An Miguel, na inaapod kan nagkapirang relihiyon na “San Miguel,” minalataw na sarong pangaran na itinao ki Jesus bago asin pagkatapos kan saiyang buhay digdi sa daga. a Nakipagdiskusyon si Miguel ki Satanas pagkagadan ni Moises, asin tinabangan niya an sarong anghel na ipaabot ki propeta Daniel an mensahe nin Diyos. (Daniel 10:13, 21; Judas 9) Pinatunayan ni Miguel an kahulugan kan saiyang pangaran—“Siisay an Arog nin Diyos?”—paagi sa pagdepensa sa pamamahala nin Diyos asin pakikipaglaban sa mga kaiwal nin Diyos.—Daniel 12:1; Kapahayagan 12:7.

 Pag-isipan kun taano ta tama sanang isipon na si Jesus iyo si Miguel na arkanghel.

•   Si Miguel iyo an “arkanghel.” (Judas 9) An titulong “arkanghel,” na nangangahulugan na “pamayo kan mga anghel,” naglataw sa duwa sanang bersikulo sa Bibliya. Sa mga bersikulong iyan, nasa pormang singular an tataramon, na nagpaparisa na saro sanang anghel an igwa kan titulo na iyan. Sinasabi kan saro sa mga bersikulong iyan na an binuhay liwat na Kagurangnan na Jesus “mababa hali sa langit na nagtatao nin pagbuot, [na] may boses nin arkanghel.” (1 Tesalonica 4:16) Si Jesus igwa nin “boses nin arkanghel” dahil siya an arkanghel, si Miguel.

•   Nasa panginginot ni Miguel an sarong hukbo nin mga anghel. “Si Miguel asin an saiyang mga anghel nakipaglaban sa dragon,” si Satanas. (Kapahayagan 12:7) Igwa si Miguel nin dakulang awtoridad sa runa nin mga espiritu, huling inaapod siyang “saro sa panginot na mga pamayo” asin “an makapangyarihan na pamayo.” (Daniel 10:13, 21; 12:1) Ipinapamidbid kan mga titulong ini si Miguel bilang “an panginot na komandante kan hukbo nin mga anghel,” arog kan pagkasabi kan iskolar sa Bagong Tipan na si David E. Aune.

   Sa Bibliya, may sinambit na saro pang pangaran na igwa nin awtoridad sa sarong hukbo nin mga anghel. Ilinaladawan kaiyan an “panahon na an Kagurangnan na Jesus kaiba an makapangyarihan niyang mga anghel ihayag na hali sa langit na may naglalaad na kalayo, mantang nagsasagibo siya nin pamamalos.” (2 Tesalonica 1:7, 8; Mateo 16:27) “Nagduman [si Jesus] sa langit, asin an mga anghel asin an mga awtoridad saka an mga kapangyarihan ipinasairarom sa saiya.” (1 Pedro 3:21, 22) Magigin bakong makatanusan na isipon na gigibuhon nin Diyos si Jesus asin si Miguel na magkaribal na komandante kan banal na mga anghel. Imbes, mas rasonableng isipon na an duwang pangaran, Jesus asin Miguel, nanunungod sa saro sanang persona.

•   “Matindog” si Miguel sa “panahon nin kasakitan” na dai pa kasuarin man nangyari sa kasaysayan. (Daniel 12:1) Sa libro nin Daniel, an ekspresyon na “matindog” sa parati ginagamit sa sarong hadi na minatindog para magsagibo nin sarong pambihirang aksiyon. (Daniel 11:2-4, 21) Si Jesu-Cristo, na iyo “An Tataramon nin Diyos,” magibo nin pambihirang aksiyon bilang an “Hadi nin mga hadi” para puhuon an gabos na kaiwal nin Diyos asin protektaran an mga lingkod nin Diyos. (Kapahayagan 19:11-16) Gigibuhon niya iyan sa panahon nin “dakulang kasakitan na dai pang arog kaiyan na nangyari puon sa kapinunan kan kinaban.”—Mateo 24:21, 42.