Rumani sa Dios

An Ama nin mga Aking Lalaki na Ilo sa Ama

Exodo 22:​22-24

“AMA nin mga aking lalaki na ilo sa ama . . . an Dios sa saiyang banal na erokan.” (Salmo 68:⁠5) An mga tataramon na iyan nagtatao nin nakakapukaw sa boot na leksion manongod ki Jehova Dios​—⁠mapagrisa sia sa mga pangangaipo nin mga tawong daing sukat. An pagmakolog nia sa mga aki na nagadanan nin magurang malinaw na maririsa sa Ley na itinao nia sa Israel. Siyasaton niato an enot na pagkasambit sa Biblia sa “aking lalaki na ilo sa ama,” * na yaon sa Exodo 22:​22-24.

An Dios nagpatanid: “Dai nindo pagpasakitan nin makuri an siisay man na . . . aking lalaki na ilo sa ama.” (Bersikulo 22) Bako ining pakiolay sana na tumabang sa mga tawo; iyan sarong pagboot nin Dios. An aki na nagadanan nin ama​—⁠asin huli kaini nawaran man nin maprotehir asin masustenir sa saiya​—⁠madaling mabiktima. Sa ano man na paagi, an siring na aki dai dapat “pagpasakitan nin makuri” nin siisay man. Sa ibang traduksion kan Biblia, an pananaram na “pagpasakitan nin makuri” trinadusir na “abusohon,” “maltratohon,” asin “aprobetsaran.” An paggibo nin sala sa aking ilo sa ama seryosong bagay sa pagheling nin Dios. Gurano nanggad iyan kaseryoso?

An Ley nagsabi pa: “Kun sia papasakitan mo nin makuri, dangan kun mag-agrangay sia sa sako, totoong dadangogon ko an saiyang pagtangis.” (Bersikulo 23) Sa salaysay na iyan, an plural na “nindo” sa bersikulo 22 nagin singular na “mo” sa bersikulo 23. An indibiduwal asin an nasyon sa kabilogan parehong may paninimbagan na kuyogon an ley na ini nin Dios. Nagbabantay si Jehova; dinadangog nia an mga aking lalaki na ilo sa ama, asin pirme siang andam na maghimate sa mga pakiolay nindang tabangan sinda.​—⁠Salmo 10:14; Talinhaga 23:​10, 11.

Kun siring, ano an mangyayari kun may maggibo nin sala sa aking lalaki na ilo sa ama, na nagin dahelan na an aking iyan mag-agrangay sa Dios? “Maglalaad nanggad an sakong kaanggotan,” an sabi ni Jehova, “asin gagadanon ko nanggad kamo sa espada.” (Bersikulo 24) An sarong reperensia sa Biblia nagsasabi na ini “literal na ‘asin an sakong dongo mag-iinit,’ na sarong idiom para sa grabeng kaanggotan.” Mangnoha na dai ni Jehova ipinabaya sa mga tawong hokom sa Israel an pagpaotob kan ley na ini. An Dios mismo an mahokom sa siisay man na nag-aaprobetsar sa daing kalabanlaban na aki.​—⁠Deuteronomio 10:​17, 18.

Si Jehova dai nagliliwat. (Malaquias 3:⁠6) Naheherak sia sa mga aki na mayo nin magurang o mga magurang. (Santiago 1:27) Tunay nanggad​—⁠an Ama kan mga aking lalaki na ilo sa ama napupukaw sa matanos na kaanggotan huli sa pambibiktima sa inosenteng mga aki. An siisay man na mag-aprobetsar sa daing kalabanlaban na aki dai makakaligtas sa “naglalaad na kaanggotan ni Jehova.” (Sofonias 2:⁠2) An siring na mga maraot makakaaram na “makangingirhat na bagay an mahulog sa mga kamot kan nabubuhay na Dios.”​—⁠Hebreo 10:⁠31.

[Nota sa Ibaba]