1. Gurano kahalaga ki Jesus an paghuhulit kan Kahadian? Ipaliwanag.

GUSTONG-GUSTO ni Jesus na ipakipag-ulay an dapit sa Kahadian nin Diyos. Uyon sa rekord kan Bibliya, mas ipinakipag-ulay niya an dapit sa Kahadian kisa sa iba pang tema—sinambit niya iyan nin labing 100 na beses sa bilog niyang ministeryo. Talagang mahalagang marhay ki Jesus an Kahadian.—Basahon an Mateo 12:34.

2. Pira katawo an tibaad presente kan itao an pagbuot na nakarekord sa Mateo 28:19, 20, asin taano ta masasabi niyato iyan?

² Dai nahaloy pagkatapos na buhayon si Jesus, nagpahiling siya sa labing 500 na potensiyal na parabalangibog kan Kahadian. (1 Cor. 15:6) Posibleng sa pagkakataon na iyan itinao ni Jesus an pagbuot na ihulit an mensahe kan Kahadian sa “mga tawo kan gabos na nasyon”—na masakiton nanggad na gibuhon kan panahon na idto! * Ihinula ni Jesus na magpapadagos an dakulang gibuhon na ini sagkod sa “pagtatapos kan sistema nin mga bagay,” asin iyan man nanggad an nangyari.  Posibleng marhay na nakikikabtang ka sa pag-utob kan pagbuot asin hulang iyan.—Mat. 28:19, 20, NW.

3. Anong tulong bagay an nakatabang sa sato para mautob an pagbuot na ihulit an maugmang bareta?

³ Pagkatapos na itao an pagbuot na maghulit, nanuga si Jesus sa saiyang mga parasunod: “Kaibanan nindo ako.” (Mat. 28:20, NW) Kaya gigiyahan niya an mahiwason na gibuhon na ini nin paghuhulit. Siring man, an satong Diyos, sinasangkapan kita kan “gabos na marahay na bagay” para tabangan kitang mautob an pagbuot na iyan. (Heb. 13:20, 21) Sa artikulong ini, pag-uulayan niyato an tulo sa marahay na mga bagay na ini: (1) an mga kasangkapan na itinao sa sato, (2) an mga pamamaagi na ginamit niyato, asin (3) an pagsasanay na satong inako. Inot, pag-ulayan ta an nagkapira sa kasangkapan na ginamit niyato sa nakalihis na 100 na taon.

4. Taano ta naggamit kita nin lain-lain na kasangkapan sa satong paghuhulit?

⁴ Iinagid ni Jesus an ‘tataramon kan Kahadian’ sa banhi na isinasabwag sa manlain-lain na klase nin daga. (Mat. 13:18, 19) Naggagamit an sarong hardinero nin lain-lain na kasangkapan para andamon an saiyang hardin bago tanuman nin banhi. Kaagid kaiyan, sa nakaaging mga taon, tinawan man kita kan satong Hadi nin mga kasangkapan para tabangan na andamon an puso nin minilyon na mag-ako kan mensahe kan Kahadian. An nagkapira sa kasangkapan na ini nagamit nin tibaad sarong dekada o labi pa, mantang an iba padagos na napapakinabangan sagkod ngunyan. Pero, natabangan kita kan gabos na kasangkapan na ini na mapauswag an satong mga abilidad bilang mga ebanghelisador.

5. Ano an testimony card, asin paano iyan ginagamit kaidto?

⁵ An sarong kasangkapan na nakatabang sa dakul para makapuon na maghulit iyo an testimony card, na ginamit kan mga parahayag kan Kahadian puon 1933. Sadit sana an card na iyan, mga tres por singko pulgada, asin may nakasurat na halipot na mensahe kan Bibliya. Sa pana-panahon, nagpupublikar nin bagong card na may bagong mensahe. Simple sana an paggamit kaiyan! Mga 10 anyos kaidto si C. W. Erlenmeyer kan inot siyang makikabtang sa arog kaining paagi nin pagpapatotoo. Sinabi niya: “Arog kaini an pirming introduksiyon, ‘Puwede pong pakibasa an card na ini?’ Pagkatapos na basahon kan kagharong an card, iaalok mi an literatura, tapos mahali na kami.”

6. Paano nakatabang an testimony card?

⁶ Nakatabang an testimony card sa manlain-lain na paagi. Gustong-gusto kan ibang parahayag na makikabtang sa paghuhulit, pero masusupgon sinda asin dai aram an sasabihon. An iba man kadakul kan sinasabi. Inuubos nindang sabihon sa kagharong sa laog nin pira sanang minuto an gabos nindang aram, pero bako sinda pirming mataktika sa saindang sinasabi! Nakatabang sa mga parahayag an testimony card na “iyo an magtaram” para sa sainda paagi sa halipot, diretso sa punto, asin piniling marhay na mga tataramon.

7. Ano an nagin mga problema kan mga tugang sa paggamit ninda kan card?

⁷ Siyempre may mga problema man sa paggamit kan card. Nagirumduman ni Grace A. Estep, sarong haloy nang Saksi: “Minsan, sinasabi samo kan kagharong, ‘Ano an sinasabi kaiyan? Sabihon mo na sana sako.’” Apuwera diyan, an ibang kagharong dai kayang basahon an nakasurat sa card. Iniisip man kan iba na para sa sainda na an card, kukuanon iyan sa parahayag asin seserahan na an pinto. Ginigisi man kan ibang kontrang marhay na kagharong an card. Dawa arog kaiyan, natabangan kan card an satong mga tugang na magdulok sa mga tawo asin hayagan na ipamidbid na sinda mga representante kan Kahadian.

8. Ipaliwanag kun paano ginamit an nabibitbit na ponograpo. (Hilingon an ritrato sa kapinunan kan artikulo.)

 ⁸ An saro pang kasangkapan na ginamit kan dekada nin 1930 asin kan inot na mga taon kan dekada nin 1940 iyo an nabibitbit na ponograpo, na inapod kan ibang tugang na Aaron huling iyan an nagtataram para sa sainda. (Basahon an Exodo 4:14-16.) Pag nagtugot an kagharong, papatanugon kan parahayag an apat may kabangang minutong pahayag sa Bibliya, pagkatapos iaalok niya an mga literatura. Kun minsan, enterong pamilya an tiripon na nagdadangog sa mensahe kan Bibliya na nasa plaka! Kan 1934, pinunan kan Watch Tower Society na maggibo nin nabibitbit na mga ponograpo na espesyalmenteng dinisenyo para gamiton sa ministeryo. Kan huri, may makukua nang mga plaka sa 92 na lain-lain na tema nin pahayag.

9. Gurano kaepektibo an paggamit kan ponograpo sa ministeryo?

⁹ Kan madangog nin sarong kagharong, na si Hillary Goslin, an saro sa mga pahayag sa Bibliya, sinubli niya nin sarong semana sa parahayag an ponograpo para ipadangog sa pagtaraid niya an mensahe kan Kahadian. Kan magbalik an parahayag, may naghahalat sa saiya na bagong mga interesado. Pag-abot nin panahon, nagkapira sa mga ini an nagdusay kan saindang sadiri ki Jehova. Asin kan huri, duwang aking babayi ni Hillary an nag-adal sa Gilead asin nagin mga misyonera. Arog kan testimony card, nakatabang sa dakul na parahayag an ponograpo para makapuon sindang maghulit. Dai nahaloy, tinukduan sinda kan Hadi kun paano maghulit paagi sa Teokratikong Paadalan sa Pagmiministro.

10, 11. Paano ginamit an peryodiko asin radyo sa pagpalakop kan katotoohan sa Bibliya, asin taano ta nagin epektibo an mga pamamaaging ini?

¹⁰ Sa paggiya kan Hadi, naggamit an banwaan nin Diyos nin lain-lain na pamamaagi tanganing makapagpatotoo sa pinakadakul na tawo. Mahalaga ini lalo na kan panahon na “kadikit an paraani.” (Basahon an Mateo 9:37.) Sa kapinunan kan ika-20 siglo, ginamit an peryodiko tanganing mapatotoohan an mas dakul na tawo sa mga lugar na kadikit sana an mga lingkod ni Jehova. Kada semana, itinetelegrama ni Charles Taze Russell sa sarong ahensiya nin diyaryo an sarong sermon. Dangan, itinetelegrama giraray ini kan ahensiyang iyan sa mga peryodiko sa Estados Unidos, Canada, asin Europa. Kinakarkulo na kan 1913, an mga sermon ni Brother Russell na inimprenta sa 2,000 na peryodiko nakakaabot sa 15,000,000 na parabasa!

¹¹ Pagkagadan ni Brother Russell, saro pang epektibong pamamaagi sa pagpalakop kan maugmang bareta an ginamit. Kan Abril 16, 1922, itinao ni Joseph F. Rutherford an saro sa mga nainot niyang pagbrodkast sa radyo na kinakarkulong nadangog nin 50,000 katawo. Dangan, an pinakainot na istasyon nin radyo kan organisasyon, an WBBR, nagpuon na magbrodkast kan Pebrero 24, 1924. Mapadapit sa bagong pamamaaging ini, an The Watch Tower na Disyembre 1, 1924 nagsabi: “Naniniwala kami na an radyo an pinakamatipid asin pinakaepektibong paagi nin pagpalakop kan mensahe kan katotoohan na magagamit kasuarin man.” Arog kan peryodiko, nakatabang an radyo para mapatotoohan an dakul na tawo sa mga lugar na kadikit sana an nakaistar na parahayag kan Kahadian.

12. (a) Anong klase nin pagpapatotoo sa publiko an pinakagusto mo? (b) Ano an makakatabang sa sato na mapangganahan an ano man na takot sa pakikikabtang sa pagpapatotoo sa publiko?

¹² Mas idinuduon ngunyan an pagpapatotoo sa publiko: sa mga punduhan nin bus o awto, istasyon nin tren, paradahan, plasa, asin saudan. Kun ninenerbiyos kang makikabtang sa arog kaining klase nin paglilingkod, mamibi para sa tabang asin pag-isipan an sinabing ini nin sarong haloy nang nagbibiyaheng paraataman na si Angelo  Manera, Jr.: “Ibinibilang mi an kada bagong klase nin paglilingkod na saro naman na paagi para paglingkudan si Jehova, saro naman na paagi para patunayan an kaimbudan mi sa saiya, saro naman na pagbalo sa integridad mi, asin gustong-gusto ming patunayan na andam kaming maglingkod sa saiya sa ano man na paaging gusto niya.” An pakikikabtang sa sarong bagong paagi nin paglilingkod, tibaad idtong natatakot kitang gibuhon, nakakatabang para mapakusog an satong pagtitiwala asin pagtubod ki Jehova. Dangan, magigin kitang mas epektibong parahayag.—Basahon an 2 Corinto 12:9, 10.

13. Paano nakakatabang sa sato an satong website na jw.org, asin ano an naeksperyensiyahan mo sa paggamit kaiyan sa ministeryo?

¹³ Dakul na parahayag an nauugmang sabihon sa mga tawo an dapit sa satong website, an jw.org, na diyan makakabasa asin makaka-download sinda nin mga literatura na basado sa Bibliya sa labing 700 na lengguwahe. Kada aldaw, labing 1.6 milyones an nagbibisita sa satong website. Arog kan radyo kaidto, nakakatabang an satong website ngunyan para mapaabutan niyato kan maugmang bareta an mga tawo dawa nasa harayuon sindang mga lugar.

14. Anong pagsasanay an kaipuhan kan mga parahayag kan Kahadian, asin anong paadalan an nakatabang sa sainda na magin epektibong mga paratukdo?

¹⁴ Napag-ulayan na niyato an pira sana sa kasangkapan asin pamamaagi na ginamit para mapalakop an maugmang bareta. Pero, kumusta man an pagsasanay sa sato? Halimbawa, may mga kagharong na dai uyon sa nadadangog ninda sa ponograpo, kaya kaipuhan na manudan kan mga parahayag kun paano mataktikang sisimbagon an mga pagkontra. An iba man na kagharong interesado sa nababasa ninda sa testimony card, kaya kaipuhan na manudan kan mga parahayag kun paano epektibong tutukduan an mga interesado. Siguradong sa tabang kan banal na espiritu nin Diyos, nahiling ni Nathan H. Knorr na kaipuhan na sanayon an mga parahayag na gamiton sa ministeryo an saindang kakayahan sa pagtaram. An solusyon? An Teokratikong Paadalan sa Pagmiministro na inot na inorganisar sa mga kongregasyon kan 1943. Natabangan kita kan paadalan na ini na magin epektibong mga paratukdo.

15. (a) Ano an naeksperyensiyahan kan nagkapira kan magpahayag sinda sa Teokratikong Paadalan sa Pagmiministro? (b) Paano mo napatunayan na totoo an ipinanuga ni Jehova sa Salmo 32:8?

¹⁵ Dakul an sa primero nasakitan na magpahayag sa atubangan nin mga tawo. Nagirumduman ni Julio S. Ramu an saiyang inot na pahayag sa paadalan kaidtong 1944. An tema niya? Si Doeg,  sarong karakter sa Bibliya na nasambitan sa lima sanang teksto! “Talagang nagkukurubog-kubog an tuhod ko saka kamot, pati mga ngabil ko nagkikibig-kibig,” an sabi ni Julio. Sinabi niya na kaipuhan niyang bilugon an pahayag gamit an limang tekstong idto. Sinabi pa niya: “Nagpahayag ako nin tulong minuto. Primero ko idtong pagpahayag sa plataporma, pero dai ako suminuko.” Nakaenrol man sa paadalan an mga aki dawa bako pirming pasil para sa iba an magpahayag sa kongregasyon. Nagirumduman ni Angelo Manera, na nasambitan sa inutan, an nangyari kan inot na magpahayag an sarong aking lalaki: “Grabe talaga su nerbiyos niya. Kaya kan punan na niyang magtaram, napahibi siya. Pero determinado siya, kaya tinapos niya iyan dawa nagparahibi siya sa bilog niyang pahayag.” Nag-aalangan ka daw na magkomento o magpartisipar sa pagtiripon huling nasusupog ka o iniisip mong dai mo kaya? Hagadon ki Jehova na tabangan kang mapangganahan an saimong takot. Mahihiling mo na tatabangan ka niya kun paanong tinabangan niya an inot na mga estudyanteng idto sa Teokratikong Paadalan sa Pagmiministro.—Basahon an Salmo 32:8.

16. Ano an katuyuhan kan Gilead School (a) kaidto asin (b) puon kan 2011?

¹⁶ Bako sanang sa Teokratikong Paadalan sa Pagmiministro itinatao an pagsasanay sa mga lingkod ni Jehova. Nakinabang na marhay an mga misyonero asin an iba pang nakapag-adal sa Gilead School. Uyon sa sarong instruktor, an katuyuhan kan paadalan iyo na “itadom sa mga estudyante an mas makusog na pagmawot na makikabtang sa pag-ebanghelyo.” Puon kan punan an Gilead kan 1943, labing 8,500 na an sinanay diyan. An mga misyonerong sinanay sa Gilead nakapaglingkod na sa mga 170 kadagaan. Puon kan 2011, an ineenrol na sana diyan iyo idtong mga yaon na sa espesyal na bilog na panahon na paglilingkod—mga espesyal payunir, nagbibiyaheng paraataman, Bethelite, o misyonero na dai pa nakapag-adal sa Gilead.

17. Gurano kaepektibo an pagsasanay sa Gilead?

¹⁷ Gurano kaepektibo an dugang na pagsasanay na ini? Pag-isipan an sarong halimbawa. Kan Agosto 1949, dai pang 10 an parahayag sa Japan. Sa katapusan kan taon na iyan, 13 misyonerong sinanay sa Gilead an sibot na naghuhulit diyan. Sa ngunyan, igwa nang mga 216,000 na parahayag sa Japan, asin mga payunir an haros 42 porsiyento sa sainda!

18. Magsambit nin iba pang paadalan na nakatabang sa kuwalipikadong mga Saksi na umuswag sa espirituwal.

¹⁸ An iba pang paadalan, arog kan Pang-Kahadian na Paadalan sa Pagmiministro, Paadalan sa Paglilingkod Bilang Payunir, School for Kingdom Evangelizers, School for Circuit Overseers and Their Wives, asin School for Branch Committee Members and Their Wives, nakatabang na marhay sa pag-uswag kan espirituwalidad asin pagigin epektibo kan mga lingkod ni Jehova. Malinaw nanggad na padagos na sinasanay kan Hadi an saiyang mga sakop!

19. Ano an sinabi ni Charles Taze Russell mapadapit sa gibuhon na paghuhulit, asin paano ini nagkakatotoo?

¹⁹ Labing 100 na taon na an nakalihis puon kan mamahala an Kahadian nin Diyos. Sagkod ngunyan, padagos kitang sinasanay kan satong Hadi, si Jesu-Cristo. Kan madali nang magadan si Charles Taze Russell kan 1916, sinabi niya sa saro niyang dayupot na kaiba-iba an nahihiling niyang paghiwas kan gibuhon na paghuhulit. An sabi niya: “Marikas na nagdadakula an gibuhon, asin padagos pang madakula iyan, huling may sarong pambilog na kinaban na gibuhon an isasagibo sa paghuhulit kan ‘ebanghelyo kan kahadian.’” (Faith on the March, ni A. H. Macmillan, p. 69) Tama nanggad siya! Asin nagpapasalamat nanggad kita na padagos kitang tinatabangan kan Diyos nin katuninungan para magibo an pinakanakakaugmang gibuhon na ini! Iyo, sinasangkapan niya kita kan “gabos na marahay na bagay” na kaipuhan ta para magibo niyato an saiyang kabutan!