Ano an puwede mong gibuhon para ganahan kang magbasa nin Bibliya asin lubos kang makinabang diyan? Ini an limang suhestiyon na napatunayan nin dakul na tawo na epektibo.

Pumili nin angay na lugar. Humanap nin lugar na tuninong. Likayan an mga pandisturbo tanganing makapokus ka sa binabasa mo. An maliwanag asin mapreskong lugar makakatabang man para makinabang ka sa binabasa mo.

Magkaigwa nin tamang kaisipan. Huling an Bibliya hali sa satong Ama sa langit, lubos kang makikinabang kun an kaisipan mo arog sa sarong aki na andam na makanuod sa sarong mapagpadangat na magurang. Para matukduan ka nin Diyos, halion mo nguna an ano man na negatibong mga ideya mo manungod sa Bibliya.—Salmo 25:4.

Mamibi nguna bago magbasa. Kaisipan nin Diyos an laog kan Bibliya, kaya tama sanang magpatabang kita sa saiya para masabutan iyan. Nanunuga an Diyos na matao siya nin “banal na espiritu sa mga naghahagad sa saiya.” (Lucas 11:13) Matatabangan ka kan banal na espiritu na masabutan an kaisipan nin Diyos. Maabot an panahon na bubuksan kaiyan an isip mo para masabutan “dawa an harararom na bagay nin Diyos.”—1 Corinto 2:10.

Intindihon an binabasa. Dai lang basta magbasa. Pag-isipan talaga an binabasa mo. Haputon an sadiri: ‘Ano an mga manunudan ko sa karakter na ini digdi sa binabasa ko? Paano ko ini isasabuhay?’

Magkaigwa nin espesipikong mga goal. Tanganing magin sulit an pagbasa mo nin Bibliya, hinguwahon na may manunudan kang magpaparahay kan buhay mo. Puwede mong gibuhon na mga goal an arog kaini: ‘Gusto kong urog pang mabisto an Diyos.’ ‘Gusto kong magin mas marahay na tawo, o mas marahay na agom.’ Tapos, pumili nin mga porsiyon sa Bibliya na makakatabang saimo para magibo an mga goal na iyan. *

Makakatabang an limang suhestiyon na ini para makapuon ka na. Pero, ano daw an puwede mong gibuhon para mas lalo pang magin kawili-wili an pagbasa mo? Yaon sa sunod na artikulo an nagkapirang suhestiyon.