1. Taano ta masasabing si Jehova an inot asin pinakanangungurog na Ebanghelisador?

AN EBANGHELISADOR saro na nagpapaabot nin maugmang bareta. An inot asin pinakanangungurog na Ebanghelisador iyo si Jehova Diyos. Pagkatapos tulos kan pagrebelde kan satong inot na mga magurang, ipinahayag ni Jehova an maugmang bareta na an halas—sa katunayan, si Satanas na Diyablo—lalaglagon. (Gen. 3:15) Sa laog nin dakul na siglo, pinasabngan ni Jehova an maimbod na mga lalaki na isurat an mga detalye dapit sa kun paano hahalion an katuyawan sa saiyang ngaran, kun paano hahalion an danyos na ginibo ni Satanas, asin kun paano makakamtan giraray kan mga tawo an mga oportunidad na iwinara ni Adan asin Eva.

2. (a) Ano an papel kan mga anghel may koneksiyon sa gibuhon na pag-eebanghelyo? (b) Anong halimbawa an itinao ni Jesus para sa mga ebanghelisador?

² An mga anghel mga ebanghelisador man. Sinda mismo nagpapaabot nin maugmang bareta, asin tinatabangan ninda an iba sa pagpalakop nin maugmang bareta. (Luc. 1:19; 2:10; Gui. 8:26, 27, 35; Kap. 14:6) Kumusta man an arkanghel na si Miguel? Mantang nasa daga bilang si Jesus, itinao niya an halimbawa na maninigong arugon nin mga tawong ebanghelisador. Isinentro nanggad niya an saiyang buhay sa pagpalakop kan maugmang bareta!—Luc. 4:16-21.

3. (a) Ano an maugmang bareta na ipinapalakop ta? (b) Bilang mga ebanghelisador, sa anong mga hapot kita interesado?

³ Pinagbutan ni Jesus an saiyang mga disipulo na magin mga ebanghelisador. (Mat. 28:19, 20; Gui. 1:8) Sinadol ni apostol Pablo an saiyang kapwa trabahador na si Timoteo: “Gibuhon mo an gibuhon nin sarong ebanghelisador, lubos mong utubon an saimong ministeryo.” (2 Tim. 4:5, NW) Bilang mga parasunod ni Jesus, ano an maugmang bareta na ipinapalakop ta? Kaiba diyan an nakakaparigon sa buot na katotoohan na kita namumutan kan satong langitnon na Ama, si Jehova. (Juan 3:16; 1 Ped. 5:7) An sarong panginot na paagi na ginagamit ni Jehova Diyos sa pagpahayag kan saiyang pagkamuot  iyo an saiyang Kahadian. Kaya, nauugma kitang sabihon sa iba na an gabos na nagpapasakop sa pamamahala kan Kahadian, nagsusunod sa Diyos, asin naggigibo kun ano an matanos puwedeng magin katuod niya. (Sal. 15:1, 2) Sa katunayan, katuyuhan ni Jehova na halion an gabos na bakong makatanusan na pagsakit. Hahalion niya man an kulog na dara kan mga nagigirumduman na nakaaging pagsakit. Maugmang bareta nanggad! (Isa. 65:17) Bilang mga ebanghelisador, pag-ulayan niyato an simbag sa duwang mahalagang hapot: Taano ta mahalagang madangog ngunyan kan mga tawo an maugmang bareta? Asin paano ta mapangganang mauutob an satong papel bilang mga ebanghelisador?

4. Anong bakong totoong mga istorya dapit sa Diyos an sinasabi sa mga tawo kun minsan?

⁴ Imahinara na may nagsabi sa saimo na ika asin an saindong pamilya inabandonar kan saimong ama. Ipamugtak na an mga naghihingakong nakakamidbid sa saiya nagsasabi na siya daing malasakit, masinekreto, asin maringis. Tibaad patubudon ka pa ngani kan iba na daing saysay na hanapon pa an saimong ama huling siya gadan na. Kaagid kaiyan na mga istorya dapit sa Diyos an sinasabi sa dakul na tawo. Tinutukduan sinda na an Diyos sarong misteryo, na siya imposibleng mamidbid, o na siya maringis. Halimbawa, may mga lider nin relihiyon na nagsasabi na an maraot na mga tawo daing sagkod na papadusahan nin Diyos sa sarong lugar nin pagpasakit. Ibinabasol man kan iba sa Diyos an pagsakit na kawsa kan natural na mga kalamidad. Dawa ngani an mga pangyayaring ini minagadan nin marahay asin maraot na mga tawo, sinasabi ninda na ini padusa hali sa Diyos.

5, 6. Paano nakaapektar sa mga tawo an teoriya nin ebolusyon asin palsong mga doktrina?

⁵ Pig-iinsistir man kan iba na an Diyos dai nag-eeksistir. Mapadapit digdi, konsideraron an teoriya nin ebolusyon. Sinasabi kan dakul na nagsusuportar diyan na an buhay basta na sana luminataw na mayo nin ano man na pagdirehir nin saro na intelihente. Sinasabi ninda na mayo nin Kaglalang. May mga nagsasabi pa ngani na an tawo saro sanang klase nin hayop, kaya bako man daang makangangalas kun an tawo minagawi nin arog sa hayop. Nangangatanusan sinda na an mga makusog, na maringis na nagdodominar sa mga maluya, nagsusunod sana sa inaapod na mga ley nin naturalesa. Kaya bakong makangangalas na dakul an naniniwala na parte na kan buhay ta an inhustisya. Kun siring, an mga naniniwala sa ebolusyon mayo nin tunay na paglaom.

⁶ Daing duda na an teoriya nin ebolusyon asin palsong mga doktrina nakakontribwir sa kasakitan na naeeksperyensiyahan kan katawuhan sa huring mga aldaw. (Roma 1:28-31; 2 Tim. 3:1-5) An mga katukduan na ini nin tawo dai nakapagtao nin tunay asin nagdadanay na maugmang bareta. Imbes, arog kan sinabi ni apostol Pablo, iyan nagin dahilan na an mga tawo ‘nadidikluman an pag-iisip, bulag sa buhay nin Diyos.’ (Efe. 4:17-19) Dugang pa, an teoriya nin ebolusyon asin palsong mga doktrina nakaulang sa mga tawo na akuon an maugmang bareta na hali sa Diyos.—Basahon an Efeso 2:11-13.

7, 8. Ano an solamenteng paagi tanganing lubos na masabutan kan mga tawo an maugmang bareta?

⁷ Tanganing makapakipag-ulian sa Diyos, dapat ngunang makumbinsir an mga tawo na si Jehova nag-eeksistir asin na igwang marahay na mga dahilan na rumani sa saiya. Matatabangan ta sinda na magkaigwa kan kaaraman na iyan paagi sa pagdagka sa sainda na pag-adalan an mga linalang. Kun gigibuhon ninda iyan nin may bukas na isip, makakanuod sinda dapit sa kadunungan asin kapangyarihan nin Diyos. (Roma 1:19, 20) Tanganing matabangan an mga tawo na makamati nin may pagkangirhat na paggalang kun pinag-iisipan an dapit sa mga ginibo kan satong Dakulang Kaglalang, puwede tang gamiton an duwang brosyur na Linalang daw an Buhay? asin The Origin of Life—Five Questions Worth Asking. Pero, kun an mga linalang sana an pag-aadalan ninda, dai ninda makukua an simbag sa nagkapira sa pinakadipisil na mga hapot sa buhay, na arog baga kaini: Taano ta tinutugutan nin Diyos an pagsakit? Ano an katuyuhan nin Diyos para sa daga? An Diyos daw nagmamakulog sa sako bilang indibiduwal?

 ⁸ An solamenteng paagi tanganing lubos na masabutan kan mga tawo an maugmang bareta dapit sa Diyos asin sa saiyang katuyuhan iyo an pag-adal kan Bibliya. Pribilehiyo nanggad niyato na tabangan an mga tawo na makua an simbag sa mga hapot ninda! Pero, tanganing maabot an puso kan mga nagdadangog, urog pa sa pagsabi nin totoong impormasyon an kaipuhan tang gibuhon; dapat makumbinsir ta sinda. (2 Tim. 3:14) Magigin mas matibay kitang mangumbinsir kun susunudon ta an halimbawa ni Jesus. Taano ta mapanggana siyang marhay? An sarong dahilan iyo an epektibong paggamit niya nin mga hapot. Paano ta siya maaarog?

9. Tanganing matabangan an mga tawo sa espirituwal na paagi, ano an dapat tang gibuhon?

⁹ Arog ni Jesus, taano ta maninigo kitang gumamit nin mga hapot sa satong ministeryo? Buweno, pag-isipan an situwasyon na ini: Sinabihan ka kan saimong doktor na igwa siya nin marahay na bareta. Mabubulong niya an saimong hilang kun maagi ka nin delikadong operasyon. Posibleng maniwala ka sa saiya. Pero, paano kun nangako siya kaiyan bago pa man siya maghapot nin ano man dapit sa saimong salud? Kun arog kaiyan, posibleng marhay na dai ka magtitiwala sa saiya. Gurano man katibay kan doktor, kaipuhan niyang maghapot asin aramon nguna an mga sintomas bago siya makakapagtao nin ano man na tabang. Kaagid kaiyan, tanganing matabangan an mga tawo na akuon an maugmang bareta kan Kahadian, dapat na magin matibay kita sa paggamit nin epektibong mga hapot. Matatabangan ta sana sinda kun aram ta na an tunay na kamugtakan ninda sa espirituwal.

10, 11. Ano an puwede tang magibo kun inaarog ta an paagi nin pagtutukdo ni Jesus?

¹⁰ Aram ni Jesus na an piniling marhay na mga hapot dai sana nakakatabang sa paratukdo na may maaraman dapit sa tinutukduan kundi nakakamotibar man sa nagdadangog na magpartisipar sa pag-urulay. Halimbawa, kan may gustong itukdo si Jesus sa saiyang mga disipulo dapit sa kapakumbabaan, may ihinapot nguna siya sa sainda na nakakapukaw sa isip. (Mar. 9:33) Tanganing tukduan si Pedro kun paano mangatanusan basado sa mga prinsipyo, nagpalataw si Jesus nin hapot na igwa nin pagpipilian na simbag. (Mat. 17:24-26) Sa saro pang pagkakataon, kan buot ni Jesus na maaraman an nasa puso kan saiyang mga disipulo, nagbangon siya nin sunod-sunod na punto de vistang hapot. (Basahon an Mateo 16:13-17.) Paagi sa paggamit nin mga hapot asin pagsambit nin mga punto, urog pa sa pagsabi nin totoong impormasyon an ginibo ni Jesus. Naabot niya an puso, na minomotibar an mga tawo na humiro kauyon kan maugmang bareta.

¹¹ Kun inaarog ta si Jesus paagi sa epektibong paggamit nin mga hapot, kisiyera tulong bagay an nagigibo ta. Naaaraman ta an pinakamarahay na paagi kun paano matatabangan an mga tawo, napapangganahan ta an posibleng mga pagkontra, asin natutukduan ta an mga mapakumbaba kun paano sinda mismo makikinabang. Estudyaran an tulong senaryo na nagpapahiling kun paano kita epektibong makakagamit nin mga hapot.

12-14. Paano mo matatabangan an saimong aki na magkaigwa nin urog na kumpiyansa sa paghiras kan maugmang bareta? Magtao nin halimbawa.

¹² Inot na senaryo: Bilang magurang, ano an gigibuhon mo kun sabihon kan saimong tin-edyer na aki na nahahadit siya kun baga kaya niyang idepensa an saiyang pagtubod dapit sa paglalang pag nakikipag-ulay sa kaklase? Daing duda na gusto mong tabangan siya na magkaigwa nin kumpiyansa pag naghihiras kan maugmang bareta. Kaya, imbes na kritikaron siya o magtao tulos nin sadol, taano ta dai arugon an halimbawa ni Jesus asin magpalataw nin punto de vistang mga hapot? Paano mo iyan magigibo?

¹³ Pagkatapos na basahon kaiba kan saimong  aki an nagkapirang kabtang kan brosyur na The Origin of Life—Five Questions Worth Asking, puwede mo siyang haputon kun anong mga argumento an pinakanakakapukaw sa isip para sa saiya. Dagkahon siya na aramon an sadiri niyang mga dahilan kun taano ta kumbinsido siya na igwa nin Kaglalang asin kun taano ta gusto niyang gibuhon an kabutan nin Diyos. (Roma 12:2) Sabihon sa saimong aki na dai man kaipuhan na eksaktong magkapareho an mga dahilan nindo.

¹⁴ Ipaliwanag sa saimong aki na kun nakikipag-ulay sa kaklase, puwede niyang arugon an ginibo mong paagi. An buot sabihon, puwede siyang magsabi nin nagkapirang impormasyon dangan magpalataw nin mga hapot tanganing matumbok an punto o makua an punto de vista. Halimbawa, puwedeng ipabasa sa kaklase an kahon sa pahina 21 kan brosyur na Origin of Life. Dangan puwedeng ihapot kan saimong aki, “Totoo daw na mas dakul pa man giraray na impormasyon an kayang isaray kan DNA kisa kan arin man na kompyuter ngunyan?” Posibleng marhay na iyo an isisimbag kan kaklase. Pakatapos, puwedeng ihapot kan saimong aki, “Kun dai ngani iyan nagigibo kan mga teknisyan nin kompyuter, paano pa daw iyan magigibo nin daing isip na bagay sa sadiri sana kaiyan?” Tanganing matabangan an saimong aki na magkaigwa nin urog na kumpiyansa sa pakikipag-ulay sa iba dapit sa saiyang pagtubod, puwede kamong regular na mag-ensayo. Kun sinasanay mo an saimong aki na epektibong gumamit nin mga hapot, matatabangan mo siya na utubon an saiyang papel bilang ebanghelisador.

15. Paano kita puwedeng gumamit nin mga hapot tanganing matabangan an sarong ateista?

¹⁵ Ikaduwang senaryo: Sa satong gibuhon na pagpapatotoo, nanunumpungan ta an mga nagdududa sa pag-eksister nin Diyos. Halimbawa, tibaad sabihon kan saro na siya sarong ateista. Imbes na tapuson na an pakikipag-ulay huli kaiyan, puwede ta siyang magalang na haputon kun gurano na siya kahaloy na ateista asin kun taano ta arog kaiyan an nagin pagmansay niya. Pagkatapos na dangugon an saiyang simbag asin pasalamatan huling pinag-isipan niyang marhay an bagay na iyan, puwede tang ihapot kun baga sa hiling niya sala na magbasa  nin babasahon na nagpepresentar nin ebidensiya na linalang an buhay. Kun bukas an isip kan kagharong, posibleng marhay na sasabihon niya na bakong rasonable na magsayuma an saro na hilingon an siring na ebidensiya. Dangan puwede tang ialok an brosyur na Linalang daw an Buhay? o an The Origin of Life—Five Questions Worth Asking. An mataktikang mga hapot, na ginagamit sa mabuot na paagi, puwedeng magserbing liyabe na nakakabukas sa puso nin saro tanganing akuon niya an maugmang bareta.

16. Taano ta dai kita maninigong makontento pag binabasa sana nin sarong tinutukduan sa Bibliya an mga simbag sa pinag-aadalan na publikasyon?

¹⁶ Ikatulong senaryo: Kun nagkokondukta nin pag-adal sa Bibliya, tibaad pabayaan ta sana an tinutukduan na utruhon an nakaimprentang simbag sa pinag-aadalan na publikasyon. Pero, kun gigibuhon ta iyan, mauulang ta an espirituwal na pagtalubo niya. Taano? Huling kun inuutro sana nin sarong tinutukduan an mga simbag na mayong paghurop-hurop, posibleng marhay na dai siya magkakaigwa nin hararom na espirituwal na mga gamot. Madali sana siyang magin arog sa sarong tinanom na naluluyos huli sa arog-init na pagtumang. (Mat. 13:20, 21) Tanganing malikayan iyan, kaipuhan tang haputon an satong tinutukduan kun ano an sabuot niya dapit sa saiyang nanunudan. Pagmaigutan na aramon kun baga uyon siya sa pinalataw na mga punto. An mas mahalaga, dagkahon siyang sabihon kun taano ta siya uyon o dai. Dangan tabangan siya na mangatanusan basado sa Kasuratan tanganing siya mismo makaabot sa tamang mga kongklusyon. (Heb. 5:14) Kun epektibo kitang naggagamit nin mga hapot, an mga indibiduwal na satong tinutukduan mas posibleng marhay na makakagamot nin marigon sa pagtubod asin makakapanindugan laban sa paghihinguwa kan mga makontra o gustong mandaya sa sainda. (Col. 2:6-8) Ano pa an puwede niyatong gibuhon tanganing mautob an satong papel bilang mga ebanghelisador?

17, 18. Kun may iniibanan sa ministeryo, paano kita magtitinabangan?

¹⁷ Isinugo ni Jesus an saiyang mga disipulo nin manduwa-duwa sa paghuhulit. (Mar. 6:7; Luc. 10:1) Paghaloy-haloy, sinambit ni apostol Pablo an ‘mga katabang,’ o kapwa trabahador, na ‘nagpagal sa kaibahan niya diyan sa ebanghelyo.’ (Fil. 4:3) Bilang pag-arog sa halimbawang iyan sa Kasuratan, kan 1953, pinunan kan mga parahayag kan Kahadian an sarong programa nin pagsasanay sa iba sa ministeryo.

¹⁸ Kun iniibanan mo sa ministeryo an saro pang parahayag, paano kamo magtitinabangan? (Basahon an 1 Corinto 3:6-9.) Sa saimong Bibliya, bukasan an tekstong binabasa kan saimong kapartner. Magin atentibo sa nagtataram, an kapartner mo man o an kagharong. Subaybayan na marhay an pag-urulay enkaso kaipuhanon kan kapartner mo nin tabang tanganing maatubang an sarong pagkontra. (Par. 4:12) Pero, mahalagang tandaan ini: Likayan na magsaliot kun epektibo an pangangatanusan kan saimong kapartner. An saimong dai makontrol na entusiyasmo tibaad makadisganar sa saimong kapartner asin makaparibaraw sa kagharong. Kun minsan, tibaad angay man na makiayon sa pag-urulay. Pero kun mataram ka, limitaran iyan sa saro o duwa sanang halipot na komento. Dangan pabayaan an kapartner mo na ipadagos an pakikipag-ulay.

19. Ano an marahay na tandaan ta, asin taano?

¹⁹ Paano kamo magtitinabangan kan saimong kapartner mantang naglalakaw pasiring sa sunod na harong? Taano ta dai gamiton an panahon na iyan tanganing pag-ulayan kun paano pa puwedeng mapakarhay an saindong presentasyon? Likayan na magtaram nin mga bagay na nakakadisganar dapit sa mga nakaistar sa saindong teritoryo. Likayan man na pagparaulayan an mga kaluyahan kan mga kapwa ebanghelisador. (Tal. 18:24) Marahay na tandaan ta na kita mga lalagan na gibo sa dalipay. Nagpahiling si Jehova sa sato nin ekstraordinaryong kabuutan kan ipagkatiwala niya sa sato an kayamanan kan ministeryo kan maugmang bareta. (Basahon an 2 Corinto 4:1, 7.) Kaya lugod na gabos kita magpahiling nin apresasyon sa kayamanan na iyan paagi sa paggibo kan satong pinakamakakaya tanganing utubon an satong papel bilang mga ebanghelisador.