AN TAON na ini an ika-100 na anibersaryo kan inot na ipasali an “Photo-Drama of Creation,” sarong halawig na pelikula na dinisenyo tanganing patalubuon an pagtubod sa Bibliya bilang an Tataramon nin Diyos. Sa panahon na luway-luway na naraot an pagtubod kan dakul huli sa paniniwala sa ebolusyon, mapagsiyasat na kritisismo (higher criticism), asin pagkamapagduda, sinurog kan “Photo-Drama” si Jehova bilang an Kaglalang.

Daing untok na naghanap si Charles T. Russell, an nanginot sa Mga Estudyante sa Bibliya, nin pinakaepektibo asin pinakamarikas na paaging posible tanganing ikapalakop an katotoohan sa Bibliya. Labing tulong dekada nang ginagamit kan Mga Estudyante sa Bibliya an puwersa kan inimprentang mga babasahon. Ngunyan, nakahiling sinda nin bagong pamamaagi—an pelikula.

Kan dekada nin 1890, iinintrodusir sa publiko an pelikula na mayong tanog. Kaidto pang 1903, sarong relihiyosong pelikula an ipinasali sa sarong simbahan sa Siyudad nin New York. Kan 1912, mantang nagpupuon pa sana an industriya nin pelikula, makusog an buot na pinunan ni Russell an mga preparasyon para sa “Photo-Drama.” Narealisar niya na an paaging ini nin komunikasyon puwedeng magpaabot nin katotoohan sa Bibliya sa paagi na dai magigibo kan inimprentang babasahon.

An walong oras na presentasyon na “Photo-Drama,” na sa parati ipinapahiling sa apat na kabtang, nagtatampok nin 96 na haralipot na nakarekord na pahayag sa Bibliya. Isinaysay iyan nin sarong midbid na marhay na ispiker na pamilyar nanggad an boses kan panahon na idto. An dakul na eksena sinasabayan nin klasikal na musika. Pinapatanog kan mahusay na mga operator an mga nakarekord na boses asin musika sa ponograpo kaya an tanog minasabay sa makulor na mga slide asin isinapelikulang pag-akto kan bantog na mga istorya sa Bibliya.

An kadaklan sa mga kua sa pelikula asin an dakul sa salming na mga slide hali sa komersiyal na mga istudyo. Propesyonal na mga pintor sa Philadelphia, New York, Paris, asin London an mano-manong nagpinta sa salming na mga slide asin film sa kada frame. Dakul man an ipininta kan mga grupong nagtatrabaho sa Art Room nin Bethel, na sa parati naggigibo nin pansalida  sa naraot na mga slide. Dugang pa sa binakal na mga film, kinuanan man nin pelikula an mga miyembro nin pamilyang Bethel sa kaharaning Yonkers, New York, mantang inaakto an papel ni Abraham, Isaac, asin kan anghel na nag-ulang ki Abraham sa pag-atang kan saiyang aki.—Gen. 22:9-12.

An sarong kaiba ni Brother Russell nagsabi sa mga reporter na sa paaging ini nin komunikasyon magkakaigwa nin “interes an dakul na tawo sa Kasuratan, nin urog kisa sa arin man na ginibo kan nakaagi para sa pagpalakop nin relihiyon.” Uumawon daw kan mga klero an siring na bagong paghihinguwa tanganing maabot an mga tawong gutom sa espirituwal? Sa kabaliktaran, kinondenar kan mga ministro nin Kakristiyanuhan sa pangkagabsan an “Photo-Drama,” na an nagkapira naggamit pa ngani nin tuso asin daing supog na mga taktika tanganing ulangon an publiko na maghiling kaini. Sa sarong lugar kun sain iyan ipapasali, ipinaputol nin sarong unyon nin mga ministro an kuryente.

Minsan siring, napano nin tawo an mga teatro tanganing maghiling nin libre kan “Photo-Drama.” Sa Estados Unidos, sagkod sa 80 siyudad kada aldaw an nagpapasali kan “Photo-Drama.” Dakul na paradalan an napangalas huling iyan an inot na ‘nagtataram na pelikula’ na nahiling ninda. Paagi sa time-lapse na potograpiya, nahiling ninda an sarong siyo na nagluluwas sa sugok, o bunay, asin an sarong burak na luway-luway na minabukad. Itinampok kan siyentipikong mga impormasyon kan panahon na idto an makangangalas na kadunungan ni Jehova. Arog kan nasambitan sa kapinunan, kan mahiling sa tilon nin sarong nagdadalan na iiniintrodusir ni Brother Russell an “Photo-Drama,” nasabi niya na an ispiker “mas kalalawgon pa ngani iyan ni Brother Russell kisa ki Brother Russell mismo!”

Ilinadawan nin sarong awtor asin istoryador sa pelikula na si Tim Dirks an “Photo-Drama” bilang “an kainot-inuting dakulang screenplay na pinag-iriba an tanog (nakarekord na boses), pelikula, asin de-kulor na mga magic lantern slide.” An mga pelikula na nainot sa “Photo-Drama” naggamit man nin nagkapira sa mga teknikang ini pero bakong gabos iyan nasa sarong presentasyon, lalo na sa sarong pelikula na an tema hali sa Bibliya. Asin ini sana an nagkaigwa nin kadakul na nagdalan—na may total na mga siyam na milyon sa North America, Europa, Australia, asin New Zealand sa inot pa sanang taon!

An “Photo-Drama” ilinuwas kan Enero 11, 1914, sa Siyudad nin New York. Pakalihis nin pitong bulan, uminabot an grabeng kapahamakan na kan huri inapod na Giyera Mundiyal I. Pero dakul na tawo sa bilog na kinaban an padagos na nagtiripon tanganing hilingon an “Photo-Drama,” na nagkukua nin karangahan sa buhay na marhay na mga eksenang nagpapahiling kan maabot na mga bendisyon kan Kahadian. An “Photo-Drama” sarong pambihirang presentasyon kan taon 1914 na tunay na daing kaagid.