Megan: Hi, Shirley. Ugmahon akong mahiling ka sa Memoryal kan kagadanan ni Jesu-Cristo kan nakaaging semana. * Ano an masasabi mo sa pagtiripon na idto?

Shirley: Maray ta nag-atender ako, pero dai ko gayo nasabutan an gabos na nadangog ko. An aram ko isineselebrar nin mga tawo an pagkamundag ni Jesus kun Pasko asin an pagkabuhay niya kun Pasko nin Pagkabuhay, pero ngunyan ko lang naaraman na may mga tawo na an ginigirumdom iyo an kagadanan niya.

Megan: Totoo na an Pasko asin an Pasko nin Pagkabuhay popular na mga selebrasyon sa bilog na kinaban. Pero para sa Mga Saksi ni Jehova, mahalagang girumdumon an kagadanan ni Jesus. Kun okey lang saimo, gusto kong ipaliwanag kun taano.

Shirley: Sige, okey lang.

Megan: Inot sa gabos, ginigirumdom kan Mga Saksi ni Jehova an kagadanan ni Jesus huling ipinagbuot niya na gibuhon ini kan saiyang mga parasunod. Pag-ulayan ta an nangyari kan bangging idto bago nagadan si Jesus. Nagigirumduman mo idtong espesyal na pamanggihan kaiba an saiyang maimbod na mga parasunod?

Shirley: An buot mong sabihon idtong Last Supper?

Megan: Iyo. Inaapod man iyan na Pamanggihan kan Kagurangnan. Sa pamanggihan na iyan, tinawan ni Jesus an saiyang mga parasunod nin malinaw na mga instruksiyon. Puwedeng pakibasa tabi ining nasa Lucas 22:19?

Shirley: Sige. ‘Asin siya nagkua nin tinapay, asin pakapagpasalamat, binaraak niya iyan, asin itinao sainda, na an sabi, Ini iyo an hawak ko na itinatao manungod saindo; gibuha nindo ini sa paggirumdom sa sako.’

Megan: Salamat. Hilingon mo an sinabi ni Jesus sa huring sentence kan bersikulong ini: ‘Gibuha nindo ini sa paggirumdom sa sako.’ Asin bago pagbutan ni Jesus an saiyang mga parasunod na girumdumon siya, lininaw niya kun ano an gigirumdumon ninda manungod saiya. Sinabi niya na an saiyang buhay itatao para sa saiyang mga parasunod. Sinabi man ni Jesus an mga tataramon na ini, arog kan nasa Mateo 20:28. Sinasabi digdi na an ‘Aki nin tawo dai napadigdi tanganing paglingkudan, kundi tanganing maglingkod asin magtao kan saiyang buhay sa pagtubos sa kabalakidan’ o sa dakul na tawo. Sa madaling sabi, iyan an dahilan kun taano ta an Mga Saksi ni Jehova nagtitiripon kada taon sa anibersaryo kan kagadanan ni Jesus—tanganing girumdumon an atang na pantubos na itinao ni Jesus. An saiyang kagadanan nangangahulugan nin buhay para sa gabos na makinuyog na tawo.

Shirley: Nadadangog kong sinasabi kan mga tawo na nagadan si Jesus tanganing magkamit kita nin buhay.  Pero sa totoo lang, dai ko talaga naiintindihan kun paano iyan mangyayari.

Megan: Bako lang ika an arog kaiyan Shirley. Medyo hararom an tema manungod sa atang na pantubos ni Jesus. Pero saro man iyan sa pinakamagayon na katotoohan sa Tataramon nin Diyos. Ay halat, may oras ka pa tanganing ipaliwanag ko iyan?

Shirley: Okey lang ta may pirang minuto pa man ako.

Megan: Ay marahay palan. Nabasa ko pa sana an manungod sa pantubos, asin hihinguwahon kong ipaliwanag iyan sa saimo sa simpleng paagi.

Shirley: Okey.

Megan: Tanganing masabutan ta an manungod sa pantubos, kaipuhan ta ngunang masabutan an nagin sitwasyon kan nagkasala si Adan asin Eva sa hardin nin Eden. Basahon ta an Roma 6:23 tanganing matabangan kitang masabutan an kalabot na isyu. Puwede tabing ika an magbasa?

Shirley: Sige. Sabi digdi: ‘An bayad nin kasalan iyo an kagadanan; alagad an ugay nin Diyos iyo an buhay na dai nin katapusan diyan ki Cristo Jesus na satong Kagurangnan.’

Megan: Salamat. Analisaron ta an mga sinabi digdi. Inot, narisa mo an sinasabi sa kapinunan kan bersikulo? Sabi digdi: “An bayad nin kasalan iyo an kagadanan.” Saro ining simpleng pagbuot na itinao nin Diyos sa kapinunan pa kan kasaysayan nin tawo—an kabayadan, o penalidad, nin kasalan iyo an kagadanan. Siyempre sa kapinunan, mayo pa man nin makasalan. Linalang si Adan asin Eva na perpekto, asin an gabos na aki ninda magigin perpekto man. Kaya mayong dahilan na magadan an siisay man. Si Adan asin Eva saka an gabos nindang aki may oportunidad na maugmang mabuhay nin daing sagkod. Pero arog kan aram ta, bakong arog kaiyan an nangyari, bako daw?

Shirley: Iyo man nanggad, ta kinakan ni Adan asin Eva an ipinagbabawal na bunga.

Megan: Tama. Asin kan gibuhon ninda iyan—kan pilion ni Adan asin Eva na suwayon an Diyos—nagkasala sinda. Garo man sana pinili ninda na magin bakong perpekto asin parakasala. An desisyon na iyan nagresulta sa kapahamakan bako sana ki Adan asin Eva kundi pati man sa gabos na magikan sa sainda.

Shirley: Anong buot mong sabihon?

Megan: Puwede sigurong magtao ako nin ilustrasyon. Haputon taka, mahilig kang mag-bake?

Shirley: Iyo! Gustuhon ko ‘yan.

Megan: Sabihon ta ngaya na igwa ka nin bagong hormahan nin tinapay. Dai mo pa ngani iyan nagagamit ni sarong beses, nahulog iyan sa salog asin nagkaigwa nin dakulang kimi. Ano kaya an magigin itsura kan tinapay sa hormahan na iyan? Bako daw na may kimi man iyan?

Shirley: Siyempre.

Megan: Kapareho iyan kan magdesisyon si Adan asin Eva na suwayon an Diyos; sinda nagkaigwa nin “kimi,” o depekto, huli sa kasalan asin pagkabakong perpekto. Asin huli ta sinda nagkasala bago pa man sinda nagkaaki, an gabos na magigin aki ninda mamumundag na may kaparehong depekto. Gabos sinda ipapangaki na makasalan. Sa Bibliya, an tataramon na “kasalan” nanunungod bako sana sa gibo kundi sa kamugtakan man na minana niyato. Bilang pangultimong resulta, dawa ngani mayo kitang ginibong ano man na sala—dai pa ngani kita ipinapangaki kan si Adan asin Eva magkasala—ipinahamak na ninda kita asin an gabos na magigin aki ninda saka magigin aki niyato sa pagkabakong perpekto asin sa kasalan na masagkod sa kagadanan. Arog kan binasa ta sa Roma 6:23, an kabayadan nin kasalan iyo an kagadanan.

Shirley: Garo baga bako man tama iyan. Taano ta kaipuhan na magdusa an gabos na tawo nin daing sagkod huli sa pagkakasala ni Adan asin Eva?

Megan: Iyo tama ka—garo baga bakong makatanusan iyan. Pero may mas hararom na dahilan. Sa perpektong hustisya nin Diyos, hinukuman niya si Adan asin Eva na magadan huli sa saindang kasalan, pero kitang mga aki ninda igwa nin paglaom. Naggibo nin paagi an Diyos tanganing makahali kita sa masakit na kamugtakan na ini. Diyan minalaog an atang na pantubos ni Jesus. Hilingon ta giraray an Roma 6:23. Pagkatapos sambiton na “an bayad nin kasalan iyo an kagadanan,” an bersikulo nagsabi na an regalo o ‘ugay nin Diyos iyo an buhay na dai nin katapusan diyan ki Cristo Jesus na satong Kagurangnan.’ Kaya an kagadanan ni Jesus an nagbukas kan dalan tanganing makaligtas kita sa kasalan asin kagadanan. *

Megan: May saro pang detalye sa bersikulong ini na gusto kong ipahiling saimo.

Shirley: Ano iyan?

Megan: Sinasabi sa bersikulo na an regalo o ‘ugay nin Diyos iyo an buhay na daing katapusan diyan ki Cristo Jesus na satong Kagurangnan.’ Kun si Jesus an nagdusa asin nagadan para sa sato, na itinao an saiyang buhay para sa sato, taano ta sinasabi sa bersikulo na an pantubos regalo na itinao nin Diyos? Taano ta bakong “an regalo na itinao ni Jesus”? *

Shirley: Hmm. Dai ko aram.

Megan: An naglalang kaya ki Adan asin Eva iyo an Diyos, asin sa saiya sinda nagkasala kan suwayon ninda an pagbuot sa hardin nin Eden. Siguradong nakulgan na marhay an Diyos kan magrebelde an pinakainot niyang mga aking tawo. Pero tulos na sinabi ni Jehova an solusyon. * Katuyuhan niya na saro sa saiyang mga espiritung linalang magdigdi sa daga, mabuhay bilang perpektong tawo, asin sa katapos-tapusi itao an saiyang buhay bilang atang na pantubos. Kaya an pagtao kan pantubos talagang sarong regalo hali sa Diyos. May saro pang dahilan na an pantubos regalo hali sa Diyos. Naisip mo na daw kun ano an namatian nin Diyos kan ginadan si Jesus?

Shirley: Garo dai pa.

Megan: Nahiling ko na may mga kawatan digdi sa natad. May mga aki ka?

Shirley: Igwa, duwa—sarong lalaki saka sarong babayi.

Megan: Bilang magurang, isip-isipa kun ano an namatian kan Ama ni Jesus sa langit, an Diyos na Jehova, kan magadan si Jesus. An buot kong sabihon, ano daw an namatian niya mantang nahihiling niya hali sa langit an saiyang namumutan na Aki na inaarestar, tinutuya-tuya, asin sinusuntok? Asin ano daw an namatian kan Ama kan an saiyang Aki ipinapako sa sarong hariging kahoy dangan pinabayaan na luway-luway na magadan sa makulugon na paagi?

Shirley: Siguradong makulugon idto saiya. Dai ko lamang daw naisip iyan!

Megan: Siyempre, imposible para sa sato na sabihon an eksaktong namatian nin Diyos kan aldaw na idto. Pero aram ta na may pagmati siya, asin aram ta man kun taano ta itinugot niyang mangyari an gabos na idto. Magayunon na ipinaliwanag iyan para sa sato sa sarong bantog na marhay na teksto, an Juan 3:16. Puwedeng pakibasa tabi?

Shirley: Sige. Sabi digdi: ‘An Diyos namuot na gayo sa kinaban, na itinao niya an saiyang Aking bugtong, tanganing an siisay man na minatubod sa saiya dai mapahamak, kundi magkaigwa nin buhay na dai nin katapusan.’

Megan: Salamat. Hilingon mo giraray an kapinunan kan bersikulong iyan. Sabi diyan: ‘An Diyos namuot na gayo sa kinaban.’ Iyan an panginot na dahilan—pagkamuot. Pagkamuot an nagpahiro sa Diyos na isugo an saiyang Aki sa daga tanganing magadan para sa sato. Kaya, an atang na pantubos iyo talaga an nakakalabi sa gabos na kapahayagan nin pagkamuot kasuarin man. Asin iyan an dahilan kun taano ta an Mga Saksi ni Jehova nagtitiripon taon-taon sa paggirumdom kan anibersaryo kan kagadanan ni Jesus. Lugod na nakatabang saimo an napag-ulayan ta.

Shirley: Iyo, nakatabang iyan sako. Salamat sa pagtao nin panahon na ipaliwanag ini sa sako.