Mangyayari an katuninungan sa daga, bakong paagi sa mga paghihinguwa nin tawo, kundi paagi sa Kahadian nin Diyos, na sarong gobyerno sa langit na pinamamahalaan ni Cristo Jesus. Hilingon kun ano an sinasabi kan Bibliya manungod sa magayunon na paglaom na ini.

1.   Papapunduhon nin Diyos “an mga giyera sa bilog na kinaban,” bilang kautuban kan saiyang pangako na magkaigwa nin “katuninungan sa daga sa mga kinawiwilihan niya!”—Salmo 46:9; Lucas 2:14, Good News Translation.

2.   Hali sa langit, papamahalaan kan Kahadian nin Diyos an enterong daga. (Daniel 7:14) Huling iyan na sana an gobyerno sa bilog na daga, hahalion kaiyan an nasyonalismo, na iyo an pinakadahilan kan mga iriwal.

3.   Si Jesus, an Tagapamahala kan Kahadian nin Diyos, inaapod na “Prinsipe nin Katuninungan,” asin sisiguraduhon niya na “an katuninungan dai magkakaigwa nin katapusan.”—Isaias 9:6, 7.

4.   An mga tawong parapakiiwal dai tutugutan na mabuhay sa irarom kan Kahadian, huli ta “ikinakaungis [nin Diyos] an siisay man na namumuot sa kadahasan.”—Salmo 11:5; Talinhaga 2:22.

5.   Tinutukduan nin Diyos an saiyang mga nasasakupan kun paano mamuhay nin matuninong. Bilang resulta kan instruksiyon na ini, sinasabi kan Bibliya: “Pupulpugon ninda an saindang mga espada tanganing magin mga tarom nin arado asin an saindang mga garod tanganing magin mga pantakras na kagot. An nasyon dai na mabingat nin espada laban sa nasyon, ni mag-aadal pa man sinda nin pakikigiyera.”—Isaias 2:3, 4.

 Ngunyan pa sana, minilyon na mga Saksi ni Jehova sa bilog na kinaban an natukduan nin Diyos kun paano magin mapagpatuninong. (Mateo 5:9) Dawa iba-iba an samong lahi asin hali kami sa labing 230 kadagaan, dai kami nakikilaban sa samong kapwa.