TALAGA daw na nagin makahulugan an buhay ni Jesus? Minalataw na pinadakula siya sa simpleng mga kamugtakan, asin nabuhay siyang mayong gayong materyal na mga bagay. Sa katunayan, si Jesus “dai nin mahihigdaan.” (Lucas 9:57, 58) Saro pa, siya ikinaungis, pigpakaraot, asin sa huri ginadan kan mga kaiwal niya.

Tibaad sabihon mo, ‘Bakong arog kaiyan an iniisip kong makahulugan na buhay!’ Pero bako lang iyan an dapat tang konsideraron dapit sa buhay ni Jesus. Siyasaton ta an apat na aspekto kan buhay niya.

‘An sakong kakanon iyo an paggibo kan buot kan nagsugo sako.’—Juan 4:34.

Paagi sa tataramon asin paggawi, hininguwa ni Jesus na utubon an kabutan kan saiyang Ama sa langit, si Jehova. * Ikinaugmang marhay ni Jesus an paggibo kan kabutan nin Diyos. Ikinumparar pa ngani niya sa kakanon an paggibo kaiyan, arog kan sinasabi sa kinotar pa sanang bersikulo. Isip-isipa an mga kamugtakan kan sinabi niya an pagkumparar na iyan.

Sinabi ni Jesus an mga tataramon na iyan kan mga udto na. (Juan 4:6) Bilog na aga siyang nagbaklay sa mabulod na rehiyon nin Samaria, kaya siyertong gutom na siya. Sa katunayan, dinagka siya kan mga disipulo niya: “Rabbi, pagkakan na.” (Juan 4:31) Sa simbag ni Jesus, ipinarisa niya na garo baga nabasog siya asin talagang napakusog sa paggibo kan kabutan nin Diyos. Bako daw na ipinapahiling kaiyan na makahulugan an buhay kan arog kaiyan na tawo?

‘Ako namumuot sa Ama.’—Juan 14:31.

Dayupot na marhay si Jesus sa saiyang Ama sa langit. Huli sa hararom na pagkamuot ni Jesus sa Diyos, ipinamidbid niya an saiyang Ama—an Saiyang pangaran, mga katuyuhan, asin karakteristiko. Perpektong naarog ni Jesus an tataramon, paggawi, asin kaisipan kan saiyang Ama—kaya garo man sana nahihiling ta ki Jesus an buhay na ladawan kan saiyang Ama. Kaya, kan nakiulay si Felipe ki Jesus: ‘Pahilingan samo an Ama,’ si Jesus nagsimbag: ‘An nakahiling sako, nakahiling sa Ama.’—Juan 14:8, 9.

Namumutan na marhay ni Jesus an saiyang Ama kaya andam siyang magkuyog sa Saiya sagkod sa kagadanan. (Filipos 2:7, 8; 1 Juan 5:3) Huli sa siring kakusog na pagkamuot sa Diyos, nagin makahulugan an buhay ni Jesus.

‘Dai nin pagkamuot na urog pa kaini, na itao nin tawo an saiyang buhay dahil sa saiyang mga katuod.’—Juan 15:13.

An totoo, makamumundo an puturo ta bilang bakong perpektong mga tawo. Sinasabi kan Bibliya: ‘Huli sa sarong tawo [si Adan] an kasalan luminaog sa kinaban, asin an kagadanan huli sa kasalan; asin sa siring an kagadanan nakalakop sa gabos na tawo, huli ta an gabos nagkasala.’ (Roma 5:12) Kun sa sadiri ta sanang paghihinguwa, dai ta madudulagan an epekto kan kasalan—an kagadanan.—Roma 6:23.

Marahay sana, si Jehova mamumuton na nagtao nin solusyon sa kamugtakan kan katawuhan. Itinugot niyang magsakit asin magadan an saiyang perpekto asin daing kasalan na Aki, si Jesus, tanganing itao an pantubos na kaipuhan para iligtas an katawuhan sa pagkauripon sa kasalan asin kagadanan. Si Jesus, na napahiro nin pagkamuot sa saiyang Ama asin sa mga tawo, gikan sa buot na nagkuyog asin itinao an saiyang perpektong buhay bilang tawo para sa sato. (Roma 5:6-8) An siring na bakong maimot na pagkamuot nagtao nin kahulugan sa buhay niya. *

“Ini an sakong Aki, an namumutan, na sakong inuyunan.”—Mateo 3:17, NW.

Sinabi ni Jehova an mga tataramon na iyan hali sa langit kan bawtismuhan si Jesus. Hayag na ipinahiling ni Jehova an kapadangatan asin pag-uyon niya sa saiyang Aking si Jesus. Kaya ngani si Jesus nakapagsabi: ‘An Ama namumuot sako’! (Juan 10:17) Huling aram niyang namumutan asin inuuyunan siya kan saiyang Ama, may kumpiyansang inatubang ni Jesus an pagtumang asin kritisismo. Napagdanay pa ngani niya an pagigin balanse asin rigon nin buot sa atubangan nin kagadanan. (Juan 10:18) An pakaaram na namumutan asin inuuyunan siya kan saiyang Ama siyertong nagtao nin urog pang kahulugan sa saiyang buhay.

Si Jesus may makahulugan nanggad na buhay. Malinaw na dakul kitang manunudan sa saiya. Tutukaron sa sunod na artikulo an nagkapira sa mga sadol ni Jesus sa mga parasunod niya kun paano magkakaigwa nin tunay na kahulugan an buhay.