Bushe Imfwa ya kwa Yesu Yaba Shani “Icilubula ca pa Abengi”?

TINIKENI

Icasuko ca mu Baibolo

Imfwa ya kwa Yesu e nshila Lesa abomfeshe pa kulubula, nelyo ukupususha abantunse ku lubembu ne mfwa. Baibolo ilanda pa mulopa Yesu asuumishe ukuti mutengo we lambo. (Abena Efese 1:7; 1 Petro 1:18, 19) E mulandu wine Yesu alandiile ukuti aishile mu “kupeelo umweo wakwe icilubula ca pa abengi.”—Mateo 20:28, Baibele wa Mushilo.

Mulandu nshi “icilubula ca pa abengi” calekabililwa?

Umwaume wa kubalilapo Adamu bamubumbile uwapwililika, nelyo uwabula ulubembu. Atwalilila ukuba ne cumfwila nga alikele umuyayaya, nomba alipanishe ili ishuko pantu alikeene ukumfwila Lesa. (Ukutendeka 3:17-19) Ilyo akwete abana, alibambukishe ulubembu. (Abena Roma 5:12) E mulandu wine Baibolo ilandila ukuti ifyo Adamu acitile fyalilengele ena na bana bakwe ukuba abasha ba lubembu. (Abena Roma 7:14) Apo abantunse bonse tabapwililika, tapali nangu umo uwali no kubwesha ico Adamu alufishe.—Amalumbo 49:7, 8.

Lesa alyumfwilile uluse abana ba kwa Adamu filya bashakwete isubilo lya kwikala umuyayaya. (Yohane 3:16) Nomba ukulingana ne mitantikile ya kwa Lesa iya mulinganya, tali na kulabako fye ku lubembu lwabo ukwabula ukucitapo nangu cimo. (Amalumbo 89:14; Abena Roma 3:23-26) Apo Lesa alitemwa sana abantunse, alipekenye inshila yakwelelamo imembu shabo no kushifumyapo. (Abena Roma 5:6-8) Icilubula e nshila iyo apekenye.

Bushe icilubula cibomba shani?

Mwi shiwi lya mu Baibolo ilya kuti “icilubula,” mwaba ifintu fitatu:

Mwaba ukulipila.—Impendwa 3:46, 47.
Mwaba ukulubula umuntu.—Ukufuma 21:30.
Mwaba ukulipila icalinganako ku co umuntu alelipilila nelyo ico alefuta. *

Moneni ifyo ifi fitatu fibomba nga tulelanda pe lambo lya cilubula ilya kwa Yesu Kristu.

Ukulipila. Baibolo itila Abena Kristu ‘bashitilwe pa mutengo uukulu.’ (1 Abena Korinti 6:20; 7:23) Uyu umutengo mulopa wa kwa Yesu uo ‘ashitiile Lesa abantu ukufuma mu mitundu yonse ne ndimi na bantu ne nko.’—Ukusokolola 5:8, 9.
Ukulubula. Ilambo lya kwa Yesu lyalenga ‘tulubulwe’ ku lubembu.—1 Abena Korinti 1:30; Abena Kolose 1:14; AbaHebere 9:15.
Icalinganako. Ilambo lya kwa Yesu lyalilingana no bumi bwapwililika ubo Adamu alufishe. (1 Abena Korinti 15:21, 22, 45, 46) Baibolo itila: “Filya kuli bucintomfwa bwa muntu umo [Adamu] abengi balengelwe ababembu, e fyo mu cumfwila ca muntu umo [Yesu Kristu] e mo abengi bakalengelwa abalungama.” (Abena Roma 5:19) Ici cilelanga ifyo imfwa ya muntu umo yalubwile abantu abengi ababembwike. Na kuba ilambo lya kwa Yesu e “cilubula icalinganako” ica bantu bonse abafwaya ukunonkelamo.—1 Timote 2:5, 6.

^ Ishiwi lya mu Baibolo ilyo bapilibula ukuti “icilubula” lilosha ku ndalama nelyo icintu icacindama ico balipila. Ku ca kumwenako ishiwi lya ciHebere iya kuti ka·pharʹ lipilibula “ukufimba.” (Ukutendeka 6:14) Kabili lilosha ku kufimba pa membu. (Amalumbo 65:3) Ishiwi ilyapalako ni koʹpher kabili lilosha ku mutengo wa ndalama shilipilwa pa kufimba nelyo ukulubula. (Ukufuma 21:30) Na kabili ishiwi lya ciGriki ilya lyʹtron ilyo bapilibula ukuti “icilubula,” kuti balipilibula no kuti “umutengo wa kulubula.” (Mateo 20:28) Bakalemba abaGriki balebomfya ili shiwi nga balelanda pa kulubula umufungwa uo baleikata mu nkondo nelyo ilyo balelubula umusha.