Kalabot digdi an hararom na kapadangatan sa iba. Nahihiling sa tataramon asin gawi nin mamumuton na tawo kun ano an namamatian niya sa mga namumutan niya, dawa ngani mangaipo nin pagsasakripisyo.

Si Moises nagpahiling nin pagkamuot sa Diyos. Paano? Girumdumon an sabi sa 1 Juan 5:3: ‘Ini iyo an pagkamuot nin Diyos, na kita mag-utob kan saiyang mga tugon.’ Namuhay si Moises suno sa prinsipyong iyan. Nagkuyog siya sa gabos na ipinagibo sa saiya nin Diyos—puon sa masakiton na asignasyon na pag-atubang sa makapangyarihan na si Faraon sagkod sa garo baga simpleng pag-unat kan sugkod niya sa Dagat na Pula. Masakit man o madali an pagbuot ki Moises, nagsunod siya. “Siring nanggad kaiyan an ginibo niya.”—Exodo 40:16, NW.

Si Moises nagpahiling nin pagkamuot sa mga kapwa niya Israelita. Aram ninda na ginagamit ni Jehova si Moises tanganing giyahan an banwaan niya, kaya idinudulok ninda ki Moises an mga problema ninda. Mababasa ta: ‘Napalibutan siya ninda magpuon aga sagkod banggi.’ (Exodo 18:13-16, BPV *) Imahinara kun gurano kapagal si Moises sa bilog na aldaw na pagdangog sa mga Israelitang nagpapahayag kan ikinakagabat kan buot ninda! Pero, maugma si Moises sa pagtabang sa mga tawong namumutan niya.

Apuwera sa pagdangog sa sainda, ipinamibi man ni Moises an mga namumutan niya, pati ngani an mga nagkasala sa saiya! Halimbawa, kan an tugang ni Moises na si Miriam naggumod-gumod kontra ki Moises, pinangyari ni Jehova na magkaleproso si Miriam. Imbes na mag-ugma sa padusang iyan, nakiulay tulos si Moises para ki Miriam, na namimibi: ‘Nakikimahirak ako saimo, O Diyos, na paumayan mo siya.’ (Bilang 12:13) Siyertong pagkamuot an nakapahiro ki Moises na mamibi nin daing kaimutan!

Maaarog niyato si Moises paagi sa pagpatalubo nin hararom na pagkamuot sa Diyos. An siring na pagkamuot nagpapahiro sa sato na sunodon an mga pagbuot niya nin gikan sa puso. (Roma 6:17) Sa paggibo kaiyan, napapaugma ta an puso ni Jehova. (Talinhaga 27:11) Nakikinabang man kita. Pag naglilingkod kita sa Diyos huli sa tunay na pagkamuot, bako sanang ginigibo ta kun ano an tama kundi nauugma man kitang gibuhon iyan!—Salmo 100:2.

An saro pang paagi na maaarog si Moises iyo an pagpatalubo nin mapagsakripisyong pagkamuot. Kun sinasabi sa sato kan mga amigo o kapamilya ta an ikinakahadit ninda, pagkamuot an nagpapahiro sa sato na (1) magtao nin udok sa pusong atensiyon, (2) makidamay sa sainda, asin (3) ipaaram sa sainda na nagmamakulog kita.

Arog ni Moises, puwede niyatong ipamibi an mga namumutan ta. Kun beses, pag sinasabi ninda sa sato an mga problema ninda, tibaad pagmati ta garo mayo kitang ikakatabang. Tibaad sabihon ta pa ngani: “Pasensiya na ta an magigibo ko sana ipamibi ka.” Pero tandaan: “Dakula an nagigin bunga kan pamibi nin sarong matanos na tawo.” (Santiago 5:16, BPV) Kaya an satong pamibi puwede talagang makapahiro ki Jehova na gibuhon an dai Niya kutana gigibuhon para sa sarong tawo! Tunay nanggad, an pinakamarahay na magigibo ta para sa mga namumutan niyato iyo na ipamibi sinda! *

Siyertong mauyon kamo na dakul kitang manunudan ki Moises. Minsan ngani ordinaryo sana siyang tawo, nagtao siya nin ekstraordinaryong halimbawa nin pagtubod, kapakumbabaan, asin pagkamuot. Miyentras na mas maingat niyatong inaarog an halimbawa niya, mas urog na nakikinabang kita asin an iba.—Roma 15:4.