Gustong-gusto ni Jehova na tukduan an saiyang mga lingkod. Kaya, nag-establisar an saiyang organisasyon nin mga paadalan na nagsasanay sa mga estudyante na maisagibo an saindang mga asignasyon. An saro sa mga paadalan na iyan iyo an School for Kingdom Evangelizers (SKE). Kaining nakalihis na mga taon, an organisasyon nin Diyos nagpokus bako sana sa pagpagayon kan kurikulum kundi pati man sa mga pasilidad na diyan ginigibo an teokratikong mga paadalan. An pinakakatuyuhan kaiyan iyo na magkaigwa nin mas magayon na lugar para magtukdo asin makanuod. Paano nakakatabang an saindong mga donasyon para magibo an katuyuhan na iyan?

 Sa laog nin dakul na taon, ginigibo an teokratikong mga paadalan sa mga Kingdom Hall asin mga Assembly Hall. Kun siring, taano ta kaining mga nakaagi nagtugdok kita o nag-renovate nin dagdag na mga pasilidad na ginagamit ngunyan para sana sa teokratikong mga paadalan? Pag-isipan an tulong dahilan.

 Mas nagdadakul na pangangaipo. “Sigun sa report kan mga sangang opisina, igwa nin dakulang pangangaipo sa langtad,” an paliwanag ni Christopher Mavor, sarong paratabang sa Service Committee kan Namamahalang Grupo. “Halimbawa kan 2019, kinarkulo kan sangang opisina sa Brazil na kaipuhan nin mga 7,600 na dagdag na mga naggradwar sa SKE para maasikaso an mga pangangaipo sa teritoryo kan saindang sangay.” Sinabi kan sangang opisina sa Estados Unidos na kaipuhan nindang marhay nin kuwalipikadong mga payunir na puwedeng magsanay sa iba sa special metropolitan public witnessing, pagpapatotoo sa piyer, asin pagpapatotoo sa presuhan. Kaipuhan man nin mga tugang na maglilingkod sa Local Design/Construction Department saka sa Hospital Liaison Committee. An mga naggradwar sa SKE puwedeng tumabang na mapaniguan an mga pangangaipong iyan.

 Nagdadakul na mga estudyante. Dakul na sangang opisina an nakakaresibi nin dakul na aplikasyon nin mga estudyante kisa sa kaya nindang ienrol. Halimbawa sa Brazil, nakaresibi an sangang opisina nin mga 2,500 na aplikasyon sa SKE sa saro sanang taon. Pero huling kulang an mga pasilidad, 950 mga estudyante sana an puwedeng ienrol kan sangang opisina.

 Komportableng mga dagusan. Kun an klase gigibuhon sa sarong Kingdom Hall o Assembly Hall, sa parati an mga estudyante nagdadagos sa harong kan mga tugang. Magayon an areglong iyan sa mga lugar na dikit sana an klase na isinasagibo kada taon. Pero kun dakul na klase an isasagibo, posibleng dai na kayanon kan mga tugang na mapadagos an mga estudyante sa laog nin dakul na bulan. Kaya inareglo na magkaigwa nin mga pasilidad na harani sa classroom asin puwedeng dagusan kan mga estudyante.

 An sarong pasilidad na may sarong classroom, dagusan kan mga instruktor saka kan mga 30 estudyante, pati mga lugar para sa support services, puwedeng magkantidad nin pirang milyon na dolyar (U.S.), depende sa lokasyon asin iba pang kamugtakan.

 An mga paadalan sa parati yaon sa lugar na tuninong asin mayo sa darakulang siyudad pero harani sa pampublikong mga transportasyon. Mas pinipili an mga lugar na may dakul na parahayag na puwedeng magtabang sa pagpunsiyonar kan paadalan saka pagmentenar kan mga edipisyo asin equipment na ginagamit diyan.

 An mga pasilidad igwa nin mga library, study area, mga computer, mga printer, asin iba pang equipment. Sa parati, igwa iyan nin dining room kun sain iribang nagkakarakan an mga estudyante saka mga instruktor. Igwa man nin lugar na diyan puwede sindang mag-ehersisyo saka magrelaks.

 Maingat na plinano an disenyo kan mismong classroom. “Kinonsulta mi an Theocratic Schools Department para tabangan kami sa pagdisenyo nin mga classroom na magin magayon na lugar para mas makanuod an mga estudyante,” an sabi ni Troy, na naglilingkod sa Worldwide Design/Construction Department sa Warwick, New York. “An mga brother diyan nagtao samo nin mga susundon may koneksiyon sa sukol saka layout kan mga classroom, pati man an kaipuhan na lighting saka audio-video equipment.” Kun manungod sa pag-install kan audio equipment, sinabi ni Zoltán, sarong instruktor sa SKE sa Hungary: “Kan primero, mayo kaming ginagamit na mikropono, kaya sa parati sinasabihan mi an mga estudyante na kusugan an saindang boses. Pero ngunyan igwa na nin mikropono sa kada lamesa, nasolusyunan na an problema!”

 Ano an epekto sa mga instruktor saka mga estudyante kan mas pinagayon na mga pasilidad? “Tuninong na marhay an lugar,” an sabi ni Angela, na nagklase sa SKE sa Palm Coast, Florida, U.S.A. “Gabos pinag-isipan na marhay, pati an disenyo kan classroom saka kan samong mga kuwarto, para makapokus kami sa pag-adal saka sa mga nanunudan mi.” Naapresyar ni Csaba, sarong instruktor sa Hungary, na makaibanan na magkakan an mga estudyante. Sinabi niya na sa mga panahon na iyan, “sa parati iniistorya samo kan mga estudyante an mga eksperyensiya ninda. Kaya, mas nabibisto mi an mga estudyante. Dahil diyan, mas epektibo ming naibabagay an kurikulum sa mga pangangaipo ninda.”

 Para sa mga estudyante saka mga instruktor, an mas pinagayon na mga pasilidad kan paadalan sarong bendisyon hali sa satong “Pinakanangungurog na Instruktor,” si Jehova. (Isaias 30:20, 21) Sarong sister sa Pilipinas na nagklase sa SKE sa sarong pasilidad na ginibong paadalan an nagsabi: “An gabos na naeksperyensiyahan mi sa paadalan nagpagirumdom samo na bako lang kami basta mga estudyante kundi espesyal kaming mga bisita ni Jehova. Gusto niyang mag-enjoy kami mantang pinag-aadalan ming marhay an saiyang Tataramon.”

 Nagigin posible an pagtugdok, pag-renovate, saka pagmentenar kan mga pasilidad na ginagamit sa mga paadalan huli sa saindong mga donasyon, na an dakul diyan ipinadara paagi sa donate.mr1310.com. Salamat na marhay sa saindong pagigin bukas-palad.