokdo nia madaling masabotan pero hararom an kahulogan. Minsan siring, bako sana an mga bagay na ini an dahelan na si Jesus nagin dakulang Paratokdo.

Pinakamahalagang Kualidad—Pagkamoot

3. Bilang paratokdo, paano napapalaen si Jesus sa mga namomoon sa relihion kan panahon nia?

³ Sa mga eskriba asin Fariseo, daing duwa-duwa na may madonong na mga lalaki na igwa nin kaaraman asin kan abilidad na itokdo iyan sa iba. Taano ta laen na marhay an paagi nin pagtotokdo ni Jesus kisa kan sa sainda? An mga namomoon sa relihion kan panahon na idto mayo nin pagkamoot sa ordinaryong mga tawo. Imbes, minemenos ninda an mga iyan, na ibinibilang sinda na “mga tawong isinumpa.” (Juan 7:49) Sa kabaliktaran, si Jesus napahiro nin pagkaherak sa sainda, huling sinda “naanitan asin nagkaralagalag siring sa mga karnero na mayong pastor.” (Mat. 9:36) Sia mamomoton, maduminamay, asin maboot. Dugang pa, an mga namomoon sa relihion mayo nin tunay na pagkamoot sa Dios. (Juan 5:42) Minsan siring, namomotan ni Jesus an saiyang Ama asin naoogmang marhay na gibohon an Saiyang kabotan. Biniribid kan mga namomoon sa relihion an mga tataramon nin Dios para sa sadiri nindang bentaha, alagad namotan ni Jesus an “tataramon nin Dios”—itinokdo nia iyan, ipinaliwanag iyan, idinepensa iyan, asin namuhay sono dian. (Luc. 11:28) Iyo, an pagkamoot kabtang  mismo kan naturalesa ni Cristo, na maheheling sa itinokdo nia, sa nagin pagtratar nia sa mga tawo, asin sa paagi nin pagtokdo nia sa sainda.

4, 5. (a) Taano ta mahalaga na magtokdo na may pagkamoot? (b) Sa pagtotokdo, taano ta mahalaga man an kaaraman asin abilidad?

⁴ Kumusta man kita? Bilang mga parasunod ni Cristo, mawot niato na arogon sia sa satong ministeryo asin pamumuhay. (1 Ped. 2:21) Sa siring, an satong obheto bako sanang itokdo sa iba an kaaraman sa Biblia kundi ipaheling man an mga kualidad ni Jehova, nangorogna an saiyang pagkamoot. Baga man dakol o kadikit sana an satong kaaraman, baga man dakol o kadikit sana an satong abilidad sa pagtotokdo, an pagkamoot na ipinapaheling niato makakatabang sa sato na maabot an puso kan mga hinuhulitan niato. Tanganing magin totoong epektibo sa satong paggibo nin mga disipulo, dapat niatong arogon si Jesus paagi sa pagtotokdo na may pagkamoot.

⁵ Siempre, tanganing magin marahay na mga paratokdo, kaipuhan na igwa kita nin kaaraman manongod sa satong itotokdo asin kaipuhan na igwa kita nin abilidad sa pagtokdo kan kaaraman na iyan. Tinabangan ni Jesus an saiyang mga disipulo na magkaigwa kan duwang iyan, asin tinatabangan kita ni Jehova na magkaigwa kaiyan ngonyan paagi sa saiyang organisasyon. (Basahon an Isaias 54:13; Lucas 12:42.) Pero, maninigo na magin obheto niato na magtokdo bako sanang paagi sa satong isip kundi paagi man sa satong puso. Kun magkatarabang an kaaraman, abilidad, asin pagkamoot, magigin nakakakontentong marhay an mga resulta kan pagtotokdo niato. Kun siring, sa anong mga paagi niato ikakapaheling an pagkamoot kun kita nagtotokdo? Paano iyan ginibo ni Jesus asin kan saiyang mga disipulo? Helingon niato.

Dapat Niatong Mamotan si Jehova

6. Paano kita nagtataram manongod sa sarong tawo na namomotan niato?

⁶ Naoogma kitang ipakipag-olay an manongod sa mga bagay na namomotan niato. Kun nagtataram kita manongod sa sarong bagay na mahalaga sa satong puso, nagigin buhay an satong pakikipag-olay asin maheheling sa bilog na hiro-hiro niato an entusiasmo asin init. Nangorognang totoo ini kun nagtataram kita manongod sa sarong tawo na namomotan niato. Sa parate, gustong-gusto niatong sabihon sa iba an aram niato manongod sa tawong iyan. Sia inoomaw, tinatawan nin onra, asin idinedepensa niato. Ginigibo niato iyan huling boot niato na sia asin an mga kualidad nia magustohan man nin iba.

7. An pagkamoot ni Jesus sa Dios nagpahiro sa saiya na gibohon an ano?

⁷ Bago niato mapatalubo sa iba an pagkamoot ki Jehova, sia dapat na midbid asin namomotan niato mismo. Total, an tunay na pagsamba nakabasar sa pagkamoot sa Dios. (Mat. 22:36-38) Si Jesus nagtao nin sangkap na halimbawa. Namomotan nia si Jehova sa bilog niang puso, isip, kalag, asin kosog. Huling nakaibanan ni Jesus an saiyang langitnon na Ama sa laog nin tibaad binilyon na taon, Sia midbid niang marhay. An resulta? “Namomotan ko an Ama,” an sabi ni Jesus. (Juan 14:31) An pagkamoot na iyan maheheling sa gabos na sinabi asin ginibo ni Jesus. Nagmotibar iyan sa saiya na pirmeng gibohon an mga bagay na nakakapaogma sa Dios. (Juan 8:29) Nagpahiro iyan sa saiya na idenunsiar an mga namomoon sa relihion, na nagsasaginsagin na sinda nagrerepresentar sa Dios. Nagpahiro man iyan sa saiya na magtaram manongod ki Jehova asin tabangan an iba na mamidbid saka mamotan an Dios.

8. An pagkamoot sa Dios nagmotibar sa mga disipulo ni Jesus na gibohon an ano?

⁸ Arog ni Jesus, an mga disipulo nia kan enot na siglo namomoot ki Jehova, asin an pagkamoot na ini an nagpahiro sa sainda na ihulit an maogmang bareta na may kosog nin boot asin kaigotan. Pinalakop ninda sa Jerusalem an katokdoan ninda, minsan ngani kontra sa sainda an makapangyarihan na mga namomoon sa relihion. Dai nanggad kaya kan mga disipulo na umontok sa pagtaram manongod sa mga bagay na naheling asin nadangog ninda. (Gibo 4:20; 5:28) Aram ninda na nasa sainda si Jehova asin bebendisyonan nia sinda—asin talagang binendisyonan nia sinda! Sa katunayan, mayo pang 30 taon pagkagadan ni Jesus, si apostol Pablo nakapagsurat na an maogmang bareta ikinahulit na “sa gabos na linalang sa sirong nin langit.”—Col. 1:23.

9. Paano niato mapapakosog an satong pagkamoot sa Dios?

⁹ Kun gusto niatong magin totoong epektibong paratokdo, kaipuhan man niatong siertohon na padagos niatong pinapakosog an pagkamoot niato sa Dios. Paano niato magigibo iyan? Paagi sa parateng pakikikomunikar sa Dios sa pamibi. Pinapakosog man niato an satong pagkamoot sa Dios paagi sa  pag-adal sa saiyang Tataramon, pagbasa nin mga publikasyon na basado sa Biblia, asin pag-atender sa Kristianong mga pagtiripon. Mantang nag-ooswag an satong kaaraman manongod sa Dios, an satong puso mapapano nin pagkamoot sa saiya. Dangan, mantang ipinapaheling niato an satong pagkamoot sa Dios sa satong mga sinasabi asin ginigibo, maheheling iyan nin iba asin sinda puedeng maparani man ki Jehova.—Basahon an Salmo 104:33, 34.

Dapat Niatong Mamotan an Itinotokdo Niato

10. Ano an sarong tatak nin marahay na paratokdo?

¹⁰ An sarong tatak nin marahay na paratokdo iyo na namomotan nia an saiyang itinotokdo. Dapat siang maniwala na iyan totoo, mahalaga, asin mapapakinabangan na marhay. Kun an paratokdo nagpapahalaga sa itinotokdo nia, magigin risang-risa an saiyang entusiasmo, na magkakaigwa nin mapuersang impluwensia sa mga tinotokdoan nia. Sa ibong na lado, kun dai talaga pinapahalagahan kan paratokdo an itinotokdo nia, paano sia makakaasa na an mga estudyante nia magpapahalaga man sa nadadangog ninda? Nungkang menoson an halimbawa nindo bilang paratokdo kan Tataramon nin Dios. Si Jesus nagsabi: “An lambang estudyante na nasanay na marhay magigin arog kan saiyang paratokdo.”—Luc. 6:40, The New Berkeley Version in Modern English.

11. Taano ta namotan ni Jesus an itinotokdo nia?

¹¹ Namotan ni Jesus an itinotokdo nia. Aram nia na igwa sia nin mahalagang marhay na bagay na dapat itokdo sa iba—an katotoohan manongod sa saiyang langitnon na Ama, an mismong “mga tataramon nin Dios” asin an “mga tataramon nin buhay na daing katapusan.” (Juan 3:34; 6:68) Siring sa maliwanagon na ilaw, an mga katotoohan na itinokdo ni Jesus ibinuyagyag an maraot asin itinampok an marahay. Nagtao iyan nin paglaom asin karangahan sa mga mapakumbaba na nadaya kan mga namomoon sa falsong relihion asin pinasakitan kan Diablo. (Gibo 10:38) An pagkamoot ni Jesus sa katotoohan maheheling bako sanang sa mga itinotokdo nia kundi sa gabos na ginigibo nia.

12. Ano an nagin saboot ni apostol Pablo manongod sa maogmang bareta?

¹² Arog ni Jesus, namotan asin pinahalagahan na marhay kan saiyang mga disipulo an katotoohan manongod ki Jehova asin ki Cristo, kaya an mga paratumang dai sinda kayang pugolan sa pagsabi kaiyan sa iba. Si Pablo nagsurat sa mga kapwa Kristiano sa Roma: ‘Mawot kong marhay na ipahayag an maogmang bareta. Huli ta dai ko ikinakasupog an maogmang bareta; iyan, sa katotoohan, an kapangyarihan nin Dios para sa pagliligtas sa lambang saro na may pagtubod.’ (Roma 1:15, 16) Ibinilang ni Pablo na sarong onra an pagbalangibog kan katotoohan. Sia nagsurat: “Sa sako, . . . itinao an dai na kutana maninigong kabootan na ini, na maninigo kong ipahayag sa mga nasyon an maogmang bareta manongod sa dai marorop na mga kayamanan kan Cristo.” (Efe. 3:8) Bakong depisil na imahinaron an entusiasmo ni Pablo mantang tinotokdoan nia an iba manongod ki Jehova asin sa Saiyang mga katuyohan.

13. Ano an mga dahelan na dapat niatong mamotan an maogmang bareta?

¹³ Paagi sa maogmang bareta na yaon sa Tataramon nin Dios, namidbid niato an Kaglalang asin nagkaigwa kita nin mamomoton na relasyon sa saiya. An maogmang bareta na iyan nagtatao nin nakakakontentong simbag sa mahalagang mga hapot sa buhay asin igwa iyan nin puersa na bagohon an satong buhay, tawan kita nin paglaom, asin pakosogon kita sa mga panahon nin kasakitan. Dugang pa, itinotokdo kaiyan an dalan pasiring sa makahulogan na buhay na dai noarin man matatapos. Mayo na nin iba pang kaaraman na mas mahalagang marhay kisa sa maogmang bareta. Iyan regalo na daing kaagid sa halaga na itinao sa sato, na nagtatao sa sato nin dakulang kagayagayahan. Asin nadadagdagan an satong kagayagayahan kun ihinihiras man niato sa iba an regalong iyan.—Gibo 20:35.

14. Paano niato mapapakosog an satong pagkamoot sa itinotokdo niato?

¹⁴ Ano an puede nindong gibohon tanganing orog pang mapakosog an pagkamoot nindo sa maogmang bareta? Mantang binabasa an Tataramon nin Dios, pumondo nguna paminsanminsan tanganing horophoropon an binasa nindo. Halimbawa, imahinara na kaiba mo si Jesus durante kan saiyang ministeryo sa daga o nagbibiahe ka kaiba ni apostol Pablo. Imahinara na yaon ka na sa bagong kinaban asin imahinara man an pagigin laen na marhay kan buhay duman. Horophoropon an mga bendisyon na naako mo huli sa pagkuyog mo sa maogmang bareta. Kun mapapagdanay mo na makosog an saimong pagkamoot sa maogmang bareta, maririsa kan mga tinotokdoan mo an pagkamoot na iyan. Kun siring, may marahay na dahelan na maninigong maingat niatong horophoropon an nanodan  niato asin tawan nin atension an satong itinotokdo.—Basahon an 1 Timoteo 4:15, 16.

Dapat Niatong Mamotan an mga Tawo

15. Taano ta maninigong mamotan nin paratokdo an saiyang mga estudyante?

¹⁵ Ginigibo nin marahay na paratokdo na magin pamugtak an boot kan saiyang mga estudyante kaya gustong-gusto ninda na makanood asin magpartisipar. An mamomoton na paratokdo nagtatao nin kaaraman sa saiyang mga estudyante huling sia tunay na nagmamakolog sa sainda. Ibinabagay nia an saiyang pagtotokdo sa mga pangangaipo ninda asin sa naaabot kan saindang pakasabot. Kinokonsiderar nia an mga abilidad ninda asin an kamugtakan kan saiyang mga estudyante. Kun an mga paratokdo igwa nin siring na pagkamoot, maririsa iyan nin mga estudyante, asin magigin nakakagayagaya an pagtotokdo asin pag-adal.

16. Sa anong mga paagi ipinaheling ni Jesus an pagkamoot sa mga tawo?

¹⁶ Ipinaheling ni Jesus an arog kaiyan na klaseng pagkamoot. An pinakadakulang kapahayagan kan saiyang pagkamoot iyo an pagtao kan saiyang sangkap na buhay bilang tawo tanganing maligtas an iba. (Juan 15:13) Durante kan ministeryo ni Jesus, daing kapagalan na inasikaso nia an mga tawo sa pisikal asin nangorogna sa espirituwal na paagi. Imbes na mag-asa na an mga tawo an magdolok sa saiya, sia nagbaklay nin ginatos na kilometro tanganing sabihon sa sainda an maogmang bareta. (Mat. 4:23-25; Luc. 8:1) Sia mapasensia asin mapagsabot. Kun an saiyang mga disipulo nangangaipong itanos, itinanos nia sinda na may pagkamoot. (Mar. 9:33-37) Dinagka nia sinda paagi sa pagpahayag kan saiyang kompiansa na sinda magigin epektibong mga parahulit kan maogmang bareta. Mayo na kasuarin man nin tawong nagin orog na mamomoton na paratokdo kisa ki Jesus. An pagkamoot na ipinaheling nia sa saiyang mga disipulo nagpahiro sa sainda na mamotan man sia asin otobon an saiyang mga togon.—Basahon an Juan 14:15.

17. Paano ipinaheling kan mga disipulo ni Jesus an pagkamoot sa iba?

¹⁷ Arog ni Jesus, ipinaheling kan saiyang mga disipulo an hararom na pagkamoot asin kapadangatan sa mga hinulitan ninda. Baga man nagtios nin persekusyon asin isinapeligro an buhay, sinda naglingkod sa iba asin nagin mapanggana sa paghuhulit kan maogmang bareta. Kanigoan na kapadangatan an namatean ninda sa mga tinabangan ninda sa espirituwal na paagi! Nakakapukaw nanggad sa boot an mga tataramon ni apostol Pablo, na nagsurat: “Kami nagin maboot sa tahaw nindo, arog kan pagmamahal nin nagpapasusong ina sa saiyang mga aki. Kaya, huli sa pagkaigwa nin mamomoton na kapadangatan sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta namotan mi kamong marhay.”—1 Tes. 2:7, 8.

18, 19. (a) Taano ta gikan sa boot kitang nagsasakripisyo na isagibo an paghuhulit? (b) Magtao nin halimbawa tanganing patunayan na naririsa kan iba an pagkamoot na ipinapaheling niato.

¹⁸ Kaagid kaiyan, sa presenteng mga panahon, an Mga Saksi ni Jehova naghuhulit sa bilog na kinaban tanganing hanapon an mga nagmamawot na mamidbid an Dios asin maglingkod sa saiya. Sa katunayan, sa nakaaging 17 sunod-sunod na taon, nakagamit kita nin labing sarong bilyon na oras taon-taon  sa paghuhulit asin paggibo nin mga disipulo—asin nagpapadagos kita sa gibohon na iyan. Ginigibo niato iyan nin gikan sa boot, minsan ngani an paghuhulit nangangaipo na kita magsakripisyo nin oras, kosog, asin materyal na kayamanan. Arog ni Jesus, nasasabotan niato na kamawotan kan satong mamomoton na langitnon na Ama na an mga tawo magkaigwa nin kaaraman na minagiya pasiring sa buhay na daing katapusan. (Juan 17:3; 1 Tim. 2:3, 4) An pagkamoot nagpapahiro sa sato na tabangan an mga sadiosan an puso na mamidbid asin mamotan man si Jehova.

¹⁹ Naririsa kan iba an pagkamoot na ipinapaheling niato. Halimbawa, sarong payunir na Kristiana sa Estados Unidos an nagpapadara nin mga surat tanganing rangahon an mga nagadanan nin mga namomotan. Bilang simbag, an sarong lalaki nagsurat: “Sa primero, napangalas ako na may sarong tawo na maghihingoang sumurat sa iba na dai nia midbid tanganing tabangan sinda na makayanan an masakit na mga panahon. An masasabi ko sana iyo na may pagkamoot kamo sa saindong kapwa asin sa Dios na naggigiya sa mga tawo sa dalan nin buhay.”

20. Gurano kahalaga an pagtotokdo na may pagkamoot?

²⁰ May nagsabi na kun magkatabang an pagkamoot asin abilidad, sarong obra maestra an magigibo. Sa satong pagtotokdo, naghihingoa kitang tabangan an satong mga inaadalan sa Biblia na makapatalubo nin isip na nakakamidbid ki Jehova asin nin puso na namomoot sa saiya. Iyo, tanganing magin totoong epektibong mga paratokdo, kaipuhan niato an tripleng pagkamoot—pagkamoot sa Dios, pagkamoot sa katotoohan, asin pagkamoot sa mga tawo. Mantang pinapatalubo niato an arog kaiyan na klaseng pagkamoot asin ipinapaheling iyan sa satong ministeryo, nakakaeksperyensia kita bako sanang nin kagayagayahan sa pagtatao kundi patin nin satispaksion sa pakaaram na inaarog niato si Jesus asin napapaogma niato si Jehova.

Ano an Isisimbag Nindo?

• Mantang itinotokdo niato sa iba an maogmang bareta, taano ta mahalaga na igwa kita nin . . .

pagkamoot sa Dios?

pagkamoot sa itinotokdo niato?

pagkamoot sa mga tinotokdoan niato?

[Mga Hapot Para sa Pag-adal]

[Ritrato sa pahina 15]

Taano ta laen an paagi nin pagtotokdo ni Jesus kisa kan sa mga eskriba asin Fariseo?

[Ritrato sa pahina 18]

An marahay na pagtotokdo nangangaipo nin kaaraman, abilidad asin, orog sa gabos, pagkamoot