Ano an Banal na Espiritu?

HINAPOT kaidto ni Jesus an saiyang mga disipulo: “Siisay na ama dian sa saindo an, kun an saiyang aki humagad nin sira, tibaad matao sa saiya nin halas imbes na sira? O kun sia humagad man nin sogok, matao sa saiya nin amamatak?” (Lucas 11:11, 12) An mga aki sa Galilea gustong-gustong magkakan nin sogok asin sira; aram ninda kun ano an gusto ninda.

Sinabi ni Jesus na maninigo kitang padagos asin desididong maghagad nin banal na espiritu, siring sa sarong nagugutom na aki na naghahagad nin kakanon. (Lucas 11:9, 13) Kun aram niato kun ano talaga an banal na espiritu, masasabotan niato an mahalagang papel kaiyan sa satong buhay. Kaya, siyasaton nguna niato kun ano an itinotokdo sa sato kan Biblia manongod sa banal na espiritu.

“An Kapangyarihan kan Kaharohalangkawe”

Liniliwanag kan Kasuratan na an banal na espiritu sarong puersa na ginagamit nin Dios sa pag-otob kan saiyang kabotan. Kan ipaisi ki Maria kan anghel na si Gabriel na magkakaaki sia dawa ngani sia birhen, an anghel na iyan nagsabi sa saiya: “An banal na espiritu madatong sa saimo, asin an kapangyarihan kan Kaharohalangkawe malindong sa saimo. Sa dahelan man na iyan an ipapangaki aapodon na banal, Aki nin Dios.” (Lucas 1:35) Segun sa sinabi ni Gabriel, magkakonektar an banal na espiritu asin an “kapangyarihan kan Kaharohalangkawe.”

Yaon man sa iba pang kabtang kan Biblia an arog kaiyan na ideya. Si propeta Miqueas nagsabi: “Ako mismo napano nin puersa, paagi sa espiritu ni Jehova.” (Miqueas 3:8) Si Jesus nanuga sa saiyang mga disipulo: “Kamo mag-aako nin kapangyarihan kun dumatong na sa saindo an banal na espiritu.” (Gibo 1:8) Asin nagtaram si apostol Pablo dapit sa “kapangyarihan kan banal na espiritu.”—Roma 15:13, 19.

Kaya, ano an puede niatong ikongklusyon base sa mga nasambitan sa enotan? Magkakonektar na marhay an banal na espiritu asin an kapangyarihan nin Dios. An banal na espiritu iyo an paagi na  ginagamit ni Jehova an saiyang kapangyarihan. Sa simpleng pagtaram, an banal na espiritu iyo an aktibong puersa nin Dios. Asin makangangalas nanggad na puersa iyan! Dai niato marororop an kapangyarihan na kinaipuhan tanganing lalangon an bilog na uniberso. Paagi ki propeta Isaias, isinuherir ni Jehova na horophoropon niato an minasunod: “Tingagan an saindong mga mata asin helinga nindo. Siisay an naglalang kan mga bagay na ini? Iyan iyo an Saro na nagpapaluwas kan saindang hukbo nin oyon sa bilang, na gabos inaapod pa ngani nia sa ngaran. Huli sa abundang dinamikong enerhiya, mantang sia man makosog an kapangyarihan, ni saro kaiyan mayong nawawara.”—Isaias 40:26.

Sa siring, ipinaparisa kan Biblia na an uniberso, na biyong areglado asin nagkakaoroyon, nag-eeksister huli sa “dinamikong enerhiya,” o kapangyarihan, kan Makakamhan sa Gabos na Dios. Malinaw nanggad na makosogon an aktibong  puersa nin Dios, asin nakadepende dian an mismong pag-eksister niato.—Helingon an kahon na “An Pagpunsionar kan Banal na Espiritu.”

Puedeng gamiton ni Jehova an saiyang banal na espiritu sa paggibo nin dakulang mga bagay, arog sa paglalang kan uniberso. Alagad puede man niang gamiton iyan sa kapakanan kan saiyang linalang na mga tawo. Dakol an pagkasambit sa Biblia dapit sa kun paano pinakosog kan aktibong puersa nin Dios an mga lingkod nia sa daga.

“An Espiritu ni Jehova Yaon sa Sako”

An ministeryo ni Jesus nagtatao sa sato nin interesanteng ideya dapit sa kun paano puedeng pakosogon kan banal na espiritu nin Dios an saiyang mga lingkod. “An espiritu ni Jehova yaon sa sako,” an sabi ni Jesus sa mga taga Nazaret. (Lucas 4:18) Ano an naotob ni Jesus paagi sa “kapangyarihan kan espiritu”? (Lucas 4:14) Pinaomayan nia an gabos na klase nin helang, pinakalma an dagat na may makokosog na alon, pinakakan an rinibong tawo paagi sa pira sanang tinapay asin sira, saka nagbuhay pa ngani nin mga gadan. Ilinadawan ni apostol Pedro si Jesus bilang “lalaking hayag na ipinaheling nin Dios . . . paagi sa makapangyarihan na mga gibo asin ngangalasan patin tanda na ginibo nin Dios paagi sa saiya.”—Gibo 2:22.

Sa ngonyan, an banal na espiritu dai naggigibo nin siring na mga milagro. Minsan siring, makakagibo iyan nin pambihirang mga bagay para sa sato. Si Jehova andam na nagtatao kan saiyang banal na espiritu sa mga parasamba nia, arog kan sinierto ni Jesus sa saiyang mga disipulo. (Lucas 11:13) Sa siring, makakapagsabi si apostol Pablo: “Igwa ako kan kosog para sa gabos na bagay huli sa saiya na nagtatao nin puersa sa sako.” (Filipos 4:13) An banal na espiritu daw puedeng magkaigwa nin siring na epekto sa saindong buhay? An hapot na iyan sisimbagon kan sunod na artikulo.

[Kahon/Ritrato sa pahina 5]

Kun Taano ta Bakong Persona an Banal na Espiritu

An banal na espiritu ikinokomparar kan Biblia sa tubig. Kan manuga an Dios sa saiyang mga lingkod nin mga bendisyon sa ngapit, sia nagsabi: “Bububoan ko nin tubig an napapaha, asin nin nagdadalihig na mga sapa an marang lugar. Ibububo ko sa saimong banhi an sakong espiritu, asin an sakong bendisyon sa mga magikan sa saimo.”—Isaias 44:3.

Kan ibubo nin Dios an saiyang espiritu sa mga lingkod nia, sinda ‘napano nin banal na espiritu.’ Si Jesus, Juan Bautista, Pedro, Pablo, Bernabe, asin an mga disipulo na nagtiripon kan Pentecostes 33 C.E. ilinadawan gabos na pano nin banal na espiritu.—Lucas 1:15; 4:1; Gibo 4:8; 9:17; 11:22, 24; 13:9.

Isip-isipa ini: Puede daw na ‘ibubo’ an sarong persona sa dakol na laen-laen na indibiduwal? Masasabi daw nindo na ‘mapapano’ nin sarong persona an sarong bilog na grupo nin mga tawo? Bako iyan rasonable. Totoo na sinasabi sa Biblia an dapit sa mga tawo na napapano nin kadonongan, pakasabot, o tamang kaaraman pa ngani, alagad nungkang ilinaladawan kaiyan an siisay man bilang pano nin saro pang persona.—Exodo 28:3; 1 Hade 7:14; Lucas 2:40; Colosas 1:9.

An Griegong tataramon na trinadusir na “espiritu” iyo an pneuʹma, na nagtatao man nin ideya dapit sa dai naheheling na puersa. Segun sa Expository Dictionary of New Testament Words ni Vine, an tataramon na pneuʹma “sa pangenot nanonongod sa doros . . . sa hinangos man; dangan, nangorogna sa espiritu, na arog kan doros, dai naheheling, mayo nin pisikal na hawak asin mapuersa.”

Kun siring, maliwanag na bakong persona an banal na espiritu. *

[Nota sa Ibaba]

[Credit Line]

Photodisc/SuperStock