“An Espiritu Asin an Nobya Padagos na Nagsasabi: ‘Madia!’”
“An Espiritu Asin an Nobya Padagos na Nagsasabi: ‘Madia!’”
“An espiritu asin an nobya padagos na nagsasabi: ‘Madia!’ . . . An siisay man na napapaha dumolok; an siisay man na boot, kumua kan tubig nin buhay na daing bayad.”—KAP. 22:17.
1, 2. Ano an maninigong magin lugar kan intereses kan Kahadean sa satong buhay, asin taano?
ANO an maninigong magin lugar kan intereses kan Kahadean sa satong buhay? Sinadol ni Jesus an mga parasunod nia na “padagos na hanapon nguna an kahadean,” na sinisierto sa sainda na kun gigibohon ninda iyan, itatao nin Dios an kaipuhan ninda. (Mat. 6:25-33) Ikinomparar nia an Kahadean nin Dios sa sarong perlas na halangkawon an halaga kaya kan manompongan iyan nin sarong nagbibiaheng negosyante, ‘ipinabakal nia an gabos niang sadiri patin binakal iyan.’ (Mat. 13:45, 46) Bako daw na paghuhulit kan Kahadean asin paggibo nin mga disipulo an maninigong magin pinakamahalaga sa sato?
2 Arog kan naheling niato sa naenot na duwang artikulo, an satong pagtaram na may pagkapusoan asin ekspertong paggamit kan Tataramon nin Dios sa ministeryo nagpapaheling na ginigiyahan kita kan espiritu nin Dios. An espiritung iyan may mahalagang papel man sa regular na pakikikabtang niato sa paghuhulit kan Kahadean. Helingon niato kun paano.
Sarong Bukas na Imbitasyon!
3. Sa anong klaseng tubig inaagda an mga tawo kan imbitasyon na “madia”?
3 Sarong bukas na imbitasyon an ipinapaabot sa mga tawo paagi sa banal na espiritu. (Basahon an Kapahayagan 22:17.) An imbitasyon nagsasabing “madia” asin uminom nin sarong espesyal na marhay na klase nin tubig tanganing mawara an pagkapaha. Iyan bakong ordinaryong tubig na kompuesto nin hidroheno asin oksiheno. Minsan ngani mahalaga an literal na tubig sa pagsustenir nin buhay sa daga, sarong laen na klase nin tubig an nasa isip ni Jesus kan sia magsabi sa sarong Samaritana sa may bubon: “An siisay man na uminom sa tubig na itatao ko sa saiya dai na noarin man mapapaha, kundi an tubig na itatao ko sa saiya magigin burabod nin tubig sa saiya na nagbubulakbugak tanganing magtao nin buhay na daing katapusan.” (Juan 4:14) An ekstraordinaryong tubig na ipinag-iimbitar sa mga tawo na inomon nagtatao nin buhay na daing katapusan.
4. Paano nagkaigwa nin pangangaipo para sa tubig nin buhay, asin ano an irinerepresentar kan tubig na iyan?
4 Nagkaigwa nin pangangaipo para sa siring na tubig nin buhay kan an enot na tawong si Adan umiba sa saiyang agom na si Eva sa pagsuway sa naglalang mismo sa sainda—si Jehova Dios. (Gen. 2:16, 17; 3:1-6) An enot na mag-agom pinalayas sa saindang istaran na hardin “tanganing dai [ni Adan] ikaunat an saiyang kamot asin talagang magkua man nin bunga sa kahoy nin buhay asin magkakan patin mabuhay sagkod sa panahon na daing talaan.” (Gen. 3:22) Pagkatapos kaiyan, bilang apoon kan katawohan, ipinamana ni Adan an kagadanan sa bilog na rasa nin tawo. (Roma 5:12) Irinerepresentar kan tubig nin buhay an gabos na probisyon nin Dios sa pagbalukat sa makinuyog na mga tawo sa kasalan asin kagadanan saka pagtao sa sainda nin daing sagkod na sangkap na buhay sa Paraiso digdi sa daga. Posible nanggad an mga probisyon na ini paagi sa atang na pantubos ni Jesu-Cristo.—Mat. 20:28; Juan 3:16; 1 Juan 4:9, 10.
5. Kiisay naggikan an imbitasyon na ‘madia asin kumua kan tubig nin buhay na daing bayad’? Ipaliwanag.
5 Kiisay naggikan an imbitasyon na ‘madia asin kumua kan tubig nin buhay na daing bayad’? Kun an gabos na probisyon para sa buhay paagi ki Jesus lubos nang nakakamtan kan katawohan durante kan Milenyal na Paghade ni Cristo, ikakaladawan iyan na “sarong salog kan tubig nin buhay, na malinaw siring sa kristal.” An salog na iyan naheheling na “nagbobolos hale sa trono nin Dios asin kan Kordero.” (Kap. 22:1) Kun siring, si Jehova na Paratao nin Buhay iyo an Burabod kan tubig na may mga elementong nagtatao nin buhay. (Sal. 36:9) Sia an Saro na nagpapagin posible na makua an tubig na iyan paagi sa “Kordero,” si Jesu-Cristo. (Juan 1:29) An simbolikong salog na ini iyo an paagi ni Jehova tanganing haleon an gabos na itinaong danyos sa katawohan kan pagsuway ni Adan. Iyo, si Jehova Dios an Gikanan kan imbitasyon na “madia.”
6. Kasuarin nagpoon na bumolos an “salog kan tubig nin buhay”?
6 Minsan ngani an “salog kan tubig nin buhay” mabolos sa pinakalubos na paagi durante kan Sangribong Taon na Paghade ni Cristo, iyan nagpoon nang magbolos sa “aldaw kan Kagurangnan,” na puminoon kan “an Kordero” patukawon sa trono sa langit kan 1914. (Kap. 1:10) Huli kaini, makukua na pagkatapos kaiyan an nagkapirang probisyon para sa buhay. Kalabot dian an Tataramon nin Dios, an Biblia, huling an mensahe kaiyan inaapod na “tubig.” (Efe. 5:26) Bukas sa gabos an imbitasyon na “kumua kan tubig nin buhay” paagi sa pagdangog asin paghimate sa maogmang bareta kan Kahadean. Alagad siisay an aktuwal na naggigibo kan pag-imbitar sa aldaw kan Kagurangnan?
“An Nobya” Nagsasabing “Madia”!
7. Sa “aldaw kan Kagurangnan,” siisay an enot na nagpaabot kan imbitasyon na “madia,” asin para kiisay?
7 An mga miembro kan grupong nobya—an mga Kristiano na linahidan nin espiritu—iyo an enot na nagpaabot kan imbitasyon na “madia.” Kiisay? Siempre, dai sasabihon kan nobya sa saiyang sadiri na “Madia!” An saiyang mga tataramon para sa mga may paglaom na magkamit nin buhay na daing katapusan sa daga pagkatapos kan “guerra kan dakulang aldaw nin Dios na Makakamhan sa Gabos.”—Basahon an Kapahayagan 16:14, 16.
8. Ano an nagpapaheling na an linahidan na mga Kristiano nagpapaabot na kan imbitasyon ni Jehova poon pa kaidtong 1918?
8 An linahidan na mga parasunod ni Cristo nagpapaabot na kan imbitasyon poon pa kaidtong 1918. Kan taon na iyan, an pampublikong pahayag na may temang “An Minilyon na Nabubuhay Ngonyan Tibaad Dai Na Noarin Man Magadan” nagtao nin paglaom na dakol an magkakamit nin buhay sa paraisong daga pagkatapos kan ralaban nin Armagedon. An sarong pahayag sa kombension kan Mga Estudyante sa Biblia sa Cedar Point, Ohio, E.U.A., kan 1922 nagsadol sa mga naghihinanyog na ‘ipaisi an Hade asin an saiyang kahadean.’ An sadol na ini nakatabang sa mga natatada kan grupong nobya tanganing ikapaabot an imbitasyon sa dakol pang tawo. Kan 1929, an isyu kan The Watchtower na Marso 15 igwa nin artikulo na may titulong “Gracious Invitation,” (Maboot na Imbitasyon) na an pinakatemang teksto iyo an Kapahayagan 22:17. Sa sarong kabtang, an artikulo nagsabi: “An maimbod na grupong natatada uminiba sa [Kaharohalangkawe] sa maboot na pag-imbitar asin nagsabi, ‘Madia.’ An mensaheng ini dapat na ibalangibog sa mga may pagmawot para sa katanosan asin katotoohan. Iyan kaipuhan nang gibohon ngonyan.” Sagkod sa panahon na ini, an grupong nobya nagpapadagos sa pagpaabot kan imbitasyon na iyan.
“An Siisay Man na Nagdadangog Magsabi: ‘Madia!’”
9, 10. Paano inimbitaran na magsabi man nin “Madia!” an mga nakadangog kan imbitasyon?
9 Kumusta man an mga nakakadangog kan imbitasyon na “madia”? Iniimbitaran sinda na magsabi man nin “Madia!” Halimbawa, an The Watchtower na Agosto 1, 1932 nagsabi sa pahina 232: “An gabos na gusto, dagkahon kan mga linahidan na makikabtang sa pagsabi kan maogmang bareta kan kahadean. Dai ninda kaipuhan na magin linahidan kan Kagurangnan tanganing magpahayag kan mensahe kan Kagurangnan. Sarong dakulang karangahan sa mga saksi ni Jehova na maaraman ngonyan na tinotogotan sindang magdara kan tubig nin buhay sa grupo nin mga tawo na posibleng makaligtas sa Armagedon asin matawan nin buhay na daing katapusan digdi sa daga.”
10 Bilang pagdoon kan paninimbagan kan nagdadangog na magsabing “Madia!” an pahina 249 kan The Watchtower na Agosto 15, 1934 nagsabi: “An mga miembro kan grupong Jonadab dapat na umiba sa mga miembro kan antitipikong grupong Jehu, na iyo an mga linahidan, asin ianunsiar an mensahe kan kahadean, minsan ngani bako sinda an linahidan na mga saksi ni Jehova.” Kan 1935, lininaw kun siisay an “dakulang kadaklan” na sinambit sa Kapahayagan 7:9-17. Nagin makosogon na pampahiro iyan sa pagpaabot kan imbitasyon nin Dios. Poon kaidto, sarong nagdadakol na bilang kan dakulang kadaklan nin tunay na mga parasamba—na labi nang pitong milyon ngonyan—an naghihimate sa imbitasyon na iyan. Pagkatapos nindang mapag-apresyar na madangog an mensahe, sinda nagdusay sa Dios, nagpabautismo sa tubig, asin uminiba sa grupong nobya sa aktibong pagpaabot sa iba kan imbitasyon na ‘madia asin inoma an tubig nin buhay na daing bayad.’
“An Espiritu” Nagsasabing “Madia!”
11. Kan enot na siglo C.E., ano an nagin papel kan banal na espiritu sa paghuhulit?
11 Kan si Jesus naghuhulit sa sarong sinagoga sa Nazaret, binuksan nia an rolyo ni propeta Isaias asin binasa: “An espiritu ni Jehova yaon sa sako, huli ta linahidan nia ako na magpahayag kan maogmang bareta sa mga dukha, isinugo nia ako na maghulit nin pagkabutas sa mga bihag asin nin pagkauli kan pagheling sa mga buta, na magbutas sa mga inapi, na maghulit kan taon nin pag-ako ni Jehova.” Dangan iinaplikar ni Jesus an mga tataramon na ini sa saiyang sadiri, na nagsasabi: “Ngonyan an kasuratan na ini na nadangog pa sana nindo naootob na.” (Luc. 4:17-21) Bago si Jesus magsakat sa langit, sinabihan nia an saiyang mga disipulo: “Kamo mag-aako nin kapangyarihan kun dumatong na sa saindo an banal na espiritu, asin kamo magigin mga saksi ko . . . sagkod sa kaporoporohi kan daga.” (Gibo 1:8) Kan enot na siglo, pambihira an nagin papel kan banal na espiritu kun dapit sa paghuhulit.
12. Ano an papel kan espiritu nin Dios sa pagpaabot kan imbitasyon sa panahon niato?
12 Ano an papel kan banal na espiritu nin Dios sa pagpaabot kan imbitasyon sa mga tawo sa panahon niato? Si Jehova an Gikanan kan banal na espiritu. Ginagamit nia an espiritu tanganing buksan an puso asin isip kan mga kabilang sa grupong nobya tanganing masabotan an saiyang Tataramon, an Biblia. Pinapahiro sinda kan espiritu na ipaabot an imbitasyon asin ipaliwanag an sono sa Kasuratan na mga katotoohan sa mga may paglaom na mabuhay sagkod lamang sa Paraiso digdi sa daga. Kumusta man an mga nag-aako kan imbitasyon, nagigin disipulo ni Jesu-Cristo, asin nagpapaabot kan imbitasyon sa iba pa? Igwa man nin papel an espiritu sa kamugtakan ninda. Huling nabautismohan ‘sa ngaran kan banal na espiritu,’ nakikikooperar asin nagsasarig sinda sa espiritu tanganing magtabang sa sainda. (Mat. 28:19) Isipon man an mensahe na ihinuhulit kan mga linahidan asin kan nagdadakol na dakulang kadaklan. Iyan gikan sa Biblia—an libro na isinurat paagi sa direktang impluwensia kan espiritu nin Dios. Sa siring, ipinapaabot an imbitasyon paagi sa banal na espiritu. Sa katunayan, ginigiyahan kita kan espiritung iyan. Ano an maninigong magin epekto kaiyan sa kun guranong panahon an ginagamit niato sa pag-imbitar?
Sinda “Padagos na Nagsasabi: ‘Madia!’”
13. Ano an ipinaparisa kan mga tataramon na “an espiritu asin an nobya padagos na nagsasabi: ‘Madia!’”?
13 “An espiritu asin an nobya” dai sana nagsasabing “Madia!” An berbo sa orihinal na lenguahe na ginamit digdi nagpaparisa nin dagos-dagos na aksion. Sa pagkonsiderar sa bagay na iyan, an New World Translation nagsasabi: “An espiritu asin an nobya padagos na nagsasabi: ‘Madia!’” Ipinaparisa kaini an pagigin regular sa pagpaabot kan imbitasyon nin Dios. Kumusta man an mga nagdadangog asin nag-aako kan imbitasyon? Sinda nagsasabi man nin “Madia!” An dakulang kadaklan kan tunay na mga parasamba sinasambit na ‘naggigibo nin sagradong paglilingkod sa templo ni Jehova aldaw asin banggi.’ (Kap. 7:9, 15) Ano an boot sabihon kan ‘aldaw asin bangging paglilingkod’? (Basahon an Lucas 2:36, 37; Gibo 20:31; 2 Tesalonica 3:8.) An halimbawa kan gurang nang propetisa na si Ana asin kan apostol na si Pablo nagpapaheling na an ‘aldaw asin bangging paglilingkod’ nagpaparisa nin pagigin danay asin nin maigot na paghihingoa sa ministeryo.
14, 15. Paano ipinaheling ni Daniel an kahalagahan nin pagigin regular sa pagsamba?
14 Ipinaheling man ni propeta Daniel an kahalagahan nin pagigin regular sa pagsamba. (Basahon an Daniel 6:4-10, 16.) Dai nia liniwat an saiyang rutina sa espirituwal—an pinagkatodan na niang pamimibi sa Dios “tolong beses kada aldaw, . . . arog kan dayaday niang ginigibo”—dawa sa laog nin sarong bulan, minsan ngani nagresulta iyan sa pag-apon sa saiya sa lungib kan mga leon. An gawe-gawe nia nagparisa nanggad sa mga nagmamasid na mayo na nin mas mahalaga pa kisa sa regular na pagsamba ki Jehova!—Mat. 5:16.
15 Pagkatapos nin sarong banggi na si Daniel nasa lungib kan mga leon, an hade mismo nagduman asin nagkurahaw: “O Daniel, lingkod kan buhay na Dios, ano ikinasalbar ka sa mga leon kan saimong Dios na pinaglilingkodan mo nin danay?” Si Daniel tolos-tolos na nagsimbag: “O hade, mabuhay ka sagkod sa mga panahon na daing talaan. An sakuyang Dios nagsugo kan saiyang anghel asin tinikom an ngoso kan mga leon, asin dai ninda ako inano, mantang sa atubangan nia nanompongan ako na daing sala; asin sa atubangan mo man, O hade, mayo ako nin ginibong nakakadanyar.” Binendisyonan ni Jehova si Daniel huli sa paglilingkod “nin danay.”—Dan. 6:19-22.
16. Kun dapit sa pakikikabtang niato sa ministeryo, ano an mga maninigo niatong ihapot huli sa halimbawa ni Daniel?
16 Si Daniel andam na magadan imbes na pabayaan an saiyang rutina sa espirituwal. Kumusta man kita? Anong mga pagsasakripisyo an ginigibo niato o andam niatong gibohon tanganing danay na ikapahayag an maogmang bareta kan Kahadean nin Dios? Iyo nanggad, dai niato maninigong palipason an sarong bulan na dai sinasabi sa iba an manongod ki Jehova! Sagkod sa mapupuede, bako daw na maninigo niatong pagmaigotan na makikabtang sa ministeryo kada semana? Dawa kun kita nalilimitaran na gayo sa pisikal asin nakakapagpatotoo sa laog nin 15 minutos sana durante kan bulan, maninigo niatong ireport an aktibidad na ini. Taano? Huli ta kaiba kan espiritu asin kan nobya, minamawot niatong padagos na magsabing “Madia!” Iyo, gusto niatong gibohon an pinakamakakaya niato tanganing magdanay na regular na parahayag kan Kahadean.
17. Anong mga oportunidad sa pagpaabot kan imbitasyon ni Jehova an dai niatong maninigong palipason?
17 Maninigo niatong pagmaigotan na ipaabot an imbitasyon ni Jehova sa lambang oportunidad, bako sanang sa mga panahon na itinagama niato para sa pampublikong ministeryo. Sarong pribilehio nanggad na ipaabot sa mga napapaha an imbitasyon na ‘madia asin kumua kan tubig nin buhay na daing bayad’ sa ibang panahon, arog baga kun namamakal, nagbibiahe, nagbabakasyon, nagtatrabaho, o pasiring sa eskuelahan! Dawa kun an mga autoridad nagbubugtak nin restriksion sa paghuhulit, kita mataktikang nagpapadagos sa paghuhulit—tibaad naghaharongharong sa paaging dai naririsa o nagtatao nin mas dakol na panahon sa impormal na pagpatotoo.
Padagos na Magsabing “Madia!”
18, 19. Paano nindo ipinapaheling na pinapahalagahan nindo an pribilehio na magin kapwa trabahador nin Dios?
18 Sa laog nin labi nang siyam na dekada ngonyan, an espiritu asin an nobya nagsasabing “Madia!” sa siisay man na napapaha sa tubig nin buhay. Nadangog na daw nindo an saindang nakakaogmang imbitasyon? Kun siring, sinasadol kamo na ipaabot man sa iba an imbitasyon na ini.
19 Dai niato aram kun sagkod noarin ipapaabot an mamomoton na imbitasyon ni Jehova, alagad huli sa paghimate niato dian paagi sa pagsabing “Madia!” kita nagigin kapwa trabahador nin Dios. (1 Cor. 3:6, 9) Sarong pribilehio nanggad iyan! Logod na satong ipaheling na pinapahalagahan niato an pribilehiong iyan asin “danay kitang magdolot sa Dios nin atang nin pag-omaw” paagi sa regular na paghuhulit. (Heb. 13:15) Kaiba kan grupong nobya, an mga may daganon na paglaom padagos na magsabing “Madia!” Asin logod na dakol pa an “kumua kan tubig nin buhay na daing bayad”!
Ano an Nanodan Nindo?
• Kiisay ipinapaabot an imbitasyon na “madia”?
• Taano ta masasabing naggigikan ki Jehova an imbitasyon na “madia”?
• Ano an papel kan banal na espiritu sa pagpaabot kan imbitasyon na “madia”?
• Taano ta maninigo niatong pagmaigotan na magin regular sa ministeryo?
[Mga Hapot Para sa Pag-adal]
[Tsart/Mga Ritrato on pahina 16]
(Para sa aktuwal na format, hilingon an publikasyon)
Padagos na Magsabing “Madia!”
1914
5,100 na parahayag
1918
Dakol an magkakamit nin buhay sa Paraiso digdi sa daga
1922
“Ipaisi, ipaisi, ipaisi, an Hade asin an saiyang kahadean”
1929
An maimbod na natatada nagsasabing “Madia!”
1932
An imbitasyon na magsabing “Madia!” ipinapaabot bako sanang sa mga linahidan
1934
An grupong Jonadab iniimbitaran na maghulit
1935
Ipinamidbid kun siisay an “dakulang kadaklan”
2009
7,313,173 na parahayag