Padakul nin padakul an mga tawo na minagawi na bakong disente. May mga pasyente na daing modo asin pigkukurahawan an mga doktor; may mga kostumer sa restawran na mayong respeto asin pig-aanggutan an mga serbidor; may mga pasaway na pasahero sa eroplano na nangungulog nin mga flight attendant; may mga aki na naiimbuwelto sa saradit na krimen asin nangtutuya, nananakot, saka nangungulog nin mga maestro; asin may nagkapirang pulitiko na naiimbuwelto sa mga iskandalo mantang an ibang pulitiko ipinaghahambog na mga disente sinda.

 An Bibliya sarong mapagtitiwalaan na giya sa kun ano an mga ugali o paggawi na talagang disente. Ipinapaliwanag man kaiyan kun taano ta nawawara na ngunyan an pagigin disente kan mga tawo.

 Maririsa na sa mga tawo sa bilog na kinaban an pagkawara kan pagigin disente, buot sabihon, paggawi na marahay, tama, asin akseptable.

•   Sigun sa dai pa sana nahahaloy na surbey kan Gallup, naniniwala an mga taga United States na mas hababa na ngunyan an mga pamantayan sa moral kan mga tawo sa nasyon ninda kisa sa nag-aging 22 na taon.

•   Sa sarong pang surbey, sa labing 32,000 na mga indibidwal hali sa 28 nasyon, 65 porsiyento kaiyan an nagsabi na mas naggrabe ngunyan an mga tawo na minagawi na bakong disente.

 Ihinula kan Bibliya an mga ugali kan mga tawo na nahihiling ta ngunyan.

•   “Magkakaigwa nin masakit na mga panahon sa huring mga aldaw. An mga tawo magigin makasadiri, makikwarta, mapaabaw-abaw, mapalangkaw; sinda magigin paramuda, masombikal sa mga magurang, dai tataong magromdom nin utang na boot, . . . maisog, saka maringis.”—2 Timoteo 3:1-3, An Marahay na Bareta Biblia.

 Para sa dagdag na impormasyon manungod sa kun paano an mga propesiyang ini nauutob, basahon an artikulong “Inihula Ba ng Bibliya na Magiging Ganito ang Ugali ng mga Tao sa Ngayon?”

 Sa kinaban na ini na nawawara na an pagigin disente kan mga tawo, napatunayan kan minilyon na an Bibliya sarong masasarigan na giya para manudan an marahay na mga ugali o paggawi. An sadol kaiyan manungod sa moral “pirming masasarigan . . . ngunyan asin sagkod pa man.” (Salmo 111:8) Pag-isipan an pirang halimbawa:

•   An sinasabi kan Bibliya: “An gabos na gusto nindong gibuhon sa saindo kan mga tawo, iyo man an dapat nindong gibuhon sa sainda.”—Mateo 7:12.

   Buot sabihon: Dapat tang trataron nin may kabuutan an iba asin magpahiling nin respeto sa sainda, huling iyan man an gusto ta na magin pagtratar ninda sa sato.

•   An sinasabi kan Bibliya: “Ngunyan na hinali na nindo an pandadaya, an lambang saro sa saindo magtaram nin katotoohan sa saiyang kapwa.”—Efeso 4:25.

   Buot sabihon: Dapat na magin onesto kita sa satong mga sinasabi asin mga ginigibo.

 Para sa dagdag na impormasyon manungod sa temang ini, basahon tabi:

•   An isyu kan An Torrengbantayan na may temang “Tama Asin Sala—Paano Mo Maaaraman?”

•   An artikulong “Pagpapahunod—Kun Paano Makakatabang an Bibliya.”