Arog kan mahihiling sa giyera sa Ukraine, dakul na relihiyosong lider kan Kakristiyanuhan an aktibong nagsusuportar sa giyera. Mangnuhon kun paano sinusuportaran kan nagkapirang klero an mag-inibong na lado kan giyera:

•   “Dakulang onra asin pasasalamat sa gabos niyatong parapakilaban na nagdedepensa sa Ukraine na saindang nasyon laban sa mga nagsasalakay . . . An samong puso, sinserong mga pangadyi, asin suporta pirming yaon sa saindo.”—Metropolitan Epiphanius I kan Kyiv, arog kan ibinareta sa The Jerusalem Post, Marso 16, 2022.

•   “An pamayo kan Russian Orthodox Church nagsagibo nin relihiyosong seremonya para sa mga suldados kan Russia kan Domingo kun sain dinagka niya sinda na idepensa an saindang nasyon ‘na mga taga Russia sana an makakagibo’ mantang ipinapadagos kan Moscow an pakikipaglaban kaiyan sa Ukraine.”—Reuters, Abril 3, 2022.

 Dapat daw na makilabot an mga Kristiyano sa giyera? Ano an sinasabi kan Bibliya?

 Ipinapahiling kan Bibliya na an mga tunay na nagsusunod ki Jesu-Cristo dai nakikikabtang sa giyera.

•   “Ibalik mo sa sarungan an saimong espada, huli ta an gabos na naggagamit nin espada magagadan sa espada.”—Mateo 26:52.

   Kun an sarong tawo uyon sa pagkaigwa nin giyera o nakikipaglaban sa giyera, nagsusunod daw talaga siya sa mga tataramon ni Jesus?

•   “Tinatawan ko kamo nin sarong bagong tugon, na kamutan nindo an lambang saro; kamutan nindo an lambang saro arog kan pagkamuot ko sa saindo. Paagi kaini, maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.”—Juan 13:34, 35.

   Kun an sarong tawo nagsusuportar sa giyera, ipinapahiling niya daw an klase nin pagkamuot na sinabi ni Jesus na magpapamidbid sa saiyang mga disipulo, o parasunod?

 Para sa dagdag na impormasyon, basahon an artikulo na “An Guerra daw Kaoyon kan Kristianismo?”

 Realistiko daw para sa mga Kristiyano na dai makikabtang sa mga giyera ngunyan? Iyo. Ihinula kan Bibliya na sa satong panahon, an inaapod na “huring mga aldaw,” igwa nin mga tawo hali sa gabos na nasyon na dai na “mag-aadal . . . nin pakikigiyera,” kauyon kan katukduan ni Jesus.—Isaias 2:2, 4, nota sa ibaba.

•   Para mas maaraman pa, basahon sa serye nin mga artikulo sa Ang Bantayan an “Ano ang Tingin ng Diyos sa mga Digmaan?”

 Sa dai na mahahaloy, gagamiton ni Jehova, a “an Diyos nin katuninungan,” an saiyang gobyerno sa langit para iligtas an mga tawo “sa pang-aapi asin sa kadahasan.”—Filipos 4:9; Salmo 72:14.

•   Para maaraman kun paano, hilingon an video na Ano an Kahadian nin Diyos?