Mayong sinasabi an Bibliya dapit sa eksaktong petsa kun kasuarin ipinangaki si Jesu-Cristo, arog kan ipinapahiling sa mga reperensiya:

•   “Mayong nakakaaram kan totoong petsa kan pagkamundag ni Cristo.”—New Catholic Encyclopedia.

•   “Mayong nakakaaram kan eksaktong petsa kan pagkamundag ni Cristo.”—Encyclopedia of Early Christianity.

 Baga man dai direktang sinisimbag kan Bibliya an hapot na, ‘Kasuarin namundag si Jesus?’ sinasabi man kaini an duwang pangyayari kan panahon na mamundag siya na nakakumbinsir sa dakul para masabutan na dai siya ipinangaki nin Disyembre 25.

Bako kan tiglipot

1.   An pagparehistro. Bago ipangaki si Jesus, nagpaluwas nin pagbuot si Cesar Augusto na “magparehistro an bilog na imperyo.” An gabos dapat na magparehistro sa “kanya-kanyang siyudad,” na posibleng abuton nin sarong semanang pagbaklay o labi pa. (Lucas 2:1-3) An pagbuot na idto—na posibleng ginibo tanganing magkolekta nin buhis asin maghanap nin mga suldados—dai pang gayo pamilyar kan mga taon na idto. Kaya minalataw na dai iyan ipagbubuot ni Augusto sa panahon nin tiglipot, huli ta mas makakapaanggot pa iyan sa saiyang mga nasasakupan.

2.   An mga karnero. An mga pastor “nagpipirmi sa luwas asin nagbabantay kan saindang mga karnero sa banggi.” (Lucas 2:8) Sinasabi kan librong Daily Life in the Time of Jesus na an mga aripumpon nasa luwas “sarong semana bago an Paskuwa [katapusan kan Marso]” sagkod sa kabangaan kan Nobyembre. Sinabi pa kaiyan: “Kun tiglipot, nasa sarong paiplian an aripumpon para maprotektaran sa lipot; asin diyan pa sana, mahihiling na sala nanggad an nakaugalian na petsa para sa Pasko, na tiglipot, huling sinasabi sa Ebanghelyo na an mga pastor nasa langtad.”

Sa kapinunan kan tigrakdag

 Makakarkulo niyato kun kasuarin namundag si Jesus kun mabilang kita paatras puon kan magadan siya sa aldaw nin Paskuwa, Nisan 14, tigsuli kan 33 C.E. (Juan 19:14-16) Mga 30 anyos na kaidto si Jesus kan punan niya an saiyang tulo may kabangang taon na ministeryo, kaya ipinangaki siya sa kapinunan nin tigrakdag kan 2 B.C.E.—Lucas 3:23.

 Kun mayong ebidensiya na Disyembre 25 ipinangaki si Jesu-Cristo, taano ta isineselebrar an Pasko sa petsang iyan? Sinasabi kan Encyclopædia Britannica na posibleng pinili kan mga lider nin simbahan an petsang iyan tanganing “isabay sa paganong Romanong kapiyestahan na ‘kumpleanyo kan daing kadaugan na saldang,’” sa panahon kan winter solstice. Sigun sa The Encyclopedia Americana, naniniwala an dakul na iskolar na ginibo iyan “tanganing mas magin nakakaugma an Kristiyanismo para sa nakumbertir na mga pagano.”